Khotbah Efesus 4:12-16, Pekan Keluarga Wari I (Minggu, 5 Juni 2011)

Bagi sada kula melala ringring, bage me Kridtus e. Amin gia melala ringring e sada kula nge (1 Korinti 12:12).

Ogen: 1 Korinti 12: 20-27; Khotbah : Epesus 4:12-16

Tema:

Jabu singgeluh bagi Kula ni Kristus (Tema: mbelin Pekan Keluarganta)

Kata Perlebe

Tema Jabu singgeluh bagi kula ni Kristus banci jadi adi anggota jabu e sada ibas Kesah (Roh), sada ibas pertendin (rohani ibas tubuh peduakaliken=jera) ibas ulih jera (tobat) enggo sikerajangen Kristus. Anggota jabu e enggo sikerajangen Kristus ertina kai nina simada (sura-sura) eme sinilakokenna. Cataten: jabu-jabu e nentuken megegehna sektor, PJJ, gereja, ras negara.

Pembahasen nats Efesus 4:12-16

Sipememna, Kristus simereken kasih karunia (kengasupen si khusus ay. 7).

Tujun Kristus mereken kasih karunia (kengasupen khusus eme: ipetangkas ibas ay.12 eme memperlengkapi (anak-anak Dibata) gelah sikap ndahiken dahin pelayanen majekken kula ni Kristus (pembangunen tubuh Krsitus). Kengasupen si khusus arus ifungsiken alu payo, gelah kula e banci sehat entah pe erguna man sada ras sidebanna. Ibas jabu: Bapa, kuga bapa rikutken Pustaka Sibadia, Nande kuga nande rikutken Pustaka Sibadia, anak –anak, kuga ka anak-anak rikutken Pustaka Sibadia.

Sipeduaken,ay.13.Kiniersadan Kiniteken. Kiniersadaan kiniteken banci jadi adi jabu e :

1. Alu ngaloken ajaren ibas rasul, nabi, perberita simehuli, simpermakani perpulungen, ras guru-guru (ay. 11). Ibas jaman genduari kiniersadan kiniteken ibas jabu enggo bagi si sulit ndalankenca. Contoh: anak-anak ku aliren sideban atena, nande bapa pe la tetep inganna ndatken pembinaan kiniteken (kujah-kuje), kedungenna lanai seimbang keniteken ibas jabu e, sada lebih hebat akapna bana, arah pekitik sideban. Perlu itetapken ku ja kin kita sada iabu ibas bina kinitekennta, alu tujun gelah seimbang kiniteken keluarga eme kiniteken teridah perbahanen si ngena ate Tuhan.
2. Perkembangen kiniersadan kiniteken pe teridah arah eme nuriken situhu-tuhu alu dem keleng ate, reh belinna kita jenari seh ku tingkat kesempurnaan Kristus (ay.15). Nuriken situhu-tuhu alu dem keleng ate eme alu aktif, labo sitima-timan. Persoalen silit idungi alau palas kesetian ras kepatuhen man Kristus ras kataNa band. Efesus 5: 25 (ulanai erbual), 26 (adi merawa kam ola seh erdosa. Janah ula simpan rawandu seh ben wari, 27 (ula bereken kesempaten man iblis), 28 (kalak sigel-gel nari nangko, ulanai ia nangko, 29 (adi ngerana kam ula belasken cakap si la turi-turin), 30 (ula ceda ate Kesah Sibadia ibahanndu), 31 (Tadingkenlah cian ate, perampus ras pernembeh, . ulanai kam si isak-isaken, ntah si cekurak-sekuraken. Ulai sitik pe elem-elem), 32(tapi melias dingen mesayanglah sapih-sapih kam. Si alem-alemenlah bagi Dibata nggo ngalemi kam i bas Kristus (kegeluhen si mbaru ibas Kristus).

Sipeteluken, lanai bali ras anak-anak ay. 14

1. Kalak si dewasa kiniteken eme labo bagi anak-anak simurah ipengaruhi, murah la tetap kinitekenna, murah tertipu alu ajren-ajaren palsu si licik. Kalak tetap bagi anak-anak kune ibas ndalanken Kata Dibata, la seh kubas pengertian sipayo kerna Pustaka Sibadia (band. Ay. 14-15).
2. Jadi dewasa ibas kiniteken eme njemak kebenaren ibas keleng ate, iberitaken ibas keleng ate ras ipertahenken ibas keleng ate. Alu bage keleng ate Kristus me jadi usihen ibas kerina dampar kegeluhen.

Pengenaan/Aplikasi:

1. Jabu si nggeluh bagi kula ni Kristus; krina anggota jabu (Bapa, Nande ras Anak-anak) arus nggeluh rikutken Kata Dibata; Pedah Sepuluh (keluaren 20:1-17), Engkelengi Tuhan Dibata ras manusia ( Matius 22:37-42), hubungen dehara ras perbulangen (Epesus 5:21-33), Hubungen simehuli ibas anggota jabu (Epesus 6:1-4), nggeluh simbaru (Epesus 4:25-32).
2. Jabu si nggeluh bagi kula ni Kristus; kerina kebutuhen keluarga tercukupi. Kebutuhen guna iergai, kebutuhen guna ibegiken, kebutuhen guna ialemi, kebutuhen guna iperdiateken, kebutuhen guna ikelengi, kebutuhen kesabaren, kebutuhen keriahen ras kemalemen ate (kai atendu ibahan kalak man mbandu bahan man kalak sideban (Matius 7:12)), kebutuhen waktu man anggota keluarga. Kune reh buena kebutuhen-kebutuhen enda tercukupi maka keluarga e maka kesehaten jabu reh sehatnna.
3. Jabu si ngeluh bagi kula ni Kristus labo idat bage bage saja tapi jabu e arus mereken jabuna i kuasai alu kuasa Kesah Sibadia. Jabu si ikuasai Kesah Sibadia ibas jabu e lit ibassa ulih Kesah Sibadia (Galatia 5:22-23). Penggejapan maka jabu e sikerajangen Kristus reh tambah-tambahna, perukuren secara manusia enggo ibunuhna i kayu persilang rikut ras kerincuhen dagingna bage pe sura-surana. Lagu langkahna e rikutken peraten Kesah Sibadia (Galatia 5:24-26).

Cileungsi, 17 Mei 2011

oleh: Pdt. Rasmidi Sembiring STh.

Artikel lain yang terkait: