Khotbah Heber/Ibrani 2:5-12, Minggu 7 Oktober 2012 (Minggu XVII Kenca Trinitatis)

Introitus : 

Tapi bagi lit tersurat i bas Pustaka Si Badia, "O Dibata, kai kin manusia e maka ingetNdu ia; kai kin anak manusia e, maka iperdiatekenNdu ia (Heber 2:6).

Ogen : Markus 10:2-16; Khotbah : Heber 2:5-12

Thema : 

Terpujilah Tuhan itengah-tengah perpulungen

Renungen

Gereja eme persadan ntah perpulungen kalak sitek. Kalak sitek e eme gereja. Ikataken gereja erkiteken persadan e erpalasken tek man Tuhan Yesus. Adi bage persadan e tentuna lain ras persadan doni enda. Persadan kalak sitek man Tuhan Yesus palasna eme kekelengen. Labo bagi keleng kera, bagi mehuli akapna bentuk/wujud kekelengen e. Emaka ulihna labo maba kiniulin tapi sebalikna. Ugakin keleng kera e? Kubaca ibas sada buku, keleng kera sinimaksud e bagenda contohna. Lit sada kebun, kebun e isuan alu erbage-bage sinuan-sinuan si erbuah, lit mangga, lit durin, lit durin belanda, lit rambuten, lit ka jambu, rsd. Rembang batang jambu e turah I tepi kolam ikan itengah-tengah kebun e sanga erbuah meramis ras paksa tasak. Reh me sada kera tonggal nangkihi jambu e. Ibuatina si galangna, ipanganina. Deba ndabuhen ku kolam. Setiap ndabuh buah jambu e ku kolam mis ruru ntah rehen ikan emas si enggo cukup galang. Itatap kera e kuteruh, turah mekuah atena, adi ndekahsa ikan e ibas lau mate kap ia, sabab aku pe labo tahan ndekah ibas lau, nina ibas ukurna. Emaka nusur ia ras itangkapina ikan e itamana kudarat. Kai sijadi landekah maten me ikan e. Kekelengen sinimaksud labo kekelengen sibagenda, tapi eme kekelengen sinipraktekken Tuhan Yesus eme kekelengen “Agave”. Guna nelamatken manusia, la saja ipersilahangna bana jadi seri ras manusia tapi ngenanami kiniseran she mate ibas kayu persilang. Adi keleng sibage me palasta ibas perpulungen tentu sada keriahen ras kemalemen ate man banta kerina. “Kam kap aku ras aku kap kam”. La si pejang-jang ukurna, ntah pe mehuli akapna saja. Mehuli siakap e arus irungguken, terlebih sigumuli ibas pertoton erpalasken kata Dibata.

Siingetlah usur, iseken kita enda ntah kai kin kita enda. Enda penting. Sabab megati kita “tidak tahu diri” erkiteken la siinget ise kita ndube. Penulis Heber ibas introitus ras bagin kata Dibata siman oratenta ngangkatken sienda: "O Dibata, kai kin manusia e maka ingetNdu ia; kai kin anak manusia e, maka iperdiatekenNdu ia”. Kita manusia eme taneh dah kap ngenca (Baca Yesaya 64:8). Kita selaku manusia si arusna mate sirasa lalap erkiteken dosa si ngelumlumi kita. Sabab bagi nina Pemasmur 51:7, ibas bertin denga pe kita enggo erdosa. Janah ibas Roma 3:9 rst. “kerina amanusia la lit sibujur sada pe pang”. Janah upah dosa eme kematen sirasa lalap (Roma 6:23). Tapi bujur kal ninta man Dibata ibas Yesus Kristus sienggo nebusi kita alu nggantiken sirinta mate ikayu persilang. Adi bage, kerina kita seri kap ilebe-lebe Dibata, sama-sama mantan kalak perdosa. Adi bage arusna kerina kalak sitek, kalak si enggo itebusi saling mpegegehi. Siiah-iahen segelah reh ku perpulungen sabab ibas Heber 10:23 “Ola kita la reh ku perpulungen, bagi si ibahan piga-piga seninanta. Tapi lebih asa si e siiah-iahenlah kita sabap sieteh maka wari Tuhan, e me wari kerehenNa, reh me”.

Selaku gereja ntah perpulungen lit aturen-aturen guna kiniraturen, segelah bagi temata minggu enda “Terpujilah Tuhan itengah-tengah perpulungen”. Penungkunenta kerna tema enda, banci kin la terpuji Tuhan itengah-tengah perpulungen? Arusna la banci, sebab si pulung e kerina anak-anak Tuhan. Selaku anak-anak Tuhan bagi nina Paulus ibas Filipi 2:2,5 arusna lit (1) ersada arih, sikeleng-kelengen, ersada ukur; (2) perukurenta bagi perukuren Kristus (nggit Ia jadi manusia she mate I kayu persilang). Penungkunen, enggo me bage perpulungenta? Masing-masing kita njababsa. Sijelas, ibas kinatana kita arus terus-menerus mindo gegeh man Dibata segelah bage. Sabab reh ngasupna kita nggeluh selaku anak-anak Dibata maun reh mbuena ka reh percuban e. Kerna sienda ula mamang ateta, sabab Yesus pe icubai nge. Ibas pengogen bagin sipemena eme Markus 10:2-16 ituriken reh piga-piga kalak Farisi ncubai Yesus. Isekin kalak Farisi e? Eme kalak simbue itehna kata Dibata, si mengklaim dirina rembak ras Dibata. Ibas kai Yesus icubai? Ibas soal aturen ngulihken ndehara. Jabapen Yesus nandangi penungkunen ras argumentasi kalak Farisi kerna banci ngulihken ndehara tuhu-tuhu mengejutken. Nina Yesus maka ndube Musa erbahan surat mulih erkiteken bangsa e la terajarken alu kata sideban “mekeng”. Sabab situhuna labo bage, mula-mula doni ijadiken dilaki ras diberu si enggo ipersadaken Dibata la banci isirangken manusia. Endame antara lan bahaya siterus menerus mengancam kiniersadan perpulungen si erbahansa maka lanai terpuji Dibata: (1) la terajarken ntah pe mekeng. Bagi kalak Farisi itehna Kata Dibata la idalanlenna. Lit aturen tapi ilanggar. (2) Rayo-ayo ntah la iban seri sada ras sidebanna ngawan perpulungen e. Ibas pengogen ndai, sitik pe la ngena ate Yesus. Irawai Yesus ajar-ajar si erpengakap anak-anak la penting.

Dage bagem, selaku gereja ntah perpulungen, marilah sicidahken dirita selaku anak-anak Dibata. Bahanlah Dibata terpuji arah geluhta, arah perpulungenta. Alu bage tek kita isehken Dibata padanna man banta. Ibas Keluaren 19:5 ikataken ibas cakap Indonesia “Jadi sekarang, jika kamu sungguh-sungguh mendengarkan firman-Ku dan berpegang pada perjanjian-Ku, maka kamu akan menjadi harta kesayangan-Ku sendiri dari antara segala bangsa, sebab Akulah yang empunya seluruh bumi”. Adi kita jadi “harta kesayangan Tuhan” tentu ipekena-kenana, ijagai ras ipasu-pasuNa kita. Amin.

Pdt.S.Brahmana
GBKP Klasis Jakarta-Bandung

Artikel lain yang terkait: