PA MORIA TANGGAL 8-14 MEI 2022 - TEKS 1 SAMUEL 31:1-5

PA MORIAA TANGGAL 8-14 MEI 2022

 

OGEN     : 1 SAMUEL 31:1-5

TEMA     : RUKUR SI MEHULI

Tema PA Moria eme Rukur Mehuli ntah ibas cakap inggrisna Positif Thingking ertina kengasupen mbulatken ukur kerna simehuli ibas kerina keadan.

Salah sada indicator erkiniteken eme berpikir positif/rukur mehuli sabab tek ia ibas kai pe erdahin Dibata guna kiniulin kalak sierkeleng ate man baNa (bd. Roma 8:28) eme sababna adi kune gagal ibas sada-sada hal nina “kegagalan harini adalah keberhasilan yang tertunda”, enda ertina man kalak sierkiniteken tetap lit dalan pulah.

Payo ibas kegeluhen labo lit jelma si la pernah ndatken perbeben saja ngenca kalak si erkiniteken ngalaken berbeben e tetap tenang, ertoto ia, dalankenna pertotonna e. Kune pe perbeben e lalap denga lit la erbahansa ia putus asa sabab tek ia Dibata si sembahna erkeleng ate man bana.

Lit 3 kalak pernanden si seri perbebenna eme ngalaken perbulangenna si she kal gangna sora mengker-na adi tunduh kenca. Pernanden sipemena, bage kenca enggo jam medem mis berjut ayona, ndele atena sabab terganggu kal ia megi sora mengker perbulangenna. Emaka ibas ia medem bage kenca mengker perbulangenna mis tukulna, bagem gedang-gedang berngi she terang wari mbulan ayona sabab kurang tunduh. Pernanden sipeduaken lain ka carana, bage jam tunduh mis buatna lembut ras bantal medem ia I kursi darat kamar emaka enggo pangani rengit. Tapi pernanden si peteluken la bagi dua kalak pernanden e, she jam tunduh medem ia ras perbulangenna, janah bage begina sorang megang mengker berbulangenna mis ia ertoto nina: bujur Tuhan ras perbulangenku denga aku medem, pangen ia mengker ibas ingan medem kami enda dari pada ras diberu sideban ia tunduh ras mengker. Enda me contoh ngalaken perbeben secara rukur mehuli ntah positif.

Uga kerna Raja Saul ibas ogen PA Moria enda? Ituriken maka Saul tuhu-tuhu putus asa, talu bangsa Israel erperang ras bangsa Pilistin I deleng Gilboa. Ikataken enterem bangsa Israel mate ije she maka Raja Saul ras anak-anakna lompat (kiam nadingken pertempuren e). Tapi itunduk kalak Pilisten e jenari ibunuhna 3 kalak anak Saul eme Jonatan, Abinadap ras Milkisua. Bagepe Raja Saul kena panah musuhna ras mekelek lukana. Ibas keadaan si bage me Saul tuhu-tuhu putus asa she maka mate naring akapna jalan keluar asangken itangkap kalak Pilistin jenari iguro-gurokenna kenca si e ibunuhna (ayat 4). Emaka suruhna anak perana si maba senjatana gelah munuh ia, tapi anak perana e la nggit she maka Raja Saul berinisiatip munuh bana alu mbulakken badanna ku ujung pedangna.

Keputusen raja saul enda banci saja lit pro kontra (erbage pendapat membenarken ras menyalahken) sabab ibas sada sisi tindaken Saul enda labo terpandang. Lebih baik mate munuh diri dari pada ipermaluken jenari mate kang (bd. Harakiri Jepang). Tapi sisi sideban eme persfektif kata Dibata tuhu-tuhu isayangken keputusen ras tindaken raja saul enda, apai ka ia selaku raja kalak Israel, raja sinipilih Dibata arah nabi Samuel. Teridah sitik pe la lit arapkenna penampat Dibata. Raja saul tuhu-tuhu la nai ngasup rukur mehuli ntah berpikir positif.

Relevansi Kata Dibata enda man Moria

1. Payo raja saul enggo itulak Dibata erkiteken la patuh man perintah Dibata (baca 1 Samuel 15:10-35), tapi  biak Dibata dem perkuah ate ras nggit ngalemi salah lepakta, adi erlebuh kita man baNa sampatina nge kita. Tapi sayang raja Saul la nai lit ibas dirina rukur simehuli ntah berpikir positif kerna Dibata. Tentu enda jadi pelajaren man banta gelah sitandai Dibata e maka biakna dem perkuah ate ras patuh man Dibata. Arah si e me Moria banci tetap ngasup rukur mehuli amin gia mberat perbeben si nihadapi.
2. Kengasupen rukur mehuli ntah berpikir positif eme tandana kita lit ibas kiniteken si payo. Emaka adi lit denga ukurta si lamehuli ntah berpikir negative nandangi temanta, sendah ernalemken gegeh Dibata si benekenlah e ibas ukurta.
3. Tambah si e rukur Positif mbelin ka kepe manfaatna nandangi kesehaten fisik ras mental eme[1]:

• Meningkatken system kekebalen tubuh
• Memelihara kesehaten jantung
• Risiko struk lebih rendah
• Menurunkan resiko serangan jantung
• Harapen hidup lebih panjang
• Meningkatken toleransi nyeri
• Menciptakan kepribadian yang tangguh
• Mengatasi stress
• Menurunkan risiko kecemasan
• Lebih bijak dalam mengambil keputusan.

 

Pdt. S. Brahmana

---

[1] https://www.bola.com/ragam/read/4724145/10-manfaat-berpikir-positif-bagi-kesehatan-fisik-dan-mental

Artikel lain yang terkait: