Tuesday 1 May 2012

Suplemen Bimbingen Pjj 02-8 September 2012, Perbahanen Rasul 10:27-35

Ogen/Pembacaan :
Perbahanen Rasul 10:27-35

Thema : Kerina Kalak Sitek Bali Ilebe-Lebe Dibata

Catatan:
  1. Ungkapen ntah penggelaren senina ras turang situhuna enggo nuduhken maka kasa kalak si ngakui ras sinigelari kalak Kristen (pengikut Kristus) bali kap status ntah pe posisi sada ras sidebanna itengah-tengah perpulungen. Erkondangken Tuhan Yesus Kristus, ija kita eme sahabat/senina Tuhan Yesus si radu ras ngelebuh Dibata eme Bapa, emaka kita kerina senina ras turang sada ras sidebanna. Saja ngenca ibas praktekna mekatep teridah denga lenga kal bage, terlebih ibas kalak karo si erpalasken ku bas orat nggeluh (merga silima, rakut sitelu, tutur siwaluh). Ope seh berita simeriah, kegeluhen bermasyarakat kalak karo enggo iatur ibas orat nggeluh e, biak sembuyak/senina, kalimbubu/puang kalimbubu, anak beru/anak beru menteri. Posisi ntah status enda, amin gia labo lit sigelgel (labo lit kalak biak kalimbubu ia lalap), saja ngenca ibas praktek kegeluhen, adi ia kin kalimbubu lain nge perlakun ibereken asangken man anak beru. Tapi bage gia, reh belinna nge pengangkanta maka kita kerina bali nge ilebe-lebe Dibata.
  2. Kata Dibata sijadi palas pengoratenta ibas Pjj enda, ncidahken uga pengangkan kalak Yahudi kerna dirina siniwakili Petrus ras kalak si iluar Yahudi (Kornelius). Kalak Yahudi erpengakap maka ia me bangsa si badia, bangsa Dibata. Diluar kalak Yahudi meluat kerinana. Emaka lit undang-undang ibas ia, ija kalak Yahudi la banci bengket ku rumah kalak si labo kalak Yahudi (ayat 28), bagepe kalak Yahudi la nggit make kai pe si enggo ipake kalak si labo Yahudi (Yoh.4:9). Kebiasan enda ntah pe cara nggeluh sibagenda, tetap denga ilakoken ajar-ajar Yesus. Bahken lit pemahamen si megegeh maka Kristen eme subordinat Yudaisme, turunen Yudaisme si nilaina lebih rendah. Eme sebabna Yudaisme erpengakap kalak sibertobat jadi kalak Kristen, ia harus ijadiken kalak Yahudi lebe, eme ndalani ritual sunat ras Hukum Taurat. Emaka trobosen sinilakoken Petrus ibas perikopta enda, reh ia nahi Kornelius menghancurken hukum si berlaku sedekah enda. Engkai maka Petrus pang ngelanggar tradisi e? Erkiteken penuruh Dibata (Kis.Rasul 10:11-16), janah Petrus lebih mbiar man Dibata asangken man manusia ras peraturenna (bd.ayat 28c, Kis.Rasul 5:29).
  3. Arah turi-turin enda, Dibata ngerontasken dua tradisi manusia si saling bertolak belakang. Kornelius (kafir) nembah Petrus (ayat 25), ras keputusen Petrus (Yahudi) reh ku rumah Kornelius. Alu bage dage, enda sada legitimasi maka ibas Yesus Kristus hubungen manusia la lit penghalang. Alu kata sideban tradisi si bertentangen ras prinsip Dibata haruslah ihapus ras iganti alu kebenaren Kata Dibata.
  4. Adi sipergermetken, maka situhuna salah sada penyebab mbue pertentangen ibas doni enda eme sikap rasialis (menekanken litna perbedaan ras/Suku Bangsa/Warna Kulit), ija sikap enda peturah ketidak adilen, pertikaian, bagepe peperangen. Kalak Yahudi pe pernah ngenanami kiniseran si mesangat erkiteken perlakun rasialis bangsa Jerman. Emaka banci ikataken kai sinisuan ekame si iperani kalak Yahudi, sabab ibas Padan si Mabru teridah uga kalak Yahudi luar biasa ersikap rasilis. Iakapna, ia me sada-sadana bangsa si berhak nandangi kerina janji Dibata, bangsa sideban lang. Sikap enda erpalasken pemahamen sisalah nandangi konsep “umat pilihen”. Iakap kalak enda, umat pilihen semata-mata eme hak istimewa. Lupa ia maka pendilo istimewa e eme guna tugas ntah kewajiben mulia maba bangsa-bangsa si deban reh ndahi Dibata. Ntah pe alu kata sideban, jadi “pengaci” segelah bangsa-bangsa sideban reh ndahi Dibata ras nandai Dibata. Emaka khotbah Petrus man Kornelius jadi kritik sekaligus pepinter si lepak maka Dibata labo membeda-bedaken jelma. Ibas Dibata la lit sitik pe sikap rasialis. Ise saja si reh ndahi Dibata alu tutus (bagi Kornelius) ialoken Dibata. Janah rahasia enda ipetangkas ibas Yesus Kristus (yat 36-38), ija arah kematenNa I kayu persilang ras kekekenNa ibas sinate nari, Yesus enggo mereken dalan keselamaten man kerina jelma la erdobahen.
  5. Alu bage, respons Kata Dibata si seh man banta arah Pjj berngi enda adi kuakap eme: sipemena, kita selaku kalak si labo Yahudi, seri kita ras Kornelius patut ngataken bujur erkiteken pendahin Kristus nge maka kita banci reh ndahi Dibata ras metunggung jadi bangsa sekerajangen Dibata (1 Petrus 2:9). Sipeduaken, ula ka kita ersikap rasialis. Enda penting sabab bagi enggo isingetken arah lebe, banci saja erkiteken budaya, bagepe sosial ekonomi, kita pe enggo membeda-bedaken jelma. Siah kelompok ku, siah lang. Siah la kade-kadeku, sienda kade-kadengku emaka …. Rst. Tole maka ikataken kami penting, sabab adi jujur kita ibas gereja pe negati sienda lit denga, janah enda me si usur jadi penyebab maka megati terjadi pertembilen, la siangkan, kedungenna Gereja la bertumbuh perban keri energina ngurusi masalah sie, labo uga maka tritugas panggilen gereja banci optimal ilakoklen. Sipeteluken, tugasta kerina eme meritaken anugrah e man kerina jelma lintas ras, suku, bangsa ras bahasa bagepe status sosial.
  6. Nari kita kerina jadi saksi sienggeluh selaku kalak si tek maka kita la nai mbeda-bedaken jelma, khususna si erdahin ibas gereja. Sabab “Kerina Kalak Sitek bali ilebe-lebe Dibata” (Thema).
Pdt.S.Brahmana-Klasis Jakarta-Bandung


Artikel lain yang terkait:



0 komentar:

Post a Comment