Introitus :
Dage lanai bo erndobah kalak Jahudi tah kalak Junani, budak tah kalak bebas, dilaki ras diberu. Sabap kerina nge kam sada i bas Kristus Jesus (Galatia 3:28).
Ogen : Yohanes 4:1-10; Khotbah : Rut 1:1-22
Thema :
Jabu Ngelai desken Juma La Erbaleng
Turi-turin kerna Naomi ras Rut kalak Moap e tuhu-tuhu erbahan kita terharu. Kekelengen si Naomi nandangi permenna lanai teraguken. Sabab kekelengen si tuhu-tuhu eme uga maka sinikelengina e banci bahagia, senang, sikap akapna, rsd. Berarti kekelengen situhu-tuhu lanai ngukuri kepentingenna saja tapi kepentingen kalak sinikelengina, alu kata sideban la egois. Kerna sienda icidahken Naomi nandangi duana permenna.
Naomi enggo mbalu, duana anakna enggo mate janah ia enggo metua tentu perlu kal lit sinemani ras nampati ia. Janah teman ras sinampati e lit eme duana permenna, Rut ras si Orpa beru Moap. Lit hakna nandangi duana permenna enda guna tetap ras ia, nemani ras nampati ia. Tapi hak e la ipejangjangna/la ipertahankenna, iukurina masa depan permenna sabab amin gia beru Moap permenna e keleng kal atena. Adi tetap ikut ras ia mulih ku Betlehen kutana, iukuri Naomi secara logika maka lanai lit siman arapenken permenna enda man bana. Payo lit adat ibas kalak Israel maka adi lit denga anak dilaki Naomi banci jadi ganti perbulangen si enggo mate, tapi e la mungkin sabab Naomi enggo metua guna erjabu ka (ayat 11-13). Eme sababna erpalasken keleng ate bagepe pasu-pasu isuruh Naomi permenna e mulih ku rumah orang tuana segelah permenna e banci ka erjabu mulihi.
Tapi duana permenna e la nggit. Kenca tole ipindo bahken idesak Naomi erpalasken keleng ate (labo erkiteken dengkel ntah jadi beban) segelah permen na e mulih ku rumah orang tuana, kedungenna si Orpa mulih ku orang tuana, tapi Rut tetap la nggit. Ijenda me teridah buah kai sinisuan Naomi sidekah enda ibas hubungenna ras duana permenna enda. Payo kai sinisuratken ibas Galatia 6:7 “…apa yang ditabur orang, itu juga yang akan dituainya”/”Si isuan manusia e ka nge iperanina”. Bage me kai sinisuan Naomi sidekah enda ibas hubungenna ras permenna eme “ngelai” ibas kekelengen, perhatian, rembang tengah, la membeda-bedaken nandangi permenna ulihna kesetian ras kekelengen permenna si luar biasa man bana. Adi min ndai bibina enda merambit, perhitungan kai pe ntah la mehuli man permenna kuakap labo bage setiana duana permenna man bana. Jadi ijenda teridah uga pentingna pendidiken ras keteladanen simehuli ibas jabu. Adi jabu e saling melayani, berarti ije lit 5S (Sikelengen, siangkan, siangken, siteken ras sitedehen) maka ulihna eme tambah sada nari S eme Setia. Ibas duana permen si Naomi enda teridah si e, SETIA man bibina. Anem gia si Orpa dungna nadingken bibina labo berarti ia la setia. Tapi kesetian si Rut tuhu-tuhu luar biasa. Ungkapen ibas ayat 16-17 tuhu-tuhu erbanca kita terharu: “Tapi erjabap Rut nina, "Ola suruhndu aku nadingken kam bibi! Raslah kita berkat. Ku ja kam lawes, ku je aku, i ja kam ringan i je aku ringan. Bangsandu jadi bangsangku, janah Dibatandu jadi Dibatangku. I ja gia kam mate, i je pe aku mate, janah i je me aku ikuburken. Ersumpah aku maka TUHAN si ngukum aku alu kiniseran si mberatna adi kusirangken kam; pala kematenkin si nirangken kita duana.”
Sue ras temata ibas Pekan Keluarga wari 6 enda, kai si ibahan Rut enda eme “Ngelai tanpa Batas/la erbaleng”. Rut eme bangsa Moap ngelai Naomi kalak Israel, bagepe sebalikna uga selaku bibi enggo ngelai permenna alu keteladanen, kekelengen, ras petandaken Dibata kalak Israel seh maka ulihna luar biasa. Amin gia perbulangen Naomi enggo mate, bagepe duana anakna dilaki mate ka, tapi perbahanenna simehuli sidekah enda man duana permenna erbuahken kesetian, khususna si Rut si setia seh mate ngelai Naomi. Janah ulihna ibas setia ngelai tuhu-tuhu luar biasa iban Dibata. Adi sioge seterusna turi-turin si Rut enda, kedungenna erjabu ia ras kalak bayak eme si Boas kade-kade Naomi. La saja senang geluh Rut bagepe Naomi tapi pe arah sinursur keluarga si Rut ras Boas enda tubuh raja mbelin eme raja Daud. Jenari Yesus Kristus pe I ikataken ka keturunen Daud (Roma 1:3).
Payo kal kai si ikataken Paulus ibas Introitusta, Galatia 3:28 maka labo erdobahen idah Dibata manusia enda. Kerina jelma eme sasaren ntah pe alamat keleng ateNa ibas Yesus Kristus. Keleng ate Dibata e icidahken arah Yesus Kristus reh ku doni enda guna ngelai labo guna ielasi. Bahken ielakenna dirina seh mate I kayu persilang guna nebusi dosa manusia. Adi bage, maka setiap kalak si enggo ngaloken pengelai Dibata ibas Yesus Kristus, ia pe ngelai ka alu tampa batas baik suku, agama, social, rsd. Hal sienda me sinicidahken Yesus ibs pengogenta, Yohanes 4:1-10. Labo kalak Israel saja ielaina, tapi pe kalak Samaria sinianggap kalak Israel kalak perdosa, lebih asa sie sinielai Yesus kalak Samaria enda eme diberu si la ka mehuli kegeluhenna (gonta ganti perbulangen). E pe ielai Yesus. Adi Yesus pe ngelai ise saja/la erbaleng, me arusna kita pe ngelai la erbaleng ka?
Gelah jabu selaku gereja ngasup ngelai tanpa batas/laerbaleng tentuna ibas jabu (1) lit pemahamen sipayo kerna pendilonta selaku kalak si enggo ngaloken keselamaten ibas Yesus Kristus eme jadi alat ibas tan Tuhan majekken gerejaNa (1 Petrus 2:5) ras gelah kita jadi pasu-pasu man doni enda (Kejadian 12:2, Zakaria 8:13, 1 Petrus 2:9). Man doni enda berarti kerina jelma la lit batas-batasna/laerbaleng; (2) Bapa, nande, anak-anak lebe mperaktekken kegeluhen saling ngelai itengah jabu. Uga ajaren, uga teladan si ibahan orang tua mempengaruhi isi jabu. Naomi enggo mereken didiken ras mperaktekkenca/teladan man isi jabuna, ulihna permenna, khususna Rut ngelai Naomi amin gia lain bangsa, adat istiadat bahken ndube lain agama.
Mari, labo lit istilah terlambat adi lenga kin itengah jabuta saling ngelai. Adi enggo, sitingkatken seh la erbaleng. Ertina la saja man kade-kade, kalak karo, seri agama, tapi pe si la lit hubungenna secara kai pe ras kita. Adi silakoken sienda, berarti kita enggo ngelakoken singena ate Dibata. Janah kasa kalak si ngelakoken singena ate Dibata ipasu-pasu Dibata kap (Bd.Imamat 26:3-4, 1 Raja-raja 9:4-5, Matius 6:33).
Pdt.S.Brahmana
0 komentar:
Post a Comment