Khotbah Yohanes 7:37-38, Minggu 5 Juni 2011 (Exaudi=Dengarlah)

Introitus:
“Aku tetap negu-negu kam dingen mesuri kam alu si mehuli. Kubahan kam tetap megegeh ras mejuah-juah. Kam desken peken si la kurang lau, desken sumbul lau si la pernah kerah” (Yesaya 58:11).

Ogen :Efesus 3:14-2; Khotbah : Yohanes 7:37-38

Thema:
Kalak Simuas reh ku Tuhan, Ibesurina me

Renungen
Ibas Kalak yahudi lit 3 perayan mbelin. Eme: Paskah, Pentakosta ras wari raya sapo-sapo. Perayan Paskah kalak Yahudi eme perayan guna nginget uga Tuhan mulahi bangsa Israel ibas perbudakn kalak Mesir. Paskah enda irayaken sada Minggu dekahna (Keluaren 12:23-25). Wari raya Pentakosta eme wari ngerayaken panen gandum. Wari raya enda irayaken 7 minggu kenca wari Paskah, emaka wari raya enda biasa ikataken pe wari raya 7 MingguPerayan enda guna ngingetken uga Dibata enggo mulahi bangsa Israel I negeri Mesir nari ras nikapken taneh si banci njamin kegeluhen bangsa enda (Ulangen 16:9-12). Perayan wari raya Sapo-Sapo eme perayan guna nginget kegeluhen bangsa Israel sanga ibas perdalanen ndube I gurun pasir sedekah 40 tahun ope mengketi taneh Kanan (Imamat 23:33-43). Wari raya Sapo-sapo enda irayaken 1 Minggu dekahna.

Enda isingetken sehubungen ras kontek kata Dibata siman oratenta sendah. Wari pengkeri-kerin kerja e, ayat 37, maksudna eme puncak perayan wari raya Sapo-sapo. Berarti wari si pepituken. Sedekah pitu wari e, setiap wari lit sekelompok imam lawes ku kolam Siloam muat lau guna ibaba mulihi ku Rumah Pertoton. Bisana nterem jelma ngikuti imam enda. Mungkin ikolam siloam enda ntah ingan sideban tengah dalan siibentasi imam e waktu mulihken ku Rumah Pertoton, Yesus tedis ras ngerana alu sora megang kerna “lau”. Nina ibas ayat 37b “Ise muas rehlah ku Aku gelah ia minem”.

Tentu singget jelma sinterem e, sabab Yesus mengidentikken dirina ras lau. Bagi lau she kal pentingna man manusia, bagem Yesus memposisiken dirina nandangi manusia she kal pentingna.

Menurut buku sipernah ku oge, 80% tubuh manusia terdiri dari air. Otak dan darah adalah dua organ penting yang memiliki kadar air di atas 80%. Otak memiliki komponen air sebanyak 90%, sementara darah memiliki komponen air 95%. Emaka secara normal sisitikna 2 liter lau (8 gelas) siperluken sada wari. Adi kalak pengisap harus itambah setengahna ka. Guna lau e, eme mengganti cairan sindarat arah air seni, keringat, pernapasen, ras sekresi. Emaka adi ateta sehat, bagi ianjurken dokter gelah sikonsumsi lau 8-10 gelas sada wari gelah alu bage metabolisme kulata mehuli ras normal.

Uga adi kurang lau? Kekurangen lau ibas kulanta bahaya nandangi dareh. Darehta jadi kental, akibatna perdalinen dareh selaku alat transportasi oksigen ras zat-zat makanen banci tergangu.

Darah si kental e melewati ginjal siberfungsi selaku filter ntah alat menyaring racun si lit ibas dareh. Adi akapndu dareh e kental sementara saringen ginjal e she kal halusna, maka enggo pasti ginjal e erdahin alu ektra keras, emaka labo la mungkin ginjal e jadi ceda ras kedungenna arus cuci dareh (ibas bahasa medisna hemodialisis).

Bagepe alu kentalna dareh, perdalinen dareh ku otak terganggu, padahah sel-sel otak paling boros mengkonsumsi pangan ras oksigen si ibaba dareh. Alu bage sel-sel otak la erdalin alu optimal ras banci erbahansa pedas mate. Konsisi sibage banci erbahansa timbulna stroke.

Alu penjelasen enda, labo kebetulen Yesus mengidentikken diriNa ras lau si sehkal pentingna e. Tapi Yesus memang meteh, sabab Ia me sierbahansa sinasa lit, fungsi ras pentingna lau. Bagem ate Yesus mpersingeti jelma paksa e, bagepe kita wari enda, gelah reh ku Yesus ras tek man baNa. Kalak sitek man Yesus berarti ngaloken Yesus jadi Tuhan ras Juruslamatna ibas kalak e erburak-burak lau simereken kegeluhen. Adi siterusken ngoge ayat 39, tek man Yesus berarti pe ngaloken Kesah Sibadia. Fungsi Kesah Sibadia eme nampati manusia nggeluh bagi sura-sura Dibata (bd.Pengogenta). Janah kalak singgeluh sue ras sura-sura Dibata, bagi si isingetken ibas Yesaya 58:11, introitusta, nina Dibata “Aku tetap negu-negu kam dingen mesuri kam alu si mehuli. Kubahan kam tetap megegeh ras mejuah-juah. Kam desken peken si la kurang lau, desken sumbul lau si la pernah kerah”. Alu bage dage, ibas doni enda pe kita ipasu-pasuna alu mereken kai simehuli ras terlebih ibas paksana she sifatta sialoken me kegeluhen si rasa-lalap.

Bagi erti Exaudi (dengarlah/begiken), bagem begikenlah kata Dibata enda, bagi kulanta enda perlu usur lau, bagem pe kita perlu Kesah Sibadia guna nampati kita nggeluh sue ras singena ate Dibata. Uga maka manci sialoken kesah Sibadia? Tek man Yesus, mesikel usur pulung muji-muji Dibata ras ngorati kataNa, ertoto ras ngorati katana pe secara pribadi. Amin.

Jatiwaringin-Pondok Gede, 4 Juni 2011
Pdt.S.Brahmana

Artikel lain yang terkait: