Suplemen Bimbingen Pjj tgl.3-9 Maret 2013, Imamat 19:17-18

Bahan    :    Imamat 19:17-18

Thema   :    “Kelengilah Teman Manusia”

Tujun     :   

• Gelah ngawan perpulungen labo erelem-elem, labo segat ate ras labo erbalas man manusia si labo bagi ukurna
• Gelah ngawan perpulungen ngkelengi temanna manusia bagi dirina jine. Ngalemi teman manusia eme buah keleng ate.

Ngerana kerna kekelengen man teman manusia tentu ibas si e sicakapken kerna hukum utama siniajarken Dibata man banta manusia arah Pustaka Sibadia. Hukum enda situhuna “mengikat” kita kerina selaku kalak sierkiniteken. Ertina enda enggo jadi Kewajiben ibas kita erkiniteken.

Kinata ibas kegeluhen enda labo ka bage, seiring reh majuna jaman enda, reh ganjangna gia pemeteh manusia si lit, tapi lalap nge reh urakna sincidahken kekelengen ibas kegeluhen enda. Manusia megati jadi serigala nandangi manusia sideban. Sienda kerina la terlepas ibas kecenderungen manusia si nggeluh erbana-bana, pembenaren diri, egoisme sierbahanca kekelengen e lanai teridah ilakoken.

Megati ka pe kekelengen ibas kegeluhen jaman enda ihubungken ras faktor untung rugi. Sie kerina erbahanca “kabur” makna kekelengen e idalanken ibas kegeluhenta.

Erlajar kita arah Pustaka Sibadia ncidahken kerna kekelengen Dibata situhu-tuhu sila erkeri-kerin, seh banci icidahkenna alu pengorbanen simbelin arah diri Yesus Kristus (bd. Yoh 3:16). Sie kerina ncidahken kekelengen “Agape” si ipesehNa man banta tinepanNa. Sura-sura Dibata tentu banci sidatken kegeluhen situhu-tuhu alu kita banci nggeluh “Payo” ibas kegeluhen enda. Kegeluhen sipayo enda banci sihubungken ras kegeluhen si “Badia” bagi siisuraken Dibata.

Arah Bahan PJJ Minggu enda jadi perenungen man banta kerna aturen nggeluh siipeseh Dibata nandangi bangsaNa.

Imamat 19:17-18

Aturen siipeseh enda berhubungen ras kiniteken, hukum bagepe penghakimen termasuk nandangi kalak Lewi guna njaga kebadiaan Dibata alu bangsa e nggeluh Badia. Sienda pe tentu ibas bentuk keleng ate Dibata man bangsaNa gelah ndatken keselamaten bagepe kemalemen ate ibas kegeluhenna bagepe pagin ibas kinirajanNa.

Ibas ayat 17 icidahken aturen nggeluh kerna ola erelem-elem, nggit ndungi persoalen janah la ndabuh kubas dosa. Rangkaian ayat enda icidahken kerna aturen siarus ilakoken guna banci kita ndatken kegeluhen si Badia e. Elem-elem ibas pusuh situhuna bali ras “pinakit Kangker” si megati menggerogoti kita si adi la minter ibuang/icabut banci menyebar cepat seh maba kekoten man banta. Adi enda terus lit ibas kita maka kegeluhenta pe lanai bo tenang, lit ibas kebiaren, kecurigaan, ernembeh ate seh banci dungna perbahanenta pe enggo bengket kubas kubang dosa.

Ibas kegeluhenta tentu arus sisadari maka melala nge temanta labo bagi ukurta. Gejaplah maka pelain-lain ibahan Dibata kita enda guna banci kita sikeleng-kelengen bagepe sisampat-sampaten. Perlu siidah kalak sideban selaku tinepa Dibata simeherga seh maka banci rusur turah ukur ngalemi ibas pusuhta.

Bagepe ayat 18 icidahken aturen kerna ula erbalas perbahanen kalak sila payo siakap tapi arus kita ngkelengi ia bagi dirinta jine.

Pengajaren enda sisadari labo menukah guna ndalankensa sebab bali nge ras pengajaren kerna “kelengilah Imbangndu”. Enda pe ipeseh Tuhan Yesus selaku pengajaren man banta anakNa uga kita punya nilai lebih asangken kalak sideban “berani tampil beda” sebab enda me jati dirinta selaku anak Dibata.

Pengajaren ngkelengi arus jadi gaya hidup man banta kalak sierkiniteken, janah palas kita ngelakoken si kerina erkiteken sigejapken maka Dibata enggo leben ncidahken kekelengen simbelin man banta. Ibas siniakap kita la ngasup enggo leben italuken Kristus seh kita pasti ngasup ndalankensa

Tole pe banci kita erlajar ibas pengertin Paulus kerna nehken keleng ate erpalasken Roma 12:9-16 si nuriken kerna lagu langkah kalak Kristen ibas ia enggo ikeleng Dibata arah perkuah ateNa. Sienda igejapken Paulus ibas pengertinna kerna kai siarus ibahan kalak sierkiniteken ibas ia ngaloken perkuah ate e arah lagu langkahna :

1.  Keleng ate ola min alu pekulah-kulah
2. Cigalah atendu si jahat janah persadalah dirindu ras si mehuli.
3. Sikeleng-kelengenlah kam bagi si ersenina
4. Silebe-lebenlah kam i bas mpehaga teman
5. Ola kam mekisat, tapi tutuslah erdahin. Ergiah-giahlah ukurndu i bas ndahiken dahin Tuhan
6. Meriahlah atendu i bas kam erpengarapen, megenggenglah kam i bas kiniseranndu, janah ertotolah kam man Dibata la erngadi-ngadi
7. Raskenlah kinilitenndu ras temanndu si sada kiniteken, janah alokenlah kalak si reh kesilang ku rumahndu
8. Pasu-pasulah kalak si pesega-sega kam, pasu-pasulah, ola sumpahi.
9.  Meriahlah ukurndu ras kalak si ermeriah ukur, tangislah kam ras kalak si tangis.
10. Sekalak-sekalak kam arus mperdiateken keperlun kalak si deban. Ola meganjang ukurndu, tapi pertemanilah kalak si meteruk pe. Ola beluh iakapndu bandu.

Ibas lagu langkah siipeseh Paulus enda ilakoken kalak sierkiniteken ibas ia nggejapken kiniersadanna ras Kristus. Sienda silakoken ibas kita enggo ngaloken kekelengen simbelin ibas Dibata nari. Jadi tanggung jawabta nehkenca ka man kalak sideban. Ibas kegeluhen enda megati berlaku “kai sinisuan e kange siniperani” ertina kai sinibahan man kalak sideban tentu e kange ibas paksana jadi baginta.

Pengertin enda pe mabai kita ndalanken kekelengen e janah mpedauh perukuren siernembeh ate seh kubas erelem-elem. Dibata labo pernah erelem-elem man banta gia banci jadi melala perbahanenta si la payo entahpe erbahanca nembeh ateNa, tapi tetap icidahkenNa kekelengen simbelin man banta seh banci sidatken keselamaten ibas Ia nari. Ingetlah nembeh ate, elem-elem maba kesusahen ngenca tapi memaafkan, mengampuni maba perukuren si senang seh malem ateta.

Pdt.Alexander Simanungkalit

Artikel lain yang terkait: