Suplemen Bimbingen PJJ Tanggal 05-11 April 2015, Ogen Perbahanen Rasul 15:1-21

Ogen: Perbahanen Rasul-Rasul 15: 1-21

Tema: Ngerunggui Dahin Gereja Rikutken Sura-Sura Dibata

Tujun:

• Gelah ngawan ni perpulungen meteh erti Sidang Sinode GBKP
• Gelah ngawan ni perpulungen notoken ras ndukung pelaksanan Sidang Sinode GBKP

Paksa Gereja sipemena nggejapken perkembangen si cukup pesat maka peranan presbiter pe berkembang. Janah lit piga-piga presbiter si itentuken erkiteken pelayanenna eme: presbiter si bertindak selaku permakan, selaku si mereken teladan (1 Petrus 5: 1-3). Fokus pelayanenna eme soal penggembalaan. Presbiter si ndahi kalak sakit ras notokenca (Jakub 5: 14). Presbiter si ertugas erkhotbah ras ngajar (1 Timotius 5: 17). Sementara ibas pengertin sideban sinode ertina ras-ras erdalan, sendalanen, ras-ras rukur, janah ras-ras bertindak. Sebage contoh emekap banci sinehen bahan PJJ enda Perbahanen Rasul-Rasul 15: 1-21. Ibas jaman Paulus ras Barnabas, ibas perpulungen Antiokia lit sada persoalen si harus idungi ras ipecahken eme persoalen kalak non-Jahudi si atena bengket ku Kristen apakah kalak enda harus isunat ntah lang? Adi kin enda merupaken sada keharusen aturen si harus idalani maka situhuna kalak non-Jahudi enda harus patuh nandangi peraturen sunat Jahudi.

Sehubungen kerna hal enda terjadi perbedaan pendapat. Bagepe antara Paulus ras Petrus. Paulus la setuju adi kalak non-Jahudi harus isunat lebe maka ia banci masuk Kristen. Tapi Petrus mereken pendapat sebalikna. Emaka banci sibayangken gejala perpecahen itengah-tengah perpulungen enda. Perpulungen Antiokia eme perpulungen si mandiri, ertina nggo ngasup ia muat sada keputusen ntah pe kewenangen sendiri guna ndungi persoalen si e. Tentu perpulungen Antiokia nggejapken bicara banci pe ndungi persoalen si lit ibas perpulungen e apai ka alu rehna tokoh bagi Paulus, Petrus ras Barnabas. Tapi perpulungen enda la nggit ndungi persoalen sisada-sisada erkiteken tek ia maka perpulungen enda pe lit ibas kiniersadan ras perpulungen-perpulungen sidebanna. Enda sebabna persoalen-persoalen si terjadi ibas perpulungen Antiokia ibaba ku sidang Gerejawi i Jerusalem.

Bahan PJJ enda nuriken kerna litna ajaren si itambahken kubas ajaren pasu-pasu keselamaten si nggo ialoken kalak Kristen non-Jahudi. Ajaren e erbahan pernyataan eme keselamaten harus ilengkapi tindaken sunat guna ngkuhi tuntuten Undang-undang Dibata (Hukum Taurat). Ajaren e bagi sora sideban si menyusup ibas pengajaren rasul-rasul. Sora sideban e cukup bertentangen ras pengajaren Jesus man ajar-ajarNa, eme keselamaten merupaken pasu-pasu si nggo iberekenNa. Erkiteken si e, Paulus ras Barnabas lawes ku Jerusalem guna ncakapken persoalen e ras rasul-rasul sideban.

Penjelasen Petrus ibas sidang nekanken dua hal utama. Pertama, Tuhan la mbedaken kalak Jahudi ras non-Jahudi. Peduaken, keselamaten idatken arah lias ate Tuhan Jesus Kristus. Pernyataan Petrus ipegegehi ka pe arah Jakup si berinisiatif la nusahken kalak si atena mulihken kempak Dibata.

Litna sidang i Jerusalem enda ncidahken maka teologi si benar eme hal si penting guna iantusi kalak Kristen. Sebab teologi merupaken palas rukur bagepe cara pandang kalak sitek man Dibata, manusia ras hubungen antara manusia ras Dibata, Dibata ras manusia. Paksa perpulungen e ngadapi isu teologi si erbahan pertentangen, sidang pe ilakoken gelah isu e jadi jelas man kerina kalak gelah banci ijadiken sebage palas man kalak si erkiniteken man Dibata guna mbedaken pengajaren si benar ras si salah.

Alu bentuk Presbyterial Sinodal enda maka struktur GBKP menaken ibas perpulungen nari. Janah ibas perpulungen e lit Pelayan Gereja. Perpulungen-perpulungen kerjasama sada ras sidebanna, banci ibas sada Runggun Gereja, enda nuduhkenca maka perpulungen ibas gerejanta GBKP enda la banci erdalan sisada-sisada, bicara lit pe gegehna guna ndungi persoalen si terjadi ibas perpulungenna, la banci si e idungi sisada harus icakapken ibas sidang-sidang si enggo itentuken Gereja. Runggun-Runggun Gereja kerjasama sada ras sidebanna, ija irungguina ibas sidang Klasis, ntah pe ibas Sidang Klasis. Ibas kerjasama enda, la banci sada Runggun Gereja ngidah dirina ntah berperilaku tempa-tempa ia lebih penting, ia lebih megegeh asang Runggun Gereja sideban, bagepe Pelayan Khususna. Bicara kondisi perpulungen la seri sada ras sidebanna (kota, semi kota, desa, daerah sentra industri, ras sidebanna). Sebab adi siidah ibas bahan PJJ enda, maka perpulungen Jerusalem seri nge ras perpulungen Antiokia. Labo ganjangen Petrus asa Paulus, ntah pe ganjangen Jakub asa Barnabas ras sidebanna. Ijenda me siidah uga belinna manfaat Sidang Gerejawi guna ncakapken perdalanen ntah pe perkembangen perpulungenta. Adi sigargari terbagesen secara konteks budaya tuhu banci siidah kalak Karo pe ibas ndungi persoalen-persoalen si lit ibas kegeluhen si tep-tep wari make prinsip budaya runggu, ija adi lit persoalen si terjadi icakapken ntah pe irungguken gelah idatken solusi si mehuli guna kiniulin kerinana. Payo tuhu sistem Presbyterial Sinodal ibas tengah-tengah gerejanta GBKP emekap sada sistem si mengutamaken budaya arih-arih, la banci kita erbana-bana, emaka kita pe ibas ndungi persoalen-persoalen silit itengah-tengah perpulungenta, harus ibaba ku Sidang Gerejawi guna irungguken.

Bulan April enda ilakoken me Sidang Sinode XXXV. Ibas Sidang Sinode enda ievaluasi me pelayanen GBKP 5 tahun terakhir enda (masalah sihadapi GBKP, kiniulin pelayanen si enggo ilakoken, ras kai arapenta sireh enda). Ibas Sidang Sinode enda ipelimbarui pe Tata Gereja GBKP, itetapken GBP GBKP periode 2015-2020. Ibas Sidang Sinode end ape itetapken/ipilih Serayan Tuhan ibaas Moderamen GBKP periode 2015-2020. Peserta si ikut ibas Sidang Sinode enda eme Runggun-Runggun Gereja GBKP. Utusen si mewakili Runggun Gereja enda iarapken eme Petrus, Paulus, Barnabas, Jakup masa kini (Pandita, Pertua, Diaken), gelah peserta Sidang Sinode banci rukur mbages erpalasken Kata Dibata ras pertoton, janah keputusen Sidang Sinode GBKP XXXV bagi keputusen Sidang Jerusalem, si mabai kiniersadan Pelayah Khusus GBKP, bagepe mereken keriahen ras malem ate man kerina ngawan ni perpulungen GBKP. Rikutken Themanta enda “Ngerunggui Dahin Gereja Rikutken Sura-Sura Dibata” lit piga-piga hal si perlu iperdiateken berkaiten ras makna teologis ibas Persidangen Gerejawi si ilaksanaken: Pemena, ersidang selaku Pejabat Gereja/Pelayan Gereja merupaken alat ibas tan Tuhan si sangana mimpin, memelihara ras merentah perpulungenNa. Erkiteken si e, kerinana si icakapken ras iputusken ibas persidangen merupaken hal si mehuli ilebe-lebe Tuhanta Jesus Kristus, Takal ni Perpulungen. Guna si e iperluken sikap, cara rukurta ras tindakenta si rusur ndarami sura-sura Tuhan guna perkembangen perpulungen. Sebage alat Tuhan guna perkembangen perpulungen maka situhuna lanai bo lit inganta guna pemaksaan kehendak ntah pe cakapta ateta ibegiken. Peduaken, gereja eme Kula ni Kristus kepalana eme Kristus jine (Epesus 2: 21; 4: 15-16). Erkiteken gereja eme Kula ni Kristus maka biakna kin gereja e badia. Erkiteken biakna badia endame maka kerinana si idahiken ibas gerejaNa pe harus badia, seri bagi Kristus emekap badia. Alu bage sebage Pejabat Gerejawi/Pelayan Gereja ibas ngelakoken kerinana kita ngelakokenca pe harus badia adi sangana kita ersidang. Ersidang eme bagin ibas pelayanennta guna kebadian Kula ni Kristus. Guna si e me iperluken kesiapen pusuh (bagepe materi sidang/rapat), biak kemalemen ate guna ras kidekah kita ngikuti persidangen, pujin pengataken bujur kerna kais i enggo ipercayaken Tuhan man banta, ketedehen ate guna ersada ras teman-teman sepelayanen ibas GBKP enda, biak tanggungjawab man Tuhan ras gerejaNa si kin ibas palasna merupaken sada ibadah man baNa. Peteluken, kepemimpinen gerejawi ertina emekap kepemimpinen rohani. Erkiteken si e, persidangen si ilakoken pertama-tama eme dalam rangka “njaga, mpermakani, menghibur, mpegegehi, ngatur biri-biri Dibata”. Kerina materi sidang, aminna pe membahas si sifatna materi (sarpras), eme guna perkembangen perpulungenNa, guna tiap anggota perpulungen nggejapken perkembangen kiniteken man Dibata; apai ka adi sangana ncakapken kasus si menyangkut pribadi tertentu prinsip nagangi paguh rahasia jabaten perlu kal ilaksanaken. Peempatken, kepemimpinen gerejawi merupaken kepemimpinen si sifatna kolektif. Persidangen harus jadi wujud kiniersadan si nyata. Ibas persidangen enda me kita ndatken kesempaten guna mpraktekken pengajaren Tuhan si nggo “mpelimbaru kesah ras perukurenta” (Epesus 4: 23), emekap: saber mbegiken pendapat kalak sideban, saling mpelebeken ibas ngehamati teman ibas persidangen, kerja sama, ngataken si benar alu teng-teng, pusuh si bersih, meteruk ukur ras sidebanna.

Pdt. Andreas Sembiring - GBKP Parindu

Diskusi (Bagi si enggo iban ibas Bimbingen PJJ GBKP)

1. Oge Perbahanen Rasul-Rasul 15: 1-2! Ngkai kin maka rusur terjadi permasalahen ibas perpulungen/Gereja? Turikenlah!
2. Kai nge ndia si idah perluna Sidang-Sidang ibas gerejanta GBKP?

Artikel lain yang terkait: