Khotbah - Renungan Kebaktian Natal Pjj Sektor Getsemani & Kana GBKP Batu Aji Tgl. 9 Desember 2020, Nats: Yeremia 17:7-8

NATAL PJJ GBKP BATU AJI

Tgl. 9 Desember 22020

 

Khotbah     :  Yeremia 17:7-8

 

Tema:

Tuhan nemani kita, guna kai? (Matius 1:23)

 

Sub Tema     :

Kerehen Yesus Kristusku doni guna nemani kita, emaka ruratkenlah geluhndu ibas Yesus gelah kam ndatken gegeh lako ndalani kegeluhen.

 

Renungen …

Temata: Tuhan nemani kita, guna kai? Pastina gelah kit ula mbiar, gelah tetap ukurta, gelah lit sinampati kita. Tambah sie adi sioge Matius 28:20 (Aku tetap ras kam she ku kedungen jaman) berarti pe lit hubungenna gelah kita ibas ndalani kegeluhenta enda ngalakoken singena ate Tuhan eme nerusken berita keselamaten e man sinursurta, man sekelewetta ras tentuna man kerina jelma. Sabab kita idilo labo saja gelah terkelin tapi pe gelah jadi alat nehken sura-sura Dibata e eme gelah doni enda pe terkelin. Sendalanan ras si e lit sada nari eme gelah ibas keadaan siugapa pe, baik senang ntah susah tetap ernalem man Dibata. Katakenlah jaman genduari ija secara umum kerina masyarakat susah erkiteken pandemic covid 19, emaka tandana kita nggejapken itemani Dibata ije me teridah kita bedana ras kalak sideban baik singaku Kristen bagepe kalak si lenga tek man Yesus Kristus. Ibas kai teridah bedana? Tentuna ibas mbue hal, khususna tetap ngasup ngataken bujur man Dibata. Berarti gasup ngidah hal sipositif ibas kerina keadaan sinialami. Enda me si icidahken Paulus ibas geluhna she maka isuratkenna ibas Roma 8:28 “Sieteh maka i bas kai pe Dibata erdahin guna kiniulin man kalak si erkeleng ate man baNa, e me kalak si enggo ipilih Dibata arah sura-suraNa”.

Emaka momentum mperingeti ras merayaken natal ngingetken kita maka kekristenenta e arusna la terjeng penggelaren ntah KTP. Tapi ngingetken kita maka Dibata e enggo tuhu-tuhu Imanuel (Dibata enggo ras kita). Banci si bandingken, ras sekalak bayak ntah si perpangkat/erjabaten saja kita deher, kai ka adi akrap ntah kompak kuakap lanai mesera siakap ibas mbue hal, kai ka adi ras Dibata simada kuasa isurga ras idoni, simada kerina sinasa lit. Enda penting gelah ula kari bagi kuan-kuan muas teruh sampuren ntah pe bagi cerita enda. Merana ditengah kelimpahen. Lit sekalak pernanden kegeluhenna sangat sederhana, ia enggo mbalu janah enggo ka lansia. Sada ngenca anakna si enggo anak perana. Janah ibas sada wari mindo anak enda gelah iijinken nandena merantau berkat ku Amerika ndarami dahin gelah kegeluhenna ras nandena banci reh sikapna erkiteken ibas kotana e mesera ndarami dahin. Gendek cerita amin gia alu ukur mberat tapi nginget masadepan anakna e I ijinken pernanden e. Piga-piga bulan kenca sie, pernanden enda kurang sehat janah kegeluhenna pe reh susahna sebab sedekah enda pe anakna e nge sinampati ibas mbue hal. Megi keadan pernanden enda rehen me tetanggana nungkirkenca. Ngidah kondisi pernanden e tuhu-tuhu memprihatenken emaka tetangga e nungkuni apakah anakna si merantau ku Amerika e lit ngirimken sen, reh nina pernanden enda la lit. Memang tiap bulan nge ia ngirimken surat, saja ngenca labo lit sen selain surat ras kertas si labo lit ergana nina. Perbahan penasaren, mindo tetangga e gelah banci icidahken surat e. Mis ibuat pernanden e surat-surat sipernah ikirimken anakna  iteruh bantalna, jenari iberekenna man tetangga e. Senggetkal tetangga e sabab ibas amplop e lit lembaren sen dolar si cukup bahken berlebih ikirimken anakna e guna kegeluhen nandena, tapi erkiteken la meteh ntah la menyadari maka kertas si berwarna e,  eme sen si banci igunaken memenuhi kebutuhenna jadi me bagi judul kisah enda: merana itengah kelimpahen.

Arah cerita enda, gelah ula kita bage. Setiap tahun si peringeti ras sirayaken Natal maka penampat situhu-tuhu e enggo reh kutengah-tengah manusia, enggo reh ku tengah-tengahta tapi kegeluhenta labo reh damena, labo reh senangna. Lalap denga erguapa ndia, mibiar, aruate, jungut-jungut ras sidebanna. Terlebih ibas paksa jaman covid 19 enda. Mbue jelma laboh ntah pe mengeluh. Bahken lit deba enggo putus asa pe. Lit ka deba amin gia secara ekonomi sikap denga nge (erkiteken mbue asatna ntah ertana) saja erkiteken situasi paksa enda secara umum urak pemasuken, teridah kal tempa situasina bagi kiamat, mengeluh ras mengeluh. Tentuna anak-anak Tuhan labo bage sikapna, bahken arusna ngataken bujur ibas siguapana bagi ndai enggo isingetken. Enda me situhuna makna Natal, Dibata enggo lit itengah-tengahta, imanuel (Diabata ras  kita) guna kai? Tentuna gelah kesangapen jadi sekerajangenta si ernalem man baNa. Uga maka she bage? Bagi nast khotbahta ibas Yeremia 17:7-8 eme ernalemlah ban Dibata.

Mari ibas paksa pandemic covid 19 enda pe tetap kita ernalem man Dibata. Tek kita kata Dibata e ya ras amin. Padan Dibata pasti jadi. Kalak si ernalem man Dibata e bali kap ia ras batang kayu siturah I tepi lau. La aru atena tupung paksa perlego, lalap meramis buahna. Tapi, bagi usur isihken kami, bahanlah dalanna Dibata e masu-masu kita arah kerina usaha ras pendahin sinilakoken kita alu tutus, ulet, kreatif ras inovatif.

Selamat wari natal man banta kerina. Amin.

Pdt. S. Brahmana

Artikel lain yang terkait: