Suplemen Bimbingen Pjj tanggal 18-24 Mareti 2012, Lukas 7:36-50

Oraten: Lukas 7:36-50
Thema: Lakokenlah singena ate Dibata

Catatan Sermon:

1. Adi siperdiateken Injil Sinopsis (Matius, Markus ras Lukas), ras Yohanes, ibas Injil Lukas ngenca turi-turin enda lit. Anem gia ibas Markus 14:3-9 ras Matius 26:6-13 terdat turi-turin si hampir balin tapi labo seri. Alu bage diberu enda labo Maria Magdalena, bagepe Maria senina Marta.
2. Alasen kalak Farisi (sitergelar Simon) ngundang Yesus la isingetken ijenda. Mbue kemungkinen, saja menurut William Barclay kemungkinen si mbilinna eme Simon enda sekalak “kolektor kemasyauren”. Paksa e Yesus enggo terkenal, emaka alu ngundang Yesus, iarapken Simon enda ia pe reh pupulerna. Argumentasi pendapat enda erpalasken ayat 44b-46, ija Yesus iundang tapi la ialokenna sikap ramah bagi biasana tata cara ngloken tamu[1]. Sikap Simon enda nuduhken ia sekalak si berusaha merendahken Yesus.
3. Diberu e la isingetken ise gelarna, sijelas ia sekalak diberu si nianggap kalak Farisi meluat/pelcur (kalak sierdosa). Tapi siluarbiasa, Yesus lebih membenarken diberu e asangken Simon, kalak Parisi e. Engkai? Sabab perbahanen si isehken diberu e man Yesus. Perbahanen diberu e mungkin menurut Simon la erguna, sea-sea sabab tangis, minaki takal Yesus labo kal penting akap Simon, tapi labage pengidah Yesus, Yesus meteh dorongen kai erbahansa maka bage perbahanen diberu e. Eme dorongen kekelengen. Kekelengen siisehken deberu e la isehken Somon si terpelajar, simeteh kebiasan uga menghormati tamu si niundangna, terlebih tamu e eme Mesias. Emaka nina Yesus dosa diberu e enggo iampuni. Situhuna iampuni labo erkiteken perbahanen diberu e, tapi ise saja reh ndai Yesus, tek man baNa ia iampuni. Saja mengkounter pengakap ras sikap Simon nandangi Yesus, isehken Yesus pernyatan maka dosa diberu e iampuni.
4. Arah kata Dibata enda, isingetken man banta:
   

   (a) Ngena ate Dibata kita adi sisehken keleng ateta man baNa, arah reh ndahi ia (ku gereja), merendahken diri (diberu e tangis ras ngemai nahe Yesus janah ngelapsa tare bukna. Buk lambang kehormaten/mahkota diberu, tapi la iipertahanken diberu e si e. Banci ikataken guna Yesus kai pe ilakokenna).
   

   (b) Mbue pe pemeteh kerna kata Dibata, aturen gereja, aturen kegeluhen labo jaminen maka isehken Dibata keleng ateNa man banta alu ngalemi salah dosanya ras pascu-pasuNa adi labo kita erkeleng ate man BaNa.
   

   (c) Ula anggap enteng ras ise saja. Ilebe-lebe Dibata ukurenna labo pengakap doni tapi ukuren she ija kita ngelakoken singena ate Dibata.
   

   (d) Ibas pustaka sibadia mbue isingetken kai kin singena ate Dibata, tapi kesimpulenna eme ngkelengi Dibata ras teman manusia. Ngkelengi Dibata la bvanci terlepas ras engkelengi manusia, sendalanen maka e payo. Sabab adi ninta kita engkelengi Dibata tapi labo sikelengi temanta manusia e si ras kita, si iidah kita perguak kap kita (Bd.1 Yohanes 4:20), bagepe adi sikelengi manusia labo erkiteken keleng ateta Dibata, kekelengen sibage la megegeh nukah salih motivasina. Janah kekelengen sibage seri ras kekelengen doni enda.

Jatiwaringin-Pondok Gede, 16 Maret 2012
Pdt.S.Btahmana
-------------------------------------------

[1] Biasana sekalak tamu bengket kurumah singundang ia, lit telu hal ilakoken tuan rumah. (1) Tuan rumah namaken tanna ku bara tamu jenari isehkenna ema perdamen (Ciuman perdamaian). Sipeduaken, Erkiteken dalin si idalani dem abu ras biasana hanya make sandal/selop, emaka tuan rumah biasana mereken lau pemurihi nahe; (3) Bagepe tuan umah mercikken minak simerim ku babo takal tamu.

Artikel lain yang terkait: