Khotbah Matius 6:13a, Pekan Doa Wari VI (Jumat, 28 September 2012)

Introitus :
Nina, "Kadeku pe la lit asum aku tubuh nai, mate pe aku la pedah lit kadeku pe. TUHAN nai si merekenca, genduari nggo ka IbuatNa. Terpujilah GelarNa.". Job 1 : 21

Ogen : Job 2 : 1 - 10; Khotbah : Matius 6 : 13a

Thema :
“Ola Min Kami Ibaba Kam Kubas Percubaan, Tapi Olangilah Kami Idur Si Ilat nari.”

Kata Penaruh

Ngerana kerna percuban, rusur kal enda tersinget ibas kegeluhennta. Ninta maka ateta tetap nggeluh ibas kebujuren ntah si mehuli. Tapi erkiteken erbage-bage percuban si reh man banta maka megati ka kal kita ndabuh ntah celus ku bassa. Ngkai maka bage? Ninta ka rusur njababsa: “gelarna pe manusia denga kita”; emaka wajar nge adi ndabuh kita ku bas percuban e. Tapi mari si gar-gari terdauhen, kita nge si langasup, la nggit, ntah si sengajaken kin kita ndabuh kubas percuban e? Si megatina akap kami, labo perban kita la ngasup naluken percuban e, tapi megati ka kin kita pe “merhat” ndabuh ku bas percuban e. Apai ka adi “la idah” ntah “ la ieteh” kalak si deban. Memang lit nge ibas Pustakanta pe ija Tuhan ncubai kita (oge : manusia), tapi tujun Tuhan labo gelah kita ndauh rasSa tapi ngidah terjeng ja kita ngasup njadiken Ia jadi ulu gegeh ras ampang-ampangta. Emaka bas wari enda, mari terdauhen si turihi ngkai maka Tuhan Yesus ngajari kita kubas bagin pertoton enda.

Introitus

Nina, "Kadeku pe la lit asum aku tubuh nai, mate pe aku la pedah lit kadeku pe. TUHAN nai si merekenca, genduari nggo ka IbuatNa. Terpujilah GelarNa." Ungkapen enda rehna ibas Job nari kenca ia ndatken erbage-bage kiniseran si sehkal mesangatna. Lembuna, kaldena, biri-birina, untana bagepe kerina suruh-suruhenna kerinana keri. Janah si debanna eme anak-anakna pe kerina mate (oge ay. 15 – 19). Tapi ibas kesuhsahen sibage mesangatna pe ngasup denga ia erbelas bagi si datas ndai. Tuhu-tuhu kal mbages kiniteken Job enda man Tuhan Dibatana. Sabab ietehna nge maka kai pe labo banci lit ibassa adi la kin bekas pasu-pasu Tuhan. Emaka adi kai si reh ibas Ia nari, adi kin ibuatNa ka maka man Job enda pantas iakapna. Labo lit isalahkenna Tuhan Dibatana kerna kai si jadi man bana e. Adi nulih kita kempak manusia si lit paksa genduari enda : lit denga nge jelma si ngasup bagi Job enda? Entah lanai.

Ogen

Tole kerna turi-turin job isehken man banta ibas bagin pengogen enda. Lit dialog antara Tuhan Dibata ras iblis kerna si Job ija Tuhan sehkal riahna ukurna ngidah kegeluhen Job maka aminna gia “iberekenNa” kesempaten man si iblis lako ncubai ia tapi tetap teridah gtegeh kiniteken Job man Tuhan Dibata. Ngidah si enda, maka si iblis ngataken maka Job pasti nadingken Tuhan adi dirina si ikenai kiniseran (sabab si sebelumna kerina la seh ku dagingna). Memang si enda kin dahin si iblis, maka atena kin erbahanca uga maka kita sirang ras Tuhan. Narasi si teridah encidahken maka Tuhan Dibata mereken “ijin” man iblis lako nehken sura-surana alu catataten la banci ibuat iblis kesah Job.

Job si ndube nggo keri kerina sinasana ibas ia, dungna pe ndatken sada pinakit si sehkal la sikapna ija keri kal daging kulana mulai tapak-tapak nahe seh ku takalna ugahen kerina (ay. 7). La ka terjeng si e, ndehara si arusna mereken penampat ntah tambar, e pe nggo mperimbang ia alu nuruh Job “numpahi Tuhan” jenari ndelis. Uga nari kal me enda kerina? Tapi lang, Job la nalahken ise pe kerna sakitna e, justru isalahkenna ndeharana. Pelajaren si meherga si banci si idah eme : manusia melukah kal ndabuh bagi ndehara Job adi sehkenca man bana si la bagi ukurna. Job ngajarken maka adi erDibata ningen e labo bas paksa kerina isehken Dibata man bana malah ilebihkenNa pe. Tapi erDibata ningen e, eme ngasup nggeluh ibas kerina dampar seh ku si la bagi sura-sura pe.

Khotbah

“Ola Min Kami Ibaba Kam Kubas Percubaan, Tapi Olangilah Kami Idur Si Ilat nari.” Kata enda eme bagin ibas Pertoton si iajarken Yesus kempak ajar-ajarNa. Kata : Ola min kami ibaba kam ku bas percuban ngataken maka lit sada pengendesen si tuhu-tuhu dingen kiniteken si mbages maka Tuhan labo pernah meneken kegeluhen anak-anakNa. Tapi sura-suraNa eme uga maka kegeluhen anak-anakNa banci jadi megegeh dingen ngasup naluken kuasa iblis si kin dahinna lako nirangken manusia ibas kekelengen Tuhan nari. Janah adi jumpa kin manusia e ras “siding iblis”, minter ieteh anak-anakNa maka e labo perbahanen Bapana tapi perbahanen si iblis. Emaka alu “pemeteh” si rehna ibas Tuhan nari e, manusia ntah anak-anakNa ngidah maka labo Tuhan si ersura-sura meneken kegeluhenna tapi si iblis kap. Alu bage maka dikune reh percuban si ugapa pe kecibalna, si pasti si la bene ibas anak-anakNa eme kinitekenna nandangi Bapana.

Tapi olangilah kami idur si ilat nari; ngataken maka Tuhan kap si jadi ampang-ampang. Tuhan kap si perlebe rimbangken si iblis janah kita anak-anakNa lit ipudi Tuhanta terligen ibas kuasaNa. Emaka labo banci kuasa si iblis e mentas seh ku kita sebab nggo leben italuken Tuhan. Si enda jadi adi tuhu-tuhu pengendesenta man Tuhan janah labo terjeng belas-belas saja. Janah terdauhen, kata enda pe ngajarken kita maka olangi ibas si ilat nari jadi ibas geluhta tupung kita perlu saja ku Tuhan, tapi si enda jadi erkiteken ibas kegeluhenta enggo lit hubungen si erat ras Tuhan. Enggo si tandai Tuhan ras uga belinna kuasaNa, maka la lit sada kuasa apai pe si lit i babo doni enda si ngasup naluken kuasa Tuhan e. Alu kata si deban enggo pang kita ngakukenca ibas kegeluhenta maka : ENGGO ITANDAI TUHAN KITA ERKITEKEN KESETIANNTA.

Pengkenaina

(1) Kita banci saja kena percuban ibas geluhta labo saja arah dampar kegeluhen si ngena ateta, tapi pe arah dampar kegeluhen si langena ateta. Si ngena ateta eme erkiteken lit sura-suranta, janah nggo me si eteh salah tapi ban latertaluken kita kinidagingenta maka si ikutken me sura-suranta e aminna gia la ngena ate Tuhan. Enda labo Tuhan si mbabai kita kubas percuban tapi kita nge si ncubai bana. Enda banci arah pendahin, perkade-kaden, rsd. Ibas dampar si la ngena ateta eme bagi Job arah pinakitna. Adi Job ngasup ia nahanken pinakit ras kinitekenna. Tapi kita, megati arah pinakit pe banci celus. Bage pe arah pendahin ntah usahanta; la kena bagi ukurta, ntah buen siakap dat kalak asangken kita, padahal bujuren si akap kita janah liten si akap perbahanenta.

(2) Tuhan pasti erdahin nehken penampatNa man anak-anakNa dikune anak-anakNa ndatken percuban. Saja mulihi ibabai kita lako nguji terjeng ja kita tek maka Tuhan e lit dingen erkuasa. Terjeng ja kita enggo mbina kegeluhenta ibas nandai perbahanen Tuhan ibas geluhta. Emaka pertotonta labo terjeng belas-belas biber tapi pe pengakun kerna kinitekenta maka kai sinibelasken kita man Tuhan e em kinitekenta kerna Tuhan e. Adi ninta maka ula babai kubas percuban, maka Tuhan la ibabaina percuban e engkenai kita seh bene kinitekenta. Adi ninta olangi kami Tuhan, maka pasti Tuhan ngolangi kuasa kegelapen reh nderpa kita.

(3) Ula cubai Tuhan alu kinilatekenta ntah pengelako si la payo, tapi si arapken Tuhan mbela kita. Tapi pindolah man Tuhan erkiteken nggo leben kekelengenna isehkenNa man banta janah kita nggo nggeluh ibas pengataken bujur man baNa erkiteken kiniulinNa e.

Pdt. Benhard Roy Calvyn Munthe - 081361131151

Catatan Sermon

1. Apakah Tuhan encubai kita? Erpalasken kitab Job 1:13-14, lang.
2. Kita megati bagi belkih. Lit tandukna tapi labo jadi senjata ngelawan musuhna tapi nanduki temanna.
3. 3T (tahta, harta dan wanita) nai nari seh gundari ilumbaken kalak. Hati-hati segelah ula kuje fokus perayakenta ibas doni enda. Sabab kerina e labo ngasup erbahansa kita ermalem ate apai ka terkelin. Inget uga gia kita bayakna, tading nge e pagi kerina.
   

Artikel lain yang terkait: