KHOTBAH MINGGU 3 JANUARI 2021
Invocatio:
Meriahlah ateta, sabap kita
sikerajangenNa ermeriah ukurlah asa kai kalak si nembah Ia!
(1 Kronika 16:10).
O g e n : Jeremia 31:7-14; Khotbah : Efesus 1:3-14
Tema: Erbage Pemere Pertendin
Mejuah-juah, salam sehat ras selamat tahun baru man banta kerina.
Bujur ninta man Dibata sabab enggo kita ikeparkenna she ku bas tahun 2021 enda, janah enggo ka kita banci ersembah man Dibata ibas Minggu sipemena tahun 2021 enda. Egia me payo nge meriah ukurta enggo banci kita mengketi tahun 2021 enda? Ula kari meriah ukurta, meriah ukurta ningen, tapi situhuna la meriah ukurta? Adi kuakap arusna meriah ukurta sebab lit rencana Dibata man banta sekalak-sekalak arah kegeluhenta ibas tahun 2021 enda, paling tidak, janah e sipentingna eme lit denga ibereken Dibata kesempaten man banta gelah lebih baik ibas kerinana dampar kegeluhenta ibanding tahun si lepas, tahun 2020. Tapi lebih ibas si e bagi si isingetken rasul Paulus ibas bagin kata Dibata, Efesus 1:3-14 eme kerina kita ngataken bujur erkiteken kita, aku ras kam eme kalak si enggo ipilihNa jadi sekerajangen Dibata arah persadanta ras Kristus gelah kita badia dingen la ersalah I lebe-lebena. O luar biasa. Ibarat keriahen peserta Indonesia idol, banci terpilih bengket ku spektakuler. Adi sisungkuni Femila br. Sinukaban, salah sada ibas 14 kalak sibengket ku babak spektakuler, pastilah she kal kapna riahna. Bengket denga ku babak spektakuler pe enggo akapna she riahna, apai ka jadi juara pagi, kuakap keriahena e enggo LTT (la nai terturiken). Adi bage keriahenta arusna lebih asa LTT e (la nai terturiken) e, engkai? Sabab kita enggo ipilih jadi sekerajangen Dibata. Berarti bagi si isingetken ibas ayat 3b “kita kalak si enggo ipasu-pasu alu erbage-bage pemere pertendin si lit ibas ingan simeganjangna”.
Kai kin erbage-bage pemere pertendin e?
1. Bagi endai
enggo isingetken eme kita enggo ipilih jadi anak-anak Dibata. Tujunna eme gelah
kita badia dingen la ersalah I lebe-lebena ( Ayat 1-6).
2. Penebusen
(ayat 7). Penebusen si ilakoken Yesus nandangi aku ras kam ras kerina kalak si
ipilihna e tuhu-tuhu she kal ergana, sabab penebusen e terjadi alu mereken dirina
jine mate I salibken I uruk golgota guna nebusi dosa-dosanta.
3. IpetangkasNa
sura-surana siterligen man banta (ayat 9). Bisana sada rahasia, kai ka rahasia
she kal pentingna hanya isehken man kalak situhu-tuhu banci ipercayai. Berarti
kalak e labo kalak sembarangen, tapi kalak istimewa. Bd. Matius 11:27 "Enggo
ibereken BapangKu kerinana man bangKu. Ise pe la nandai Anak seakatan Bapa,
janah ise pe la nandai Bapa seakatan Anak ras kalak si man bana enggo
ipetangkasken Anak e”.
4. Itama Dibata cap ibas kita alu mereken Kesah Sibadia - kita dimateraikan dengan Roh Kudus (ayat 13). Kesah Sibadia eme jaminen maka sialoken me kai si enggo ipadanken Dibata man anak-anakNa, man banta kerina.
Alu bage dage ibas kita ndalani kegeluhenta ibas tahun 2021 enda kita ipersingeti gelah focus perhatianta labo semata-mata kebayaken doni enda. Tapi gelah focus utamata eme kebayaken pertendin (kekayaan rohani). Engkai maka bage? Sabab bagi nina Yesus ibas Matius 16:26 “Lit kin gunana man sekalak jelma, adi man bana gia kerina erta-erta doni enda tapi bene kegeluhenna si tuhu-tuhu? Tentu lang! Kai pe labo banci ibahan manusia gancih kesahna”. Berarti kesah lebih penting, lebih meherga asangken kerina kebayaken I doni enda. Kebayaken doni enda la kepe lit ertina tanpa kebayaken pertendin. Eme sababna nina Paulus ibas Filipi 3:7 “Tapi kerina si nai kuakap untung (Kai e? ia Kalak Yahudi tulen, ibas suku Benyemin, kalak terpelajar erkiteken murid Gamaliel, patuh ngikuti adat Istiadat Jahudi, ia popular ras mbue datsa pasilitas bagepe keuntungen erkiteken pesega-sega/niksa kalak Kristen) genduari kerugin kuakap erdandanken Kristus.
Payo mbue rencanata ku lebe, tapi perlu kal si inget apakah rencanata e ndarami kebayaken pertendin ntah hanya ndarami kebayaken doni. Terserah kai pilihenta, si pasti selaku kalak si enggo ipilihNa, selaku kalak si enggo itebusi ras ijadikenna anak-anakNa pastilah labo ipediatNa kita nggeluh ibas kekurangen. Sipenting man banta bagi isingetken ibas Matius 6:33 “Tapi si pentingna kal, daramilah lebe KinirajanNa, janah dalankenlah si ngena ateNa, maka icukupiNa kai si perlu man bandu”. Amin.
Pdt. sabar S. Brahmana
0 komentar:
Post a Comment