Khotbah Perbahan Rasul 815-17, Pekan Doa Wari V (Kamis, 29 September 2011)

Introitus :

Ertotolah guna keperlun kota e sabap adi sikap ia kam pe ikut sikap (Yeremia 29 : 7b).

Bacaan : Yeremia 29 : 4 - 11 Khotbah : Perbahanen Rasul-Rasul 8 : 15 - 17

Thema :

Ertoto guna meningkatken spiritualitas isi kuta ija GBKP enggo ipajekken.

Kata Perlebe

Adi si perdiateken kerna kecibal gerejanta GBKP seh paksa gundari maka banci si kataken enggo seh kal belangna ingan si isiarina (Pulau Sumatera, Pulau Kaliman, Pulau Jawa – Bali seh ku Pulau Sulawesi; mulai taneh Aceh – ku Makasar). Janah ibas si e lit sekitar 800 ingan perminggun. Tuhu-tuhu luar biasa ngidah kecibalna. Tapi, si jadi penungkunen eme: uga GBKP ibas kerina ingan si iianina (tentu ras perpulungenna) enggo lit nanamna kinilitenta i tengah-tengah ingan e. Janah pernah nge kita bas gerejanta notoken kai si sangana berkembang i serkelewet inganta e. Tentu ninta, pasti nggo si totoken. Tapi lalah gelah enggo so totoken saja gelah lit topic si man totonken…. Enda si jadi perenungenta ibas wari enda kita ngelakoken Pekan Doa.

Introitus, Ogen ras Khotbah Introitus ras Ogen ncidahken maka Tuhan ersura-sura makeken bangsaNa gelah tuhu-tuhu ncidahken kininggiten lako erbahan si mehuli nandangi kegeluhenna bage pe nandangi ingan ija Tuhan namaken (mbuangken) bangsa e. Peraten Tuhan ncidahken maka ibas Ia mbuangken bangsaNa e gelah kalak si ringan ibas taneh e banci ngidah kiniulin si ilakoken bangsa e. Janah bagin si deban eme uga bTuhan mpersingeti maka bangsaNa e arus metenget nandangi kai si lit I sekelewetna gelah ula kari bengsaNa e celus. Ibas bagin Khotbah, ncidahken kerna perdalanen ras pendahin Petrus ras Yohanes. Teridah bas ogenta enda maka lit perbahanen si mbelin si ilakoken kalak e nandangi kalak Samaria. Enda nuduhken lit pengembangen pemahamen ibas dua rasul enda sebage murid Yesus, ija Yesus pe labo pernah erpilihen ibas nehken kekelengenNa nandangi manusia. Isingetken maka kenca seh ibas ingan si itujuna maka si pemena si ilakokenna eme ertoto ia kerna kalak e gelah tole ndatken kiniulin (Kesah si Badia). Ertina, kai si mehuli si enggo jadi nandangi kalak Samaria e tole itambahi rasul-rasul e gelah reh ulina. Sabab, sope denga rasul-rasul e seh, kiniliten kalak e terjeng tek dingen iperidiken denga tapi langa ngaloken Kesah si Badia. Janah si enda teridah man rasul-rasul, emaka ertoto ia gelah kalak e ngalokenca.

Pointer Aplikasi

1. Thema khotbah Pekan Doa wari pe 5 ken enda eme : Ertoto guna meningkatken spiritualitas isi kuta ija GBKP enggo ipajekken. Enda mbabai pengertin maka kiniliten gereja (oge : GBKP) arusna nambahi kiniulin nandangi jelma si lit i sekelewetna. Emaka gereja pe perlu mgukuri kepentingen kalak si lit ije. Ula kari erdandanken pajek GBKP ije, justru erbahanca ceda kiniteken kalak si deban. Enda tentuna itujuken nandangi kerina anggota gereja si lit ibas GBKP i ingan e.
2. Kiniliten doni enda tentu erbage-bage isina ras erbage-bage ka nge kecibal kegeluhen manusia si lit i babona. Gereja (GBKP) ras perpulungenna arus mediate nandangi kegeluhen si erbage-bage e janah asa bancina ncidahken keteladanen si mabai kegeluhen manusia si lit i sekelewetna e reh ulina. Gereja arus ka nge mbuka dirina labo nandangi kalak si seri ras ia saja tapi pe nandangi kalak si deban.
3. Banci saja labo denga banci mbue si ilakoken gereja nandangi sekelewetna, banci ka pe kiniliten gereja justru mpeturah “kebiaren ntah nembeh ate” kalak si deban. Tapi arah nehken pertoton kerna si terjadi e, e enggo ndalanken kekelengen. Sabab lit ras tek kita maka Tuhan erdiate ras nggit megiken pertoton anak-anakNa janah nehken sura-sura anak-anakNa adi guna kiniulin kegekuhen tinepaNa.

Pdt. Benhard Roy Calvyn Munthe

081361131151

Artikel lain yang terkait: