Thursday 19 April 2012

Suplemen Bimbingen Pjj tanggal 22-28 April 2012

Nas : 1 Yohanes 1:5-9
Thema : Geluh Ibas Kebujuren

Catatan:
  1. Geluh ibas kebujuren berarti nggeluh la pekulah-kulah (labo lain dibibir lain di hati), tapi uga kin kinatana ntah pe kata situhu. Enda me sada hal si mesera ndalankenca, melaskenca menukah tapi praktekna mesera, terlebih ibas kalak Karo ija lit kuan-kuanna “ula belaskenlah kata tuhu, tapi belaskenlah kata tenteng”. Enda nuduhken maka filosofi kalak Karo keharmonisen nggeluh she kal pentingna. Kata tahu (keterusterangen uga situhuna) mekatep erbahanca la sitabehen/sikitiken ukur, emaka ibas komunitas Karo sienda mekatep ihindarken. Tentu kenca kita jadi kalak kristen, filosofinta eme “belaskenlah kata tuhu ibas paksa tenteng”. Artina kebenaren ntah situhu-tuhu e arus ikataken saja ngenca belasken paksa si pas/sitepat.
  2. Kata Dibata siniorati kita, 1 Yohanes 1:5-9 ngerana kerna “Dibata terang kap”. Salah sada hakekat Dibata eme “Terang” labo gelap. Ikataken ibas ayat 5b “Dibata Terangkap janah la lit sitik pe si gelap ibas Ia”. Ertina Dibata e terteki kap, kai si ikatakenNa tuhu kap kerina. Sebalikna gelap gambaren dosa, kematen, ras kerina si jahat. Ibas Dibata la lit si e, emaka terteki kai siikatakenna. Adi niNa “Aku kap dalan nandai Dibata, dingen ndatken kegeluhen. Ise pe la banci ndahi Bapa adi la arah Aku”[1], kata enda terteki ras payo kap bage.
  3. Adi Dibata Terang kap, kalak sitek kai? Tentuna eme anak-anak terang (Efesus 5:8). Sabab kita enggo iangkat jadi anak-anak Dibata ibas kita tek man baNa (Efesus 1:5). Enggeluh ibas terang berarti tek nandangi kebenaren Dibata siterurat ibas Pusataka Sibadia janah la erngadi-ngadi ras erpala-pala erkiteken keleng ateNa patuh nandangi kata Dibata e arah kata ras perbahanen. Kasa kalak si bage bagi isingetken ibas ayat 7 “lit kap persadanta sapih-sapih kita janah kematen anakNa e mbersihken kita ibas kerina dosa nari”. Lit dua pengertin ijenda eme (1) “persadanta sapih-sapih kita” sinimaksud eme persadan sierpalasken persadan ras Tuhan (nggeluh ibas terang), persadan eirbuahken kiniulin, keadilen ras kebujuren (bd.Efesus 5:9), alu bage persadan e maba pengaru positif sada ras sidebanna guna tetap megegeh selaku anak-anak terang; (2) “kematen AnakMa mbersihken kita ibas krina dosanari” ertina (ibas konteks ayat enda) pembersihen enda nuduhken pendahin siberkesinambungen ibas kalak sitek, labo ibas pengertin sekali ngenca (sekali untuk selamanya)[2]. Kerna si enda ijelasken ibas ayat 8 ras 10, ija Yohanes mengakui maka la mungkin kalak sitek e la nai erbahan salah, la nai erbahan dosa emaka kita perlu pembersihen terus-menerus. Alu pembersihen siterus-menerus enda me maka kita banci nggeluh ibas persadan si intim ras Tuhan. Saja ngenca sipenting eme lit pengakun ras siakuken dosa-dosanta (ayat 8,9).
  4. Genduari penungkunen man banta eme, payo nge kita anak-anak terang? Seharusna kerina kalak sitek man Yesus Kristus eme anak-anak terang, saja ngenca payo nge kita enggo jadi terang e? Lit belas-belas bagenda: Cakap ngenca labo lako pal!! Maksudna jelas eme adi ngaku-ngaku ngenca, cakap ngenca tapi labo teridah arah perbahanen e labo lako. Eme si itekanken ibas kata Dibata siniorati kita. Ibas ayat 6 misalna, adi ninta ersada kita ras Ia, tapi nggeluh ibas gelap e nuduhken cakap kap ngenca. Alu bage seri kita ras kalak perbual. Alu kata sideban pengakun e arus teruji arah perbahanen.
  5. Themata: Nggeluh Alu Bujur. Arusna implikasi kinitekenta, pengakunta kita anak-anak Dibata berarti anak-anak terang eme teridah nggeluh ibas kebujuren ibas krina dampar kegeluhen. Adi kita pedagang, jadilah pedagang si bujur, adi kita jadi pegawai, jadilah pegawai si bujur, adi kita jadi pejabat, jadilah pejabat si bujur, adi kita jadi pemimpin, jadilah pemimpin sibujur, adi kita jadi perbulangen ntah ndehara jadilah perbulangen ntah ndehara sibujur, adi kita jadi permakan (Pdt,Pt/Dk) jadilah permakan sibujur. Terlebih itengah-tengah perpulungen, kebujuren eme palas erbahanja paguh persadanta e. Tapi sebalikna, adi gelarna ngenca sama-sama kalak sierkiniteken tapi labo siteken, labo banci paguh persadan e. Memang nggeluh bujur ibas jamanta gundari tuhu-tuhu sada perjuangen erkiteken bagi usur ikataken kalak: hidup jujur terbujur, hidup jujur tidak makmur, rsd. Tapi tuhu payo kin sie? Man banta kalak sitek tentu la bage.
  6. Iteruh enda lit piga-piga ulih kebujuren:
    1. Bujur ngena ate Dibata (Mazmur 33:5); Kalak si ngelakoken kebujuren:
      1. Ikawali Dibata (Ayub 36:7);
      2. adi ertoto ia ibegiken Dibata (Mazmur 34:18, Amsal 15:8, 1 Yohanes 3:12);
      3. amin gia mbue ngenanami kiniseran tapi ipulahi Dibata nge ia (Mazmur 34:20, 37:39);
      4. ndatken pasu-pasu (Amsal 10:6, 22:9).
    2. Bujur peturah ketenangen, kedamen (Amsal 10:9, 10:30, 28:20), labo sebalikna (contoh: Kalak selingkuh berarti la bujur nandangi pasangenna emaka biasana labo lit ketenangen ras kedamen ibas pusuhna), bagepe cawir metua (Amsal 16:31)
    3. Kalak bujur iinget kalak rasa lalap (Mazmur 112:6; Amsal 10:7 Bd. Pribahasa: Harimau mati meninggalkan belang, manusia mati meninggalkan nama).
Jatiwaringin-Pondok Gede, 19 April 2012
Pdt.S.Brahmana



[1] Yohanes 14:6

[2] Leon Morris, Tafsiran Alkitab Masa Kini 3 Matius-Wahyu. Jakarta: Yayasan Komunikasi Bina Kasih/OMF,1992, hal.852


Artikel lain yang terkait:



0 komentar:

Post a Comment