KHOTBAH TAHUN BARU, 1 JANUARI 2021
Invocatio:
Ipasu-pasu TUHANlah kam i Sion nari, TUHAN si nepa
langit ras doni (Mazmur 134L3).
O g e n: Galatia 4:1-7; Khotbah: Bilangan 6:22-27
Tema: Tuhan Ulu
Pasu-pasu
Renungan ….
Mejuah-juah, salam sehat ras selamat Tahun baru man banta kerina.
Puji Tuhan kita enggo banci ngepari
tahun 2020 ras mengketi tahun si mbaru, tahun 2021. Kerna sienda tentuna labo
erkiteken gegeh ntah kengasupenta, tapi tek kita erkiteken iijinken Dibata
denga kita mengketi tahun 2021. Kata iijinken berarti lit makna maka “labo
kebetulen”, labo gegeh ras kengasupenta, tambah si e pe tentuna lit maksud ntah
rencana Tuhan arah kegeluhenta ibas tahun 2021. Kerna kai nge maksud ntah
rencana Tuhan e nandangi kita sekalak-sekalak, tentuna kita sekalak-sekalak ngenca
ngasup nggejapkenca arah komunikasi ntah persadanta ras Tuhan. Adi secara umum
tentuna bagi syair lagu si ikarang Pdt. Wilhelmus Latumahina: Hidup ini adalah
kesempatan, kesempatan untuk menjadi berkat.
Sendalanen ras si e, kata iijinken Dibata mengketi tahun 2021 labo ka kita ipelepasna bage-bage saja, sabab secara khusus banci ka ipahami eme erkiteken isuruh Dibata nge kita mengketi tahun 2021. Kata isuruh banci ibandingken ras kecibal bangsa Israel si jadi latar belakang Nats Khotbahta, Bilangen 6:22-27. Ija bangsa Israel kenca enggo ndarat I taneh mesir nari lit ibas perdalinen I gurun pasir menuju Taneh Kanan. Perdalinen e bekas penuhruh Dibata. Adi bekas penuruh Dibata tentuna labo ipediat Dibata bangsa enda bene adi lit jumpa perbeben, jumpa musuh ntah kai pe gia si banci meneken bangsa enda. Saja ngenca selaku bangsa Tuhan si isuruhNa guna mengketi Tanah kanan arus patuh, arus setia ras tetap mengandalken Tuhan adi lang tentuna I hukum.
Arah kata pasu-pasu si arus
ibelasken Harun ras anak-anakna selaku Imam ibas masu-masu bangsa Israel
tuhu-tuhu enda erbahansa tetap ukur bangsa Israel ibas perdalinen I padang
gurun bagepe tentuna kita selaku anak-anak Tuhan ibas mengketi ras ndalani
tahun 2021. Lit 3 hal si itekanken ibas kata pasu-pasu e.
1) “TUHAN memberkati engkau dan melindungi engkau”. Ibas
sada sisi Dibata menyediaken kerina simehuli nandangi bangsana, nandangi kita
pe selaku kalak si enggo ipilihNa sabab kata “Tuhan Memberkati engau”, berarti
Dibata me ulu ntah sumber Pasu-pasu kerina simehuli bagi temata ibas Kebaktin
Tahun Baru enda “Tuhan Ulu Pasu-pasu”;
sisi sideban Dibata pe “melindungi” ntah pe engkawali kita. Ibas cakap
Ibrani melindungi eme SHAMAR. Janah erti harafiahna labo kepe hanya sekedar
melindungi tapi pe ijagai, iperhatiken, iasuhi, ipeduliken ras irawat Dibata
kita selaku bangsana. Luar biasa pasu-pasu Dibata e.
2) “Tuhan menyinari engkau dan memberi engkau kasih
karunia”. Bagin si peduaken pasu-pasu e eme sura-sura Tuhan gelah bangsaNa ula nai
lit ibas kesuramen ntah kegelapen. Sabab enggeluh ibas gelap berarti lit ije aru
ate, la lit pengarapen, mbiar, putus asa ras sidebanna, sebalikna adi lit
terang sinerangi enggo pasti ije lit keriahen, ukur erlayas, lit pengarapen ras
sidebanna. Desken sinuan-sinuan memerluken sinar matawari gelah banci turah ras
erbuah mehuli, bagem pe kita selaku anak-anak Tuhan. Kita hanya banci bertumbuh
ras erbuah secara rohani adi kita isinari Tuhan. Tambah si e iberekenNa pe perkuah
ateNa/kasih karunia man bangsana ras man banta pe kerina. Ibas cakap aslina
Ibrani kata DIBERI KASIH KARUNIA eme KHAWNAN erti secara harafiah labo ka kepe sekedar
diberi kasih karunia tapi pe termasuk disayangi/ikelengi, iselamatken ras ibere
penampat ntah bantuan.
3) “Tuhan menghadapkan wajahNya kepadamu dan memberi engkau damai sejahtera. DIBERI DAMAI SEJAHTERA ibas cakap Ibranina eme SHALOM. Erti harafiahna labo ka kepe hanya sekedar Dame, Sejahtera tapi pe mencakup Ketenangen, Kepuasen, Kecukupen, Keselamaten ras Sukacita.
Perpulungen si nikelengi Tuhan, adi isuruh kita milih pasu-pasu ibas si telu hal enda, apai nge sipilih?. Perlindungan, Kasih Karunia ntah Damai sejahtera? Puji Tuhan la kepe kita perlu milih salah sada sebab pasu-pasu enggo isikapkenNa man bangsana, man anak-anak Tuhan, man banta kerina. Pasu-pasuna e tuhu-tuhu komplit, kuh ntah pe sempurna. Jadi la nai lit alasenta mbiar ntah erugapa ndia ibas ndalani kegeluhenta ibas tahun 2021 enda. Payo perbeben tetap ngenda lit bahken banci jadi reh beratna pe terlebih akibat pandemic covid 19 si lenga siteh digan erkedungen. Tapi sekali nari Dibata si mengijinken, Dibata sinuruh kita mengketi ras ndalani kegeluhenta ibas tahun 2021 enda enggo isikapkenna pe man banta pasu-pasuNa. Sipenting man banta eme jadilah kita bangsa Tuhan, anak-anak Tuhan si patuh ras si tutus ndarami Kinirajan Dibata ras ngelakoken singena ateNa gelah pemasu-masun e jadi sekerajangenta bagi isingetken pe ibas Matius 6:33.
Tambah si e, lit pe sada cerita ija sekalak anak si mbersihken ras pesikap kamarna. Istilah genduari erbahan perubahen suasana kamar. Kernca dung ibersihkenna, atena pe mindahken meja belajarna ras lemari pakenna. Curcur panasna ibas ngerjakensa. Meja belajar enggo ipindahkenna tapi lemari lenga sabab la ia ngasup geserkenca. Reh me bapana, “uga enggo dung ibersihkenndu kamarndu e?” Enggo pa, idahndu enggo curcur pe panasku, saja lemari ingan pakenku lenga ipindahken sabab la aku ngasup gesersa, enggo ndai ku pala-palai alu pekeri gegeh tapi tetap lenga banci, nina anak e. Payo nge enggo ipekerindu gegehndu?, nina bapana. Enggo pa, idahndu enggo curcur kal panasku. Lenga, kam lenga pedaratndu kerina gegeh ras usahandu, nina bapana. Sabab enggo kin pindondu penampat man bangku, bapandu guna nampati kam mindahken lemarindu e, me lenga? Emaka mari ras kita mindahken lemarindu e.
Arah cerita enda ngingetken kita maka ibas kerina hal keadanta, rencanata, pendahinta, masa depanta lit kap bapanta, lit kap sahabatta (Yesus kristus) si katawari pe nemani, menghubur, memotivasi ras nggit nampati kegeluhenta. Saja ngenca silibatkenlah Ia ibas kerinana. Pasti tahun enda pe banci ka sibentasi alu mehuli.
Selamat Tahun Baru man banta kerina. Amin
Pdt. Sabar S. Brahmana
0 komentar:
Post a Comment