Khotbah - Renungan Kebaktian Malam Natal 24 Desember 2020, Nats: Yesaya 9:1-6

KHOTBAH MALAM NATAL

Tgl. 24 Desember 2020

 

Invocatio     :

Ipupusna pagi sekalak anak dilaki janah arus ibahanndu gelarna Jesus -- sabap Ia me pagi si nebusi bangsaNa i bas dosa-dosa nari” (Matius 1:21).

 

O g e n: Titus 2:11-15; Khotbah: Yesaya 9:1-6

 

Tema:

SINALSAL SI ERKINAR

 

 

Renungen …

Lit sada legenda kerna raja Persia si terkenal mehuli ras bijaksana. Raja enda keleng kal atena rakyatna, emaka guna meteh keadaan rakyatna megati ia menyamar jadi rakyat biasa.

Ibas sada wari raja enda menyamar jadi sekalak gelandangen jenari dahina sada rumah sederhana. Simada rumah menyambut alu ramah ras ngajak man berngi ras-ras. Janahna man, ercakap-cakap ia ibas suasana akrab. Kenca enggo mbagas berngi gelandangen enda pe pamit.

Pepagina raja mulihi berkunjung ku rumah e alu make paken kebesarenna. “Aku me gelandangen si enggo iajakndu man berngi nderbih nina petandaken diri”. Ia kap raja kenca enggo ipetandakenna dirina simada rumah e mindo hadiah erta ntah sen man bana, tapi ternyata lang.

Nina simada rumah e, kam raja nadingken istana ras kemulian guna reh ku rumah kami si sederhana enda, jenari kam raja pe nggit man pangan sederhana ras kami bagepe ercakap-cakap she mbages berngi. Kerina enda tuhu-tuhu erbahansa she kal riahna ukur kami. Man kalak sideban, raja mereken hadiah erta ntah sen, tapi man kami kam reja enggo mereken dirindu nggit reh ku rumah kami ras man ras-ras. Enda me hadiah si mbelin ras terindah man kami.

Perpulungen sinikelengi Tuhan, enda me sada kisah si naksiken uga kepedulin sekalak raja nandangi rakyatna, bagepe uga sikap rakyatna nandangi kehadiren rajana. Cerita enda ngingetken kita pe kerna peristiwa natal eme Yesus Kristus enggo nadingken kemulianNa, berekenna diriNa man banta manusia gelah ise sitek la bene tapi ndatken kegeluhen si rasa-lalap (Yohanes 3:16). Alu bage sikapta pe arusna bagi simada rumah sederhana e, kerehen  Yesus Kristus e eme hadiah si la ternilai ergana man manusia ras doni enda.

Ayat 6 ibas nats khotbah ikataken "Sekalak anak enggo tubuh man banta, anak dilaki ibereken banta. Ia me pagi jadi peminpinta. Ia igelari: "Penampat si meganjangna". "Dibata si Mada Kuasa". "Bapa si Rasa Lalap". "Raja Dame" (“Sebab seorang anak telah lahir untuk kita, seorang putera telah diberikan untuk kita; lambang pemerintahan ada di atas bahunya, dan namanya disebutkan orang: Penasihat Ajaib, Allah yang Perkasa, Bapa yang Kekal, Raja Damai." 

Ibas ayat enda Yesaya ngerana kerna kerehen sekalak pembebas guna memimpin bangsaNa ku bas keriahen/sukacita, damai sejahtera, kebenaran, dan keadilan; Ia me Mesias, Ia me Yesus Kristus, Anak Dibata”.

Nubuaten enda enggo igenapi arah Natal. Janah Anak e eme Penampat si meganjangna. Berarti Ia me ngenca ngasup nampati manusia ibas kerina hal, khususna nampati manusia pulah ibas ukumen kematen si rasa-lalap erkiteken dosa si enggo ngelangketi kerina manusia. Engkai maka ikataken khususna? Erkiteken sideban-sidebanna banci saja iblis ntah kuasa-kuasa kegelapen ngasup merekensa bagi kebayaken, sukses, ras sidebanna tapi ise pe langasup mereken keterkelinen ntah keselamaten seyakatan Yesus Kristus ngenca.

Tema Kebaktin malam natal enda eme “Sinalsal si erkinar”. Tema enda erpalasken Yesaya 9:2 singataken “Bangsa si nggeluh i bas kegelapen enggo ngidah sinalsal si erkinar. Kalak si ringan i bas awih-awih kematen enggo isalsali terang si harhar”. Tema enda mpersingeti kita gelah siinget mulihi ise kita ope ngaloken terang e. Kita eme bangsa si lit ibas gegelapen, kalak si ringan ibas awah-awih kematen. Uga kin kalak enggeluh ibas kegelapen? Kalak si lit ibas gelap biasana lit kepaniken, kebiaren, la tenang, la lit dame, gelah banci tetap bertahan nggeluh la ia mbiar-mbiaren menindas bahken meneken kalak sideban, la lit tujun nggeluh sipasti ras sideban-sidebanna. Tapi sebalikna kalak si ngidah ras ngikutken terang e pasti turah pengarapen, lit semangat, banci ngelewati dalin si mesera, nggeluh terarah kempak kegeluhen singena ate Dibata, janah kalak si setia nggeluh ibas terang e la nai lit awih-awih kematen, si lit eme awih kegeluhen sirasa-lalap.

Alu bage, Natal si peringeti kita mereken dorongen gelah kita la nai nggeluh ibas gelapen (geluh ibas aru ate, jungut-jungut, saling menyalahken, ngelaboh, putus asa, la lit keriahen, la lit dame ras sidebanna) tapi sebalikna erkiteken terang e lit ibas kita erbahansa kita tetap semangat, sukacita, optimis, tetap ukur, tetap lit keyakinen maka lit serpang pulah adi lit masalah ras sidebanna amin gia paksa jaman pandemic covid 19 enda.

 

Selamat Wari natal. Amin.

Pdt. S. Brahmana

Artikel lain yang terkait: