Sermon: Khotbah Kisah Rasul 12:1-5, Bimbingen Pekan Doa wari IV (empat) tahun 2010

Introitus: Roma 1 : 9; Ogen: Filipi 1 : 3 – 11
Khotbah: Kisah Rasul12 : 1 – 5

Thema:

Perpulungen si Ertoto

Kata Perlebe
Mbaru-mbaru enda, tepatna Minggu 12 September 2010 si lewat, i Ciketing lit terjadi sada peristiwa ija lit sierdahin i tengah-tengah gereja (baca : HKBP Pondok Timur – Ciketing – Bekasi Timur) ndatken penganiayaan ija ia itebak “kalak”. Kerina enda merupaken “buntut” ibas kasus si berkembang kerna keberadaan Gereja HKBP i daerah e. Janah adi isungkun ntah pe itelusuri arah Media Massa kerina tempa ncidahken maka labo lit pihak tertentu ntah golongen tertentu si ertanggung jabab kerna kasus enda. Kerina tempa cuci tangan, bageka pe rah wawancara si lit ibas Media Elektronik, encidahken maka tempa labo lit masalah kerna kiniliten gereja i tengah-tengah wilayah Jabodetabek khususna bage pe Indonesia umumna. Tapi kita nggo me radu ras nggejabken kai si terjadi gundari enda. Tapi si terpenting, uga hubungenta antara kita kerina perpulungen, pertua-diaken, bage pe Pendeta. Enda me si akap kami perlu si perdiateken.

Pendalamen Nats
a. Introitus
Perpulungen Roma eme sada perpulungen si tuhu-tuhu erbahanca malem ate Paulus janah erdan-danken si e lit sura-surana lako banci reh ku Roma guna tole nehken pengajaren kerna Berita si Meriah. Kemalemem ate e turah erdandanken berita si ialokenna kerna kiniteken perpulungen e tuhu-tuhu mehuli. Isaksikenna pe tole kerna kai si ikatakenna e labo gelah enggo mujiken perpulungen e saja ngenca. Tapi pe si ibelaskenna e ncidahken sada gambaren kiniteken si tuhu-tuhu mbelin ka ibas dirina kerna uga ka ia erpenalemen nandangi Dibata. Bage ka pe icidahkenna ka kerna kai tujunna ibas kegeluhenna, eme uga maka berita kerna Yesus banci ialoken kerina manusia.

b. Ogen
Adi si oge kata penaruh ibas Pustaka si Badia kerna surat enda teridah maka enda me perpulungen si pemena ipanteki Paulus ibas pendahinna guna mpeseh berita kerna Yesus si jadi Penebus manusia. Paulus nehken keriahenna ukurna nginget uga kiniersadanna ras perpulungen e tupung ia ras i Filipi. Kai saja penampat si aloken paulus ibas ia ndahiken dahinna. Tapi terdauhen si teridah eme labo kerna penampat perpulungen e, tapi kerna kai si isurakenna banci ialoken kalak Filipi. Janah perpulungen e ngaloken Yesus sebage Juru Selamatna. Paulus pe nuriken pengarapen si mbelin kerna perpulungen e; teridah arah si isuratkenna (ay. 9-11). Labo terjeng kai si perlu ilakoken perpulungen e ibas paksa e, tapi pe lit pengarapen eskatologis si icidahkenna. Nggeluh mehuli ras benar i lebe-lebe Dibata eme jadi perayaken guna ndatken kinihagan ibas Dibata nari. Paulus pe mpegegehi kiniteken perpulungen kerna uga erpengarapen ras erpengendes nandangi kekelengen Yesus, seh gelah sura-sura lako muji dingen pegahagen Dibaha tersehi.

c. Khotbah
Bagin enda nuriken kecibal perpulungen si ndatken erbage-bage kiniseran. Kiniseran labo saja rehna ibas pemerintah (icidahken uga Herodes munuh Jakup, bage ka pe nangkap Petrus), tapi pe rehna ibas kalak Jahudi nari (Ay. 1-3). Janah banci igambarken maka kiniseran e tentu saja sura-surana eme mpeturah kebiaren perpulungen nandangi pemerintah bage pe nandangi kelompok Jahudi. Bentuk-bentuk kekerasen e selain kerna kai si isuratken enda tentu seh kange ku masalah kebebasen erkiniteken rikutken si idalanken perpulungen. Tapi labo e si jadi hal si perlu ndatken perhatian si penting; si perlu ndatken perhatian penting eme uga sikap perpulungen ibas ngalaken situasi e. Perpulungen memang ndatken tekanen ras kiniseran si mesangat, bage ka pe kalak si meritaken Berita si Meriah, termasuk Rasul Petrus. Tapi aminna situasi e la mengintungken perpulungen, labo erbahanca surut kiniteken perpulungen ibas erkiniteken bage pe erpengendes man Dibata. Icidahken uga perpulungen tetap encidahken ketutusenna ertoto kerna kai si sangana terjadi khususna kerna Petrus si sangana lit ibas penjara. Janah enda encidahken uga hubungen si cukup megegeh antara perpulungen ras Petrus.

Pointer Aplikasi
1. Secara Intern: Ngidah situasi kegeluhen perpulungenta maka langa denga banci ikataken maka kita kerina, baik antar perpulungen ras perpulungen, perpulungen ras Serayan Tuhan, bage pe Serayan Tuhan ras sapih-sapih ia terjadi bagi gambaren si isuratken ibas teluna bagin ogenta enda (Introitus, Ogen bage pe Khotbah). Enda si tuhuna jadi tantangen si mbelin man banta guna nggar-garisa kai nge si erbahanca maka terjadi si bage rupana i tengah-tengah perpulungenta. Sura-sura Dibata tentu labo bage; banci ibandingken ras tujunta si lit ibas Pustaka si Badia eme majekken Kula ni Kristus. (bd. 1Korinti 12 : 12 – 28).

2. Secara Ekstern: Umumna kita (oge : Kalak Kristen) ngaloken erbage-bage bentuk tekanen baik secara fisik bage pe psikis. Secara fisik teridah arah serana kita ndatken ijin guna majekken rumah pertoton. Secara psikis pe teridah maka lit nge tekanen bage pe diskriminasi kerna hak (contohna ibas senina turangta si jadi PNS). Adi si enda la pe si gar-gari enggo me si eteh kai si jadi penyebabna.

3. Arah gambaren ibas ogenta bage pe situasi si lit baik secara intern bage pe ekstern tuhu-tuhu gegeh pertoton ras mbangun kiniersadan jadi sada perayaken si lanai banci itawar. Guna si enda nggo me banci ibangun “jaringan doa” i tengah kegeluhen perpulungen guna nambahi pertoton-pertoton si enggo ibangun secara pribadi. Perayaken lako ngutamaken kepentingen Dibata ibas perpulungen enggo me perlu ijadiken palas si labo sekedar semboyan.

4. Sikap nggeluh maka kita labo banci nggeluh si sada, perlu nge kita teman, enda tetap njadiken kita sitedehen ibas mbangun Kula ni Kristus.

Pdt.BRC Munte
GBKP Runggun Harapan Indah; HP: 0813 611 31151
-----------------------------------------

Pengganti diskusi ilakoken “Saling mendoakan” (Iban Moderamen)

1. Kerina si pulung ibagi bas 2-3 kelompok, banci lebih; si dilaki ras si dilaki, si diberu ras si diberu, rikutken situasina.
2. Tiap anggota kelompok nuriken si man totonken bas ia, e me perbeben si ihadapina.
3. Kenca enggo pulung kerina masalah/ perbeben, ibahan “doa berantai”, notoken teman sebelahna, bage pe seterusna.
4. Atur waktu bas kelompok gelah 20-30 menit enggo dung.

Artikel lain yang terkait: