Khotbah 2 Samuel 7:25-29, Khotbah Pekan Dia wari I (Minggu, 25 September 2011)

Introitus :

”Bagenda me jadina ibas tahun ku tahun adi lawes kenca ia kerina ku rumah TUHAN, la banci lang seh naring cedana ukur Hana ibahan Penina, seh ma- ka tangis ia janah la nggit man kai pe” ( I Samuel 1 : 7)

Ogen : I Samuel 1 : 10 – 17; Khotbah : 2 Samuel 7 : 25 – 29

Thema :

Ertoto guna meningkatken Spiritualitas seisi Jabu

KATA PENARUH :

Ibas bulan September enda seh ka me paksana kita mengketi Kebaktin Pekan Doa si iaturken itengah-tengah Gerejanta, alu tujun meningkatken Spiritualitas ibas kerina dampar kegeluhenta, eme ibas jabu, keluarga, ibas sektor, ibas kerina ngawan perpulungen, ibas kutanta ija Gerejanta enggo pajek, ibas kerina tingkaten pemimpin Gerejanta bagepe ertoto guna Pemimpin Bangsa ras Negaranta.

Ibas wari/berngi si pemena enda kita ibabai kubas perenungen kerna: ” Peningkaten Spiritualitas ibas seisi Jabu” Gelah alu bage seisi jabu ngasup ngalaken kerina perbeben/tantangen-tantangen geluh, suka ras duka, sibagi ukur ras si labagi ukur jabu e tetap paguh erkiteken penampat ras pemasu-masun Tuhan ras tetap ngasup jadi saksi Tuhan. Bapa, Nande ( perbulangen ras ndehara) bagepa anak-anak itengah Jabu eme merupaken Keluarga ras keluarga e merupaken lembaga terkecil tapi merupaken ujung tombak terdepan ibas kegeluhen Gereja. Alu bage ”Spiritualitas Jabu” merupaken palas si perlu iperdiateken/iasuhi alu dem perhatian gelah jabu e tetap jadi jabu si ngasup ersaksi.

URAIAN NATS :

Ayat Introitus ras Ogen nuriken perbeben si mberat itengah-tengah jabu Elkana ikuta Rama idaerah pegunungan Epraim. Ndehara Elkana lit dua eme Hanna ras Penina, Hanna lalit anakna tapi Penina lit anakna. Ibas jabu e terjadi konflik antara ndeharana seba usur isakiti ras isaling-saling si Penina si Hanna erkiteken lalit anakna. Sue ras kesemalen keluarga Elkana eme lawes ku Silo guna ersembah man Tuhan, ijeme ibaba si Hanna kerina baban geluhna, ertotoia guna ngendesken kerina perbeben geluhna janahna tangis Dungna ngerana Imam Eli man bana nina : ” Mulihlah alu dame, ibere Dibata Israellah man bandu kai siipindo kam” Kenca e mulih Hanna lanai atena ceda sebab enggo dat ia gegeh ras pengarapen sebagai jawaben Tuhan atas pertotonna.

Bahan Khotbahta ibas 2 Samuel 7 : 25 – 29 eme kerna pertoton Raja Daud ibas Kemah Perjumpan ( eme ingan ersembah/ertoto ibas zaman e ) Arah isi pertoton Raja Daud teridah uga Daud nggó nggejapken (lit pengalamen Iman) maka Tuhan nge si nggo ndilo ia ras nampati Bangsana ibas tan musuh-musuhna nari. Bagepe Raja Daud mindo gelah Tuhan si tetap nepati janjiNa guna masa depan kesusurenna, gelah Tuhan tetap jadi pelindung bas geluhna. “Kupindo man baNdu, passu-pasumin kesusurenku, gelah lalap inanamina kiniuliNdu. Kam Tuhan si erdolat negó erjanji kerna si enda e maka tadinglah rasa lalap pasu-pasuNdu ibabo kesusurenku” ( 2 Sam. 7: 29 )

Raja Daud nggejapken maka ibas Tuhan nge kunci keberhasilen keluargaana bahkan keberehasilen kesusurenna emana ku Tuhan ia erpengendes kerna masa depan keluargana Ibas perdalinen kegeluhen Raja Daud teridah langadi-ngadi ia iderpa masalah keluarga, sienda terjadi erkiteken kesalahenna sendiri la ia taat man kata Tuhan, ibahanna perbahanen sijahat iakap Tuhan emaka ia ras keluargana kena masalah.( Peristiwa e terjadi kenca ibunuhna si Uria alu sada cara si licik ras ibuatna ndehara si Uria si Betseba ijadikenna jadi ndeharana. Emaka iukum Tuhan ia, mate anakna si kitik denga,berikutna terjadi peristiwa si la bagi ukur; Amnon mperkosa turangna Tamar, Absalom balas dendam ibunuhna seninana Amnon, Absalom berontak ( kudeta) man bapana Raja Daud ras Daud kiam menyelamatkan diri, dungna Absalom talu ras mate ibunuh puanglimana Joab. Baageme perbeben keluarga Daud , tapi kenca ia sadar Tuhan ngalemi salah na, kedungenna aanakna Salomo i lantik jadi raja Israel, gelarrna terberita. Intina ibas ia mengandalken Tuhan, ras mendidik anak jabuna gelah mbiar man Dibata ia terkelin ras Jabuna, tapi adi la ia setia man pedah Dibata ia kebilangen ras isi jabuna pe bermasalah

Pointer Aplikasi :

1. Kegeluhen Pertendin/Spiritualitas jabu perlu iperdiateken, sebab Jabu eme ujung tombak terdepan dari pelayanan Gereja
2. Erbage-bage tantangen nandangi kegeluhen jabu (contoh bagi si Hanna ras Penina,bagepe keluarga Raja Daud ) tapi ibas kita erkemalangen ras erpengendes man Tuhan ije dat kita dalan pulah ibas perbeben jabu
3. Gelah banci Spiritualitas Jabu meningkat butuh Jabu si Harmonis, masing-masing isi jabu (Bapa, nande, anak) meteh peran ras tanggung jawab masing-masing, menghidupkan rasa Cinta satu dengan yang lain, lit kepedulian erpalasken kekelengana antara sada ras sidebanana
4. Hindari sifat Otoritas ibas Jabu, ciptaken dialog terbuka, lit komunikasi si mehuli antara suami istri, orang tua ras anak, sebab; “Keluarga/rumah tangga adalah tempat pelarian yang wajar dari segala kesulitan hidup di dunia” (A.Augustinus)
5. Andalken Tuhan arah pertoton ibas erbage-bage perbeben nggeluh, aturken saat teduh ibas jabu, ras iarapken isi jabu banci kerina berperan muat bagin ibas Pertoton
6. Pasu-pasu Tuhan man isi Jabu nina :’Sangap kal kalak si malang man Tuhan, si nggeluh ngikutken kerina perentahna. Ipanna me ulihna latih, sangap nggeluh mehuli si kerajangenna ( Masmur 128 : 1 – 2 )

Pdt.Esra Bukit

0812 9023 726

Artikel lain yang terkait: