KHOTBAH
17 AGUSTUS 2020
HUT
KEMERDAKAAN RI 75 TAHUN
Invocatio:
Kebujuren kap mahanca bangsa jadi mulia, dosa si erbahanca bangsa jadi juru (Kuan-kuan 14:34)
Ogen: Daniel 9:1-10; Khotbah: Titus 3:1-10
Thema:
Dibata Si Engkelini
Wari enda enggo 75 tahun kita merdeka. Ibas kita mperingeti wari kemerdekan e, kita pe selaku gereja ngelakoken ibadah ntah kebaktin enda ertina selaku kalak Kristen kita tuhu-tuhu nggejapken kemerdekaen e sada hal sipenting man bangsata Indonesia enda, janah uga maka jadi kemerdekan e tek kita Dibata nge si masu-masu arah para pejuang kemerdekan si enggo berkorban mbue hal she maka dampak kemerdekan e tuhu-tuhu si gejapken paksa enda. Payo banci denga iperdebatken soal mbue sitikna dampak si igejapken kenca merdeka 75 tahun. Si pasti selaku kita kalak si erkiniteken tetap ngasup ngidah arah dampar positif ras sekaligus ngataken bujur kerna kemerekaen si enggo banci sialami. Terlebih ibas jamanta genduari, upaya-upaya sinilakoken pemerintahen iteruh kepeminpinen presidenta tuhu-tuhu luar biasa, khususna ibas infrastruktur. Banci sibayangken ugange akapndu perjuangenna guna membangun tol I Papua, bagepe ingan-ingan sideban. Gelah arah infrastruktur e lanai lit kelompok masyarakat si terisolasi nari, bagepe memudahken pengembangen ekonomi ras pemeratan. Emaka kerna si e ula ka kita ikut-ikuten erkomentar: dalan ipesikap, tol iban ijah ije, tapi kegeluhen kami bagenda-bagenda lalap, banci kin pan tol ah. Ula kita lupa bagi nuan-nuan ngenda, adi kin durin suan, labo ije isuan mis erbuah ras tasak, lit nge waktuna maka ia erbuah. Janah maka banci erbuah mehuli, tentuna arus nge lit pengorbanen ntah upaya-upaya sinilakoken. Ertina bagem ibas upaya membangun bangsa enda, perlu kesabaren ras perjuangen, banci saja usaha e la sinanami tapi sinursurta pagi ngenanamisa.
Sendalanen ras si e, kata Dibata si jadi nats renungenta ngingetken kita gelah patuh man pemerintah ras si erkuasa alu ndalanken hak ras kewajibenta. Engkai maka e iperintahken man banta? Sabab: (1) Kita enggo lanai bagi sigelgele, ertina kita enggo jadi manusia baru. Cara rukur, sikapta, pengerananta, sura-suranta, sifatta enggo berubah. Engkai maka bage? Sabab kita enggo ngaloken perkuah ate Dibata eme keselamaten erdandanken kinitekenta man Yesus Kristus, janah Kesah Sibadia lit ibas kita (ayat 2-7); (2) Kita arus jadi teladan ibas kerina simehuli. Ertina kita isuruh ku doni enda, ibas si e berarti ku tengah-tengah bangsa Indonesia enda lako jadi saksi-saksi Kristus arah perbahaenta simehuli. Ngerana kerna perbahanen simehuli sehubungen ras kehadirentah I tengah-tengah bangsa ras negarata Indonesia enda tentuna patuh ras mehamat man pemerintah ras pe pemimpin-pemimpinta ibas kerina tingkaten. Jenari sidalanken tugas ras tanggungjawabta selaku warga masyarakat ija kita tading. Sijaga dirinta gelah tetap nggeluh ibas simehuli singena ate Tuhan. Payo mbue tuhu godan ibas tetap nggeluh bujur, adil ras perbahanen simehuli ibas kegeluhenta. Ironisna megati erkiteken bujur, adil bagepe la nggit ngelakoken si la mehuli mbue kalak jadi imbangta. Kuakap si inget denga nge Ahok, bagepe presidenta si genduari. Tapi adi tetap megenggeng si idah nge endingna, kedungenna iangkatken ntah pe ipeganjangken Dibata nge. Ahok genduari jadi Komisaris Utama Pertamina. Presidenta, Joko Widodo banci 2 periode jadi presiden, janah tetap denga sehat ras mejuah-juah amin gia adi sinen ibas medsos mbue ranan si la mehuli nadangi pemerintah sigenduari, lit ka kalak tertentu kai pe iban pemerintahen si genduari la akapna tenteng. Lit ka kalak ntah kelompok tertentu enggo pe jelas la payona pemimpin ntah tokoh e tetap ka ibelana ntah kai motivasina apakah isebabken erkiteken sada kelompok, sada suku, ntah sada agama ntah pe kerna imbalen labo kal sieteh. Saja kita ula bage. Ula nggit sijabapen si sea-sea, apai ka rubati she sebunuhen. Tandana kita enggo jadi anak-anak Tuhan arusna kita terdepan ncidahken dirita selaku masyarakat si patuh nandangi pemerintah.
0 komentar:
Post a Comment