Khotbah - Renungan Kebaktian Minggu 26 April 2020, Roma 3:1-8

Invocatio:

“Kerina percuban si reh man bandu e bali nge biakna ras percuban si biasa seh man manusia si deban. Tapi Dibata setia nge i bas padanNa. Labo ipelepasNa kam icubai lebih asa gegehndu. Asum kam ngenanami percuban, iberekenNa nge gegeh man bandu gelah ngasup kam nggengkenca, janah radu ras si e iberekenNa pe dalan pulah”

(1 Korinti 10:13).

Ogen: Bilangan 14:17-19; Khotbah: Roma 3:1-8

Thema: DIBATA SITIA I BAS JANJINA (ALLAH SETIA KEPADA JANJINYA)

Mejuah-juah man banta kerina. Shalom … Yesus tetap simasu-masu. Tetap sikataken bujur man Dibata erkiteken banci denga kita ersembah man banda amin gia ilakoken secara keluarga  I rumah. Ibandingken kalak Kristen ibas zaman Kaisar Nero abat pertama, tentu situasita genduari ndauh kal sikapen. Sabab ibas zaman Nero Ula padah erbahan kebaktin ntah perjumpan Kristen, ise saja terdat maka ia kalak Kristen mis itangkap bahken ibunuh, emaka ibas paksa si e cara erkomunikasi kalak Kristen eme alu erbahan symbol si itulis ku taneh ntah pasir eme gambar ikan. Adi lit kalak erbahan gambar ikan, sideban ngelengkapi, misalna erbahan sirip, ntah mata ikan e. Alu bage ngataken ia sapih-sapih Kristen. Engkai maka gambar ikan iban? Sabab kata “ikan” ibas bahasa Yunani  eme IXTUS. Emaka kata IXTUS enda iban jadi singaten Iesous Khristos, Theou Uios Soter ertina Yesus Kristus, Putra Allah, Sang Penyelamat.

                                   

Hal enda isingetken man banta gelah tetap kita ngasup ngataken bujur ibas keadaanta sigundari. Adi situasi enda siakap sebagai pencuban, maka bagi nina Paulus arah invocation, 1 Korinti 10:13 pencoban enda seh nge man manusia sideban pe, ertina labo kita saja. Saja ngenca man banta ikataken “tapi Dibata setia nge I bas padanNa. Labo ipelepasna kita icobai lebih asa gegehta. Ibereken Dibata nge gegeh ras sekaligus dalan pulah. Kai ertina enda? Ertina ibas situasi si seh kal sulitna pe, man kalak siernalem man Dibata labo banci bene, sabab Dibata enggo erpadan mereken gegeh ras dalan pulah. Saja ngenca ban dalanna Dibata nampati kita. Salah sadana si paling mendasar eme ertoto. Eme siilakoken Musa ibas ogen Bilangen 14:17-19, Musa ertoto gelah Dibata ngalemi salah dosa sienggo iban kalak Israel janah Dibata megiken pertoton e. Emaka ibas kita ertoto bagepe ibas kita ngorati kata Dibata tek kita ije Dibata ngerana kai arus silakoken gelah pulah ibas pencoban e nari.

Payo selaku manusia kadang kita kote ibas situasi perbeben si mberat, seh maka turah penungkunen “apakah janji Tuhan e tuhu, ntah lang”. Adi tuhu engkai maka bagenda sekerajangenku, ibandingken kalak sideban labo aku talu ibas ketutusen ersembah man Dibata, labo talu ibas nehken persembahen, bahken buen nge persembahenku, ras sidebanna ras sidebanna.

Perpulungen sinikelengi Tuhan, erpalasken perikop khotbah Roma 3:1-8, Minggu enda mulihi kita ipersingeti, terlebih ibas situasi genduari arah  tema DIABATA SETIA IBAS PADANNA. Payo, Dibata setia ibas padaNa, janah enda lanai terganggugugat, sabab salah sada biak Dibata eme setia. Ibas 2 Timotius 2:13 ikataken “Amin gia manusia la setia man Dibata tapi Dibata tetap setia ibas padanNa”. Ertina kai si enggo ipadanken Dibata pasti jadi.

Contoh si isaksiken pustaka sibadia, ija erkiteken manusia enggo ndabuh ku bas dosa Dibata erpadan engkelini manusia arah rehna penampat eme Mesias ku tengah-tengah kalak Israel. Enda igenapi ibas Yesus Kristus. Saja adi kalak Ierael la ngaloken ras la tek man Yesus Kristus e tentu lain ka ceritana anem gia ia ngelakoken sunat ras man bangsa enda me pemena berita e isehken. Tentuna labo kalak Israel saja, tapi man banta pe, adi labo kita teridah selaku kalak si tek man Yesus Kristus aminna gia kita igelari kalak Kristen tentuna seh ka me padan Dibata e man banta eme labo ndatken pasu-pasu tapi sebalikna ukumen si enggo ipadankenNa man kerina kalak si la tek man baNa.

Ikataken kami ndai maka “adi labo kita teridah selaku kalak si tek man Yesus Kristus”, maksudna labo teridah rumahta lit gambar salib, ibas mobilta lit tulisen ayat, ras sideban. Labo e, tapi teridah keleng ateta, kemelumbarenta, kesabarenta, kinigenggengenta, sucatita ibas ayota, kelemahlembutenta, keramahenta, nukah tergerak belaskasihan, rsd. Enda me antara lain tandana kalak sitek man Yesus Kristus. Emaka arah zaman virus Corona enda kekristenenta mulihi I koreksi, perayan-perayan keagamanta ras ibadah sermonialta I gereja perlu si evaluasi, enggo me payo ntah uga, lalah sedekah enda silakoken secara formalitas saja seh maka labo lit bedana kita payo kalak sitek man Kristus ntah lang?

Sipasti bagi temata: Dibata setia ibas padanNa. Emaka mari sicidahken tandana kita kalak si tuhu-tuhu tek man Yesus Kristus ibas kerina keadan baik senang entah susah bagi paksa enda, tek kita kata Dibata ya dan amin. 1 Korinti 10:13b “Tapi Dibata setia nge i bas padanNa. Labo ipelepasNa kam icubai lebih asa gegehndu. Asum kam ngenanami percuban, iberekenNa nge gegeh man bandu gelah ngasup kam nggengkenca, janah radu ras si e iberekenNa pe dalan pulah”.

Mari si sisaksiken video singkat nutup khotbah enda: …….

Kai nge kesimpulenta kenca enggo si nen video enda? Ajaib pemeliharan Tuhan. Hewan yang selalu bermusuhan dapat dipakai Tuhan saling menolong. Tentu lebih lagi kita anak-anak Tuhan pasti dipeliharakan dan diselamatkan oleh Tuhan sekaligus juga kita diingatkan agar menjadi berkat bagi orang lain, artinya agar saling tolong menolong, saling mengasihi. Amin.

Artikel lain yang terkait: