Introitus :
“KataNdu kap tendang man nahengku, nerangi dalan si kudalani” (Masmur 119:105)
Ogen : Markus 1:9; Khotbah : Masmur 119:97-104
Thema : “Nggeluh Ibas KataNdu”
Kata Penaruh
Itengah tengah kegeluhen kalak Kristen maun kita jumpa perpulungen mbelin kal ketedehen atena mpelajari Alkitab, arah sekolah Alkitab malam, kuliah theologia program s1, s2, s3 ras berhasil alu prestasi baik. Ketutusen mpelajari kata Dibata erbahanca hebat pemetehna kerna kata Dibata, tapi pemeteh kerna kata Dibata e langa tentu mengubah sikap geluhna, nadingken kegeluhen si ndekah ras nggeluhken kegeluhen si mbaru. Bagepe maun si begi berita “isu” kerna pandita si inilai menguasai melala pemeteh kerna kata Dibata tapi pe bertentangen lagu langkahna ras pemetehna e. Turah penungkunen “Engkai maka banci jadi bage, adi ibas kata Dibata erkuasa nge gegeh Dibata?” Engkai maka meganjang pemetehna kerna kata Dibata tapi la bias kengasupenna mbedaken si benar ras si salah, kurang tegas ibas muat keputusen, melket lagu langkahna; pernembeh-dendam, cian, perbual ras erbage bage perbahanen dosa sidebanna? Labo bias tujun mpelajari kata Dibata saja, tapi pe perlu mperdiateken motivasi mpelajarisa e me gelah erkinibayaken ndalanken kata Dibata.
Pembahasen-pemberitan
Nina pemasmur “Lanai tanggung keleng ateku man undang undangNdu, kukusur kusur ibas ukurku gedang gedang wari.” Lit pribasa cinta nina “Dihatiku ada kamu, di pikiranku ada kamu, di dompetku ada kamu, di waktu waktu hidupku ada kamu, dimana mana dan kapan saja bagiku kamu hadir!”. Kalak si bage cara nggeluhna, pertimbangen pertimbangenna bahkan semangat ras tujun nggeluna ipengaruhi cintana. Bageme ketedehen ate pemasmur nandangi undang undang Dibata emaka katawari pe waktuna, ija pe ras kaipe situasina lalap nge atena mpelajari undang undang Dibata. Adi ipelajarina undang undang Dibata tetambari me tedeh atena jumpa ras pedah pedah Dibata si atena ngena e. Iberekenna ingan undang undang Dibata e ibas ukurna, ikusur kusurna, iberekenna gegeh, kinibayaken, kesetian ras geluhna bagi sura sura undang undang e.
Pemasmur nuriken piga piga untungna mpelajari undang undang Tuhan alu ngkusur kusursa ibas pusuh e me:
1. Pentaren pemasmur asangken imbang imbangna.
Aminna pe kalak enggo erkiniteken tetap nge geluhna i teruh ancamen ibas imbang imbangna nari (si mperimbang ia), ras ibas doni enda nari. Biasana imbang si mengintai e maka ia lebih siap diri alu strategi ras persenjatan tempurna, sebab enggo ipelajarina si tuasi kalak si i intaina. Tapi nina pemasmur lalap nge pentaren “lebih berhikmat” kalak si la erngadi ngadi mpelajari (melatih diri) ras mpersenjatai dirina alu perentah-perentah Dibata (bdg. Efesus 6:10-18 senjata si ibereken Dibata-perlengkapan rohani). Kalak jahat ibuatna keputusen erpalasken keuntungena, labo iperhitungkenna gulut iakap kalak tapi kalak si erngena ate man undang undang Tuhan idahikenna keputusen si mbaba keuntungen man jelma si enterem, idahikenna kedamen kalak sideban.
2. Pengertin pemasmur ngelebihi pengertin guru si ngajari ia.
Lit kin murid pentaren asangken guruna? Sini imaksud pemasmur labo lebih erpemeteh (pengetahuan) tapi lebih erpengertin (berakal budi). Pengertin (akal budi) labo ulih pemeteh saja tapi pertubuhenna mehuli erkiteken perenungen perunungen si murni ras tutus.
3. Belinen kepentaren pemasmur asangken orang-orang tua.
Orang-orang tua e me tua tua si kundul i batar batar i pintu gerbang kota si ertugas nampati kalak ibas perbeben geluhna (bdg Ulangen 21:19). Ibas kebiasan nggeluh kalak Yahudi; anak (kalak si nguda) la pantas ngajar orang tua, tapi ibas paksa umur Yesus sepuluh dua tahun ngerana ngerana Yesus ras guru guru agama kalak Yahudi, ngelakoken percakapen alu si sungkun sungkunen ras iberitaken maka Yesus si asum si e nguda denga ngerana Ia alu pemeteh si meganjangna. (Lukas 2:46-47)
4. Menang pemasmur nilahken perbahanen si jahat.
Melala kalak si ndabuh ku bas dosa labo erkiteken la ietehna milih dalan si benar entah salah, tapi ndabuh ia erkiteken godan ngelakoken perbahanen si jahat. La tertalukenna sura sura dagingna, umpamana bagi ndabuhna Adam ras Hawa kubas dosa sebab sura surana gelah seri ia ras Dibata bagepe iblis berhasil nggodasa. Adam ras Hawa la megegh ngelawan sura surana ras godan iblis. (Kejadin 3:1-13). Mpelajari ras ngkusur kusur undang undang Dibata ibas pusuh mpeturah perayaken ndalanken kata Tuhan, teridah bagi si ilakoken Yusuf, la ia ndabuh asum igoda ndehara Potipar (Kejadin 39).
5. Erguru man Dibata ertina ndalanken kata Dibata.
Ndatken sada sada hal si lebih asli ras erkualitas e me alu cara datkenlah e ibas sumberna nari ija kin asalna. Bageme pe guna ndatken pemeteh kerna kata Dibata ergurulah ku Dibata sumber si nehkenca. Ibas hal si e nina pemasmur labo sekolah tapi alu perbahanen, lagu langkah ndalanken kebenaren kata Dibata, e me cara erguru ku sumberna.
6. Man pemasmur undang undang - aturen Tuhan e entebu lebihen asa tebu tengguli.
Kesalahan Adam ras Hawa i taman Eden e me ngelanggar aturen Dibata. Melala jelma labo ngena atena iatur bahkan nina nggeluh iteruh aturen merupaken siksan si mberat, kegeluhen si pagit, la bebas. Labo seri ras kegeluhen kalak si erngena ate nandangi aturen Tuhan; ndalanken aturen merupaken kesenangenna, janah lalap kurang mbue iakapna ndalanken kiniulin ras kebenaren kata Dibata.
7. Arah ndalanken undang undang Tuhan idat pemasmur kepentaren emaka ciga atena kata si la tuhu.
Kata Dibata ibas 1 Yohanes 1:6 “Dage, adi ninta ersada kita ras Ia, tapi nggeluh kita ibas gelap, erbual kap kita ibas kata ras perbahanenta.” Bagepe ibas Matius 5:37 “Katakenlah, ue adi tuhu janah katakenlah, lang adi la tuhu. Lain asangken si e iblis nari kap rehna.” Yohanes 8:44 nina “…Nai nari iblis pemunuh kap. La pernah ikapitina si benar, saba la lit si benar i bas ia. Adi erbual ia biakna nge, sabab ia perguak dingen bapa kerina kalak si perguak.” Setia ndalanken undang undang Tuhan ertina ndalanken kebujuren ras jujur, la ipermainkenna kebenaren kata Dibata, terteki ibas kai kai pe.
Kesimpulen
Kalak si erkeleng ate nandangi undang undang Tuhan, si tutus atena mpelajarisa ras ngkusur kusursa ibas pusuhna idatkenna me pemeteh kerna kata Dibata, itandaina kebenaran ras ibas ia lit gegeh guna ngelawan sura sura si jahat. Tedeh atena nandangi kebenaren emaka la erngadi ngadi lalap idahikenna kiniulin. La ia ngukurken keuntungen man bana saja tapi pe idahikenna kiniulin man kalak si deban. Kata dibata enda pe jadi perenungen, ngajak Pandita, Pertua, Diaken ras kerina si tutus mpelajari kata Dibata gelah ula terjeng ngayaki pemeteh ras kinibeluhen nurikenca saja, tapi jadi prestasi iman min, jadi semangat ibas ndalanken kebenaren, kejujuren ras megenggeng.
Pdt.Ekwin W.Ginting
0 komentar:
Post a Comment