Thema:
Jadi Keluarga Dibata
Tujun :
Ø Gelah ngawan ni perpulungen ngangkai sura-sura Dibata ibas kegeluhenna.
Ø Gelah ngawan ni perpulungen patuh nandangi perentah Dibata
Catatan Sermon
(1) Kata Dibata siman oratenta sendah eme kerna turi-turin Nuah pra-banjir simbelin siipereh Dibata guna nasapken kerina manusia erkiteken enggo mbau lagu langkahna, erkiteken doni enggo dem alu kejahaten manusia[1].
(2) Perikopta imulai ayat 8, jenari ayat 17-22. Ayat 8 jadi argumentasi engkai maka Nuah ndatken perlakun berbeda ras jelma sinterem. Alu kata sidaban, perlakun Dibata nandangi Nuah ras isi jabuna/keluargana labo ncidahken maka Dibata rayo-ayo. Nuah ngena ate Dibata ras ibas ayat 9-10 tole ituriken maka ibas jamanna Nuah ngenca simehuli, la lit kesalahenna. Ia erdalan ibas dalan Dibata.
(3) Ibas ayat 17-22 ituriken kerna (1) rencana Dibata engkernepken kerina singgeluh, (2) kerna perpadanen Dibata nandangi Nuah eme perpadanen keselanaten man kalak sinipilihNa, (3) bagepe kerna uga Nuah ngelakoken kerina siiperintahken Dibata.
(4) Thema Pjj-ta “Jadi keluarga Dibata”.
- Jadi keluarga Dibata berarti keluarga e nggeluh rikutken aturen ras kebiasan keluarga Dibata e. Kerna sienda banci sialogina jadi keluarga SBY ija SBY eme selaku presiden Repoblik Indonesia. Adi kita jadi keluargana maka mahan bana harkat ras martabatta jadi meganjang, mbue kemudahen-kemudahen sialoken, bagepe (bisana) penghargan ras penghormaten kalak man banta lebih asa kalak sideban. Tapi dampar sideban pe arus njagai reputasi e, jagai nama baik. Alu kata sideban arus ka nggeluh sue ras aturen ras kebiasan keluarga e. Adi la bage jadi pandangen. Tentu kita selaku keluarga Dibata lebih asa sie, ndauh lebih hebat, lebih mehaga asangken keluarega SBY. Engkai? Sabab jadi keluarga SBY paling-paling kebayaken, penghargaan ras penghormaten kalak secara doni ngenca sialoken, epe paksa SBY jadi presiden, kenca la nai jadi presiden lenga tentu. Tapi jadi keluarga Dibata ibas doni enda pe kita ipasu-pasu, terlebih kita jadi pewaris kebayaken Kerajan Surga[2]. Saja ngenca penungkunenna eme payo kin kita bagin keluarga Dibata?b. Selaku keluarga Dibata maka seharusna teridah arah geluhta: (1) bagi Nuah, amin gia ibas jamanna luarbiasa kejahaten itengah-tengah masyarakat, tapi la ia terkontaminasi; ia ras jebuna tetap jaga geluhna la ikut-ikuten erbahan jahat emaka ibas ayat 8 ikataken Nuah ngena ate Tuhan. Uga kinata geluhta, adi genduari lit penilaian sidat nge pontenta maka payo ngena ate Tuhan kita?
- Tek kita Kata Dibata “Ya dan Amin”. Artina ka si ibelasken Tuhan, kai si isehken Tuhan arah Katana amin gia secara manusia mberat, bagepe secara logika mekatep petembil ras caranta rukur, arus si lakoken. Tek kita kai pe sibelasken Tuhan, si isuruh Tuhan gelah silakoken e kerina guna kiniulinta, labo meneken kita. Contoh, turi-turin Nuah enda. Isuruh ia erbahan kapal sigalang alu ukuren gedang 150 meter, belangna 25 meter ras ganjangna 15 neter, janah kayuna arus kayu si nteguh. Situhuna la masuk akal, sebab lenga bo lit tanda-tanda banjir mbelin ras secara geografis pe kuta Nuah erbukit-bukit. Tapi man Nuah si enggeluh ibas dalan Tuhan la mpersoalken e. Kai nina Dibata lakokenna. Bagepe namai sada-sada pasang ibas tep-tep rubia-rubia ras perik-perik, erbage pangan baik man Nuah ras rubia-rubia ras perik-perik e.
(5) Kesimpulenna. Malem ateta selaku keluarga Dibata[3], emaka mari sipertahanken statusta e alu tetap menomorsadaken Dibata ibas jabunta, artina patuh nandangi perentah Dibata si isehkenna arah Kata Dibata si tersurat ibas Pustaka Sibadia. Memang sienda labo nukah. Bagi Nuah ibas jamanna si dem kejahaten, enggeluh ibas Dalan Dibata labo gampang, tapi Nuah ras keluargana ngasup she maka ibas ayat 8 ikataken “tapi Nuah ngena ate Tuhan” tentu sienda erkiteken tetap lit persadanna ras Dibata[4].
Diskusi
- Oge Kejadin 6:22, kai kin nge si erbahansa Nuah e nggit ngelakoken kai si iperentahken Dibata man bana?
- Erpalasken bahan ogenta sendah, kai nge tekatta gelah banci jadi keluarga Dibata? Turiken!
Jatiwaringin-Pd.Gede, 21 Maret 2012
Pdt.S.Brahmana
[1] Kejadin 6:12-13
[2] Roma 8:17; Galatia 4:7
[3] Bd.1 Petrus 2:9
[4] Yohanes 15:5
0 komentar:
Post a Comment