Suplemen Bimbingen PJJ tgl.10-16 Maret 2013, 2 Samuel 9:1-13

Bahan : II Samuel 9:1-13

Thema : “Pusuh Si Engkelengi”

Tujun : 

• Gelah ngawan perpulungen lit ibas ia pusuh si engkelengi si la ertaktak
• Gelah ngawan perpulungen ngelakoken kekelengen (proaktif) ibas geluhna

II Samuel 9:1-13

9: 1 I bas sada wari nungkun Daud, “Lit denga nge tading keluarga Saul? Adi lit kucidahken ateku keleng ateku erkiteken Jonatan.”

9: 2 Lit sekalak pelayan keluarga Saul gelarna Siba janah idilo ia ndahi Daud. “Kam Siba?” nina raja nungkunsa. “Aku Tuanku,” nina njababsa.

9: 3 Isungkun raja ia nina, “Lit denga kang keluarga Saul tading? Adi lit ateku encidahken kesetianku ras keleng ateku, bagi si kupadanken man Dibata.” Nina Siba njababsa, “Lit sekalak nari e me anak Jonatan si dilaki. Cempang ia.”

9: 4 “I ja ia?” nina raja nungkun. “I rumah Mahir anak Amiel i Lodebar,” nina Siba.

9: 5 E maka isuruh Raja Daud gelah ia reh.

9: 6 Kenca Mepiboset anak Jonatan kempu Saul enggo seh, erjimpuh ia i lebe-lebe Daud alu mehamat. Iperkuanken Daud ia, “Mepiboset.” Ngaloi ia nina, “Kai Tuanku?”

9: 7 “Ola mbiar, “ nina Daud. “Kukelengi ateku kam erkiteken bapandu Jonatan. Kuulihken man bandu kerina taneh sekerajangen ninindu Saul, janah kam banci tetap man i istana.”

9: 8 Erjimpuh ka Mepiboset janah nina, “La kap aku ulin asa biang mate, Tuan! Engkai maka bage kal ulina kam man bangku?”

9: 9 Kenca bage idilo raja suruh-suruhen Saul, Siba gelarna, jenari nina, “Kubereken man Mepiboset , kempu tuanndu kerina sikerajangen Saul ras keluargana.

9: 10 Kam, anak-anakndu, ras suruh-suruhenndu arus nuani taneh e guna keluarga tuanndu Saul, janah pe pulung ulihna man nakan keluarga tuanndu e. Tapi Mepiboset tetap kami ras man.” (Lit sepuluh lima kalak anak Siba dilaki janah suruh-suruhenna lit dua puluh kalak.)

9: 11 Nina Siba njababsa, “Kerina perentahndu tetap kudalanken raja.” Dage ras raja me si Mepiboset man, bali ras sekalak anak raja.

9: 12 Lit sekalak anak Mepiboset dilaki nguda denga, gelarna Miha. Kerina anggota keluarga Siba jadi suruh-suruhen Mepiboset.

9: 13 Dage Mepiboset si nahena duana cempang, ringan i Jerusalem tetap man i istana raja.

“Kek’lengen Yesus kempak manusia desken Dibata engkelengi IA, kekelengenNa maler kap man banta adi sipakelah pedahNa. Min sikeleng-kelengen kita k’rina bagi pedahken Jesus bas Pustaka...” (PEE GBKP No.69, ayat 1).

Lirik lagu enda ngajuk kita guna nggeluh ibas kekelengen erpalasken keleng ate Dibata man banta sebab kekelengen eme sada biak nggeluh si arus lit ibas kalak sierkiniteken man Tuhan. Adi siperdiateken isi Pustaka si Badia mulai ibas kitab Kejadin-Ketangkasen kerinana nuriken kekelengen, baik e kekelengen Dibata bagepe uga kita arus engkelengi dirinta ras temanta manusia.

Bahan PJJ ibas Minggu enda pe, kita ngerana denga kerna kekelengen. Kekelengen si enggo iampeken Dibata man banta, tentuna pe banci sicibalken ibas kegeluhenta guna engkelengi sapih-sapih kita manusia. Kekelengen sinimaksudken e me labo alu ukur si pekulah-kulah, tetapi engkelengi alu pusuh-perukuren si meciho ras la ertaktak (perhitungan) nandangi kita tinepana.

II Samuel 9: 1-13

Kemenangen Daud jadi sekalak Raja i Yerusalem janah pe nggit erdamai ras negara-negara tetanggana (Moab, Aram/Siria ras Edom), tentuna maba kegeluhen si dem alu pusuh peraten si mehuli ibas kegeluhenna. I balik si enda kerina, Daud la ngelupaken perjanjin ras relasi persahabatenna nandangi Jonatan sope hal enda langa terjadi. Tentuna, ibas jalinen relasi sibagenda rupana, Daud membuktiken janjina ndube alu engkelengi Mepiboset si cempang nahena selaku anak Jonatan, kempu Saul. (Saul eme kap raja si pemena ibas pemerintahen bangsa Israel).

Kenca ieteh Daud kerna kepeken lit denga keluarga kesusuren Saul-Jonatan si tading bas paksa e, emaka isuruhna sekalak budak Saul si tergelar Siba guna ngelegi Mepiboset i rumah Mahir anak Amiel i Lodebar. Mbegi berita sibagenda rupana, tentuna maba sada kebiaren man Mepiboset. Tetapi Daud ngalo-ngalo kerehen Mepiboset alu meriah ukur. Iulihkenna atena kerina taneh sijadi kinirajangen ninina Saul, janah banci tetap man janah tading ras raja Daud bas istana segedang geluhna. Megi ranan enda, Mepiboset merasa la metunggung guna ngaloken kekelengen si bage belinna ibas raja Daud nari. Hal enda iungkapken Mepiboset alu erjimpuh man Raja Daud janah ngataken bahwa, dirina la kap uliin asa biang si enggo mate. Enda me sada ungkapen sinuduhken bahwa dirina najis ras hina janah la pantas tading ibas kerajaan perbahan nahena si cempang. Ibas jaman kerajaan Padan si Ndekah, adi lit sekalak raja si mbaru erkuasa, maka kerina sisa anggota keluarga raja si perlebe ikernepken, tetapi Raja Daud justru tetap nehken kekelengen man bana alu dem lias ate.

Labo terjeng Mepiboset saja ngenca, tetapi kekelengen e pe ipesehna man budak (suruh-suruhen) si Saul. Siba rikut krina ras keluargana isuruh Daud jadi budak Mepiboset. Emaka krina ia tading bas istana raja guna ngelai tuanna si Mepiboset. Alu bage Daud enggo nepati ras membuktiken janji-sumpahna ndube guna tetap engkelengi kerina kesusuren Jonatan ras Saul kune ia jadi sekalak raja (1 Samuel 20:14-17; 24:22).

Kekelengen nandangi manusia labo terjeng engkelengi kalak si seri ras kita, si jadi ateta, si jadi ateta, si engkelengi kita, si nampati kita, si rembak ras kita, si mehuli man kita ras sidebanna, tapi engkelengi siniajarken Tuhan man banta emekap engkelengi kalak si la seri ras kita, si segat ateta, si nakiti kita, si nundalken kita, si la mperdiateken kita ras si la bagi ukurta. Tentu hal si bagenda rupana mesera kel guna ndalankenca. Guna ngelakoken kerina enda, butuh proses ras kiniteruken rukur guna ngalakenca.

Biak sibagenda rupana pe enggo icidahken Raja Daud man Mepiboset anak Jonatan, bagepe Siba sekalak budak raja Saul ndube rikut krina ras keluargana dat bagin ibas kerajaan. Daud la rahan-rahan, la ia ertaktak secara doni ibas ia encidahken keleng atena nandangi kalak enda. Tentuna pusuh si engkelengi si bagenda rupana pe lit arusna ibas kita selaku kalak sierkiniteken man Dibata. Biak perukuren anak Dibata, la terjeng engkelengi si bagi ukurna saja, tapi pe ngasup bertindak lebih asa sie. Adi gel-gel kekelengenta si ipeseh terjeng man kalak si bagi ukurta saja, gundari ipersingeti janah ipelimbarui kata Dibata cara perukurenta arah bahan PJJ-nta si sendah, segelah ngasup kita engkelengi si la ngenca si bagi ukurta, sebab e me kekelengen situhuna.

Adi enggo mulai siangka kerna kata Dibata ibas nehken kekelengen alu pusuh si la ertaktak, mari dage tetap sidalanken ibas kegeluhenta tep-tep wari. Kekelengen enda labo terjeng biber saja ngenca, tapi si usihlah Daud si membuktiken janjina guna engkelengi kesusuren Jonatan anak Saul. Yesus pe nggit mate i kayu persilang guna membuktiken janjina nebusi kerina dosa manusia, pantas nge kita engkelengi sapih-sapih kita manusia alu perukuren si ertaktak ibas pusuhta? Mari si evaluasi dirinta ras refleksiken ibas kegeluhenta sekalak-sekalak.

Selamat engkelengi! Dibata simpengasup kita guna ndalankenca...

Pdt.Alexander Simanungkalit

Artikel lain yang terkait: