Renungan / Khotbah Nehemia 1:1-5, Pekan Doa Wari V, Kamis 25 September 2014

Introitus : 

Ertotolah katawari pe, janah katakenlah bujur man Dibata i bas si kugapana pe. Enda me si ngena ate Dibata ibahanndu i bas geluhndu selaku kam kalak si enggo ersada ras Kristus Jesus. (I Tesalonika 5:17-18)

Ogen : I Timotius 2:1-5; Khotbah : Nehemia 1:1-5

Tema : Kam Bagin Geluhku

Pokok Pikiren

1. Nuriken kerna erti ertoto guna kalak sideban (Pertoton syafaat)

2. Nuriken kerna erti teks Pustaka Sibadia (Pertoton Nehemia)

3. Contoh kalak si ertoto syafaat

4. Ulih ertoto syafaat (man si ertoto ras si itotoken)

BENA KATA

Ertoto eme sada bagin si mendasar i bas agama. Ertoto rusur pe i kataken bagi kesah man kalak si erkiniteken. Jadi adi kalak enggo ngaku sebagai Anak-Anak Tuhan tapi la ertoto, situhuna enggo mate i bas kiniteken.

Ertoto sebagai alat komunikasinta man Dibata, arusna sipakai guna ngataken bujur, pengendesen ras mindo kerna kai si perlu man banta. Siperlu siinget kerna ulih pertoton eme : Pertotonta mungkin minter ibereken Dibata, danci kange la ibereNa, entah pe isuruhNa ertima, sebab sura-sura Dibata i bas mereken kai si ipindo kita e, eme gelah maba kiniulin man banta terlebih jadi kemulian man Dibata.

URAIAN

Ibas wari pelimaken kita ngelakoken pekan doa, subuk arah introitus, pengogen ras bahan khotbah, nuduhken kerna pentingna ertoto guna pribadinta, keluarga, entah pe pertoton syafaat.

Ibas I Tesalonika 5:17-18, Rasul Paulus ngajuk perpulungen Tesaloiiika guna tetap ertoto janah ngataken bujur man Dibata sebab kegeluhen ras perbahanen si bageme singena ate Tuhan. Alu ertoto ras ngataken bujur merupaken bukti kita ersada ras Kristus Jesus.

Ibas pengogen, Rasul Paulus ngajuk entah pe nuruh Timotius gelah ertoto secara syafaat guna kerina manusia, Raja-raja, kerina si erkuasa (Pemerintah). Nina Rasul Paulus adi enda ilakoken, danci nggeluh i bas senang, dame. Arah pertoton pe reh ngasepna kita erkemalangen man Dibata.

Tema bahan khotbah "Kam Bagin Geluhku". Tema enda nuduhken sada sikap entah pe penggejapen rasa empati nandangi kalak sideban. Ngejapken perbeben, masalah kalak sideban merupaken perbeben ras masalahta, sebab siakui kalak sideban sibermasalah adalah bagin kegeluhenta. Nehemia si paksana tading i bas kuta kalak sideban megi berita kerna kota Jerusalem ehggo ceda (rontas). Ibas megi berita e, ceda kal ate Nehemia, ndele atena emaka ertoto ia, janah mindo man raja gelah dorek min ia ku Jerusalem gelah ipekenana mulihi tembok Jerusalem.

Ope isehken Nehemia pemindonna man raja Artaserses, leben ia ertoto kerna sura-surana e man Dibata. Teridah ulih pertoton Nehemia ibereken raja ijin man bana, sebab tutus atena ertoto ras srpuasa (Nehemia 1:4).

Piga-piga contoh ibas Pustaka Si Badia kerna kegeluhen kalah si ertoto (bersyafaat):

1. Daniel ibas kegeluhenna tutus kal ertoto emaka iarak-arak Tuhan ia ibas kerina pendahin ras masalah geluhna (Daniel 9:3).
2. Samuel anak Hannasi merupaken ulih pertoton si tutus si ilakoken Hanna. E sebabna anak e iberekenna ku rumah pertoton sebab ibas Dibata nari ipindona (I Samuel 1).
3. Musadanci mulahi bangsana, mbaba darat i Mesir nari ku Taneh Perjanjin epe erkiteken tutus ia ertoto (Keluaran 32:11-55).
4. Esterertoto gelah sura-sura Haman guna engkernepken bangsa Jahudi la seh (Ester 4:15-17).
5. Elia ertoto gelah bangsa Israel reh tangkasna penandaina kerna Dibata, gelah la papak entah pe sesat (I Raja-Raja 18:36-55).
6.  Rasul Paulus pe rusur kal ertoto kerna perpulungen-perpulungen, janah ia mindo gelah perpulungen pe notoken Rasul Paulus kerna pendahin/pelayanenna (II Tesalonika 3:1-2).
7. Tuhan Jesusertoto kerna ajar-ajarNa/perpulungen tetap ersada. Ope Tuhan Jesus nadingken doni enda leben itotokenNa gelah perpulungen tetap ngasup ersada (Johanes 17).

Bagem belinna erti ras ulih ertoto, janah adi la ertoto situhuna enggo erdosa (I Samuel 12:23).Piga-piga hal siperlu siangkai kerna pertoton:

(1) Ngkai maka kita ertoto?

a. Kita ertoto sebab Dibata nuruh kita gelah ertoto (Lukas 18:1).

b. Adi kita ertoto, kita band menang ibas percuban nari (Efesus 6:12).

c. Adi kita ertoto, dat kita Pengertin/Hikmat (Masmur 119:27).

d. Adi kita ertoto, kita danci sukses ibas usaha/pendahinta (Masmur 119:31).

(2) Kuga kin ertoto gelah pertotonta megegeh/erkuasa?

a. Adi pertotonta e sue ras sura-sura Dibata (I Johanes 5:14).

b. Pertotonta erkuasa adi kita ertoto ibas gelar Jesus Kristus (Johanes 14:13-14).

c. Adi kita isampati Kesah Si Badia (Roma 8:26).

d. Pertoton megegeh adi ibas kiniteken ras alu tutus (Yakub 5:16).

e. Adi ertoto alu tujun si mehuli (Yakub 4:3).

f. Adi ibas ertoto e la lit cian ate (Markus 11:25-26).

g. Ertoto alu sabar dingen tutus (Roma 12:12).

KESIMPULEN

1. Nggeluhlah tetap ibas toto, subuk notoken pribadi, gereja, keluarga, bangsa ras negara (Syafaat).

2. Ibas ertoto sidahikenka dahinta alu tutus (Ora Et Labora).

3. Ibas ertoto dat kita kemalemen ate.

Graha, 27 Agustus 2014

Pdt. A. Ginting Jawak

Artikel lain yang terkait: