Khotbah - Renungan Kebaktian Nutup Tahun Tgl. 31 Desember 2020; Nats: 1 Petrus 1:22-25

KHOTBAH NUTUP TAHUN 2020

 

Invocatio     :

Dage lit telu si tetap arus idalanken, e me: erkiniteken man Tuhan, erpengarapen man Dibata, erkeleng ate man kalak si deban, janah si pentingna i bas si telu e, e me engkelengi kalak si deban (1 Korinti 13:13).

O g e n: Mazmur 119:89-96; Khotbah:1 Petrus 1:22-25

Thema:

(Kata Dibata) Nggeluh Dingen Tahan Rasa Lalap

 

Renungen …

Puji Tuhan, kita enggo she ibas ujung tahun 2020. Piga-piga jam nari bengket me kita ku tahun 2021.

Arah kata Dibata si jadi khotbah ibas kebaktin Nutup tahun enda, si lang-langna lit 4 hal isingetken man banta jadi evaluasi man banta sekalak-sekalak sekaligus tekad ibas mengketi tahun 2021.

Sipemena, kerina kalak si ngikutken pengajaren si tuhu-tuhu berarti enggo membersihken dirina. Adi sioge mulai ayat 1 nari ibas 1 Petrus pasal 1, jelas itekanken maka pengajaren situhu-tuhu e batang belinna eme keselamaten ibas Yesus Kristus. Janah tandana enggo bersih eme lit keleng ate situhu-tuhu nandangi temanna sisada kiniteken (bd. Pe Invocatio 1 Korinti 13:13, maka sipentingna ibas kegeluhen kalak si erkiniteken ras erpenarapen eme erkeleng ate man kalak sideban).

Sipeduaken, arah kita enggo ngaloken Kata Dibata si nggeluh dingen tetap rasa lalap e kita enggo tubuh jadi manusia si mbaru si labo tubuh arah manusia tapi ibas Bapa si rasa lalap nari.  Jadi Kata Dibata e erkuasa merubah ise saja si ngalokensa jadi manusia si mbaru. Ngerana terdauhen kerna Kata Dibata e erpalasken Yohanes 1:1, 14 maka Kata e eme Dibata si enggo jadi manusia ibas Yesus Kristus.

Sipeteluken, kerina manusia desken dukut, bagepe kerina kemulian manusia desken rudang dukut ertina la kekal, bahken la ndekah pe ia enggeluh uga gia belinna kemulianna (erta, jabaten, ras sidebanna).

Sipeempatken, tapi la bege Kata Tuhan, Kata e tetap she rasa lalap alu kata sideban kekal. Enda me si enggo isehken Injil (Berita Si Mehuli). Jadi alu lit keterangen Injil berarti tole menekanken maka Kata Tuhan ntah Kata Dibata e eme Yesus Kristus sendiri. Bagi ndain enggo isingetken.

Dage arah kata Dibata enda, mpersingeti kite kerina ibas kita ngujungi tahun 2020 ras mengketi tahun 2021.

1)   Payo nge kita ibas paksa enda tuhu-tuhu kalak enggo si bersih? Indikatorna eme lit ibas pusuhta keleng ate situhu-tuhu nandangi teman si sada kiniteken? Ertina ibas paksa enda la nai lit rasa kekece, elem-elem, sakit hati, ras sidebanna, sebalikna lit perasan mekuah, bagepe nggit berkorban guna sisampat-sampaten. Mari si nen she ku bas pusuhta.

2)   Tetap lah si inget maka kita enda desken dukut ras bunga dukut ngenca kap. Ertina kegeluhenta enda labo kekal bagepe kemulianta erkiteken mbue ertata, mbue kalak-kalak hebat keluargata, meganjang pangkatta, ras sidebanna, labo kekal, adi kita enggo mate tading nge kerina e.

3)    Adi si kekal ntah si tetap she rasa lalap eme Kata Tuhan, emaka elah jadi perioritasta ibas ngujungi kegeluhenta ibas tahun 2020 enda bagepe ibas mengketi tahun 2021. Payo lenga kal si iteh uga pagi kegeluhenta ibas tahun 2021 apakah reh miningkatna ekonominta ntah lang, sehat ras mejuah-juah ntah lang, mbue perbeben ntah lang, ras sidebanna. Janah kuakap la padah bagessa kal si ukuri, disamping labo ndungi, rebansa melimber nge  siakap, jenari piah turah ka pinakit. Sipenting bagi isingetken arah pengogen Mazmur 119:89-96, khususna ayat 93 “asa digan pe la kupersilahang PerentahNdu, sebab arah PerentahNdu eme aku ipegeluhNdu”. Enda me tekat pemasmur, janah mari sijadiken tekadta pe ibas mengketi tahun si mbaru, tahun 2021. Sabab ibas ayat e labo saja icidahken tekat pemasmur tapi pe pemahamen pemasmur maka  adi ia nggeluh rikutken perentah Tuhan (tidak mengabaikan perintah Tuhan) maka la saja ibas kegeluhen si singkat enda icukupi Dibata kai siperlu man banta (bd. Matius 6:33) tapi pe si paling penting eme kegeluhen si rasa-lalap enggo isikapkenNa man banta si la mengabaikan Perentah Tuhan. Amin.

Pdt. S. Brahmana

 

Artikel lain yang terkait: