Khotbah - Renungan Minggu Paskah I Matius 28:1-10, tgl. 12 April 2020

Invocatio:

Suruh-suruhenNdu kap aku TUHAN, bali ras nandengku, aku pe erdahin guna Kam. Enggo aku ipulahiNdu idur kematen nari (Masmur 116:16).

Ogen: Yohanes 11:25-27

Khotbah: Matius 28:1-10

THEMA: OLA MBIAR/JANGAN TAKUT

Ibas kita memperingeti Paskah tahun enda rembang situasi doni termasuk bangsanta sangana iperhadapken kebiaren virus Corona. La siteh ndigan ngadi kebiaren enda. Engkai maka kita mbiar nandangi virus enda? Sabab virus enda maba kematen. Janah menurut penelitian, maka rangking sipemena si paling ikebiari manusia eme kematen, eme sababna la kita heran/erkemamangen adi seh kal manusia biarna nandangi virus corona simelanda dunia genduari, terlebih isebabken pemberitan si luar biasa gencarna kerna covid 19 enda seh maka tempa-tempa doni enda nandangi kiamat. Kerna si enda ula ka kita saling menghakimi sada ras sidebanna, ula ka kita jadi kalak si petua-tuaken tempa kita sirohanina ngidah temanta si seh kal biarna, bagepe la ka kita mencibir ngenehen temanta si tempa la mempergunaken logikana ibas ngalaken kebiaren covid 19 enda. Kerina nge pagi kita ibas paksana iadili janah Dibata terang kal itehna motivasinta menyikapi virus enda. 

Enggo ndai isingetken maka adi kerna kematen ningen, tuhu jadi kebiaren manusia anem gia kematen e labo banci isilahken manusia, waktuna ngenca berbeda sabab la siteh ndigan, sipasti ibas paksana kerina jelma mate nge. Emaka situhuna labo man kebiarenken, tapi kinatana tetap denga nge kita mbiar. Tapi bujur ninta man Dibata ija arah Kata Dibata ibas Pustaka Sibadia situhuna tiap wari ngataken man banta “Ula mbiar”. Sabab ibas Pustaka Sibadia kata “Ula mbiar” lit itulis 365 kali. Adi 1 tahun lit 365 wari, berarti tiap wari Dibata ngataken man banta ntah pe berfirman ula mbiar (jangan takut) sabab Ia me Dibata si enggo mulahi pinakit dosa si enggo ngelangketi kerina manusia, janah akibat pinakit dosa e, eme kamaten rasalalap.

Engkai makai Ia ngasup nampati manusia ibas kuasa kematen? Sabab Tuhan Yesus engnggo keke ibas simate nari, ertina ia enggo naluken kuasa kematen si rasa-lalap e. Eme si ituriken ibas berita paskah, e ka me siituriken ibas perikop khotbahta Minggu Paskah enda, Matius 28:1-10.

Doni siniwakili pemerintah, pemuka agama, ahli-ahli taurat menganggap popularitas ntah pe cerita kerna Yesus kalak nasaret e enggo tamat kenca ipapuken ku kayu persilang. Ternyata lang, bahkan arah kematen Yesus i kayu persilang tergenapi me nubuaten  siisehken nabi-nabi, maka kenca Mesias e mate, ibas wari peteluken keke Ia ibas si mate nari, eme sababna mengantisipasi kemungkinen mayat Yesus itangko loyalitas Yesus, lubang kuburen e la saja itutup alu batu sigalang, tapi pe isegel cap pemerintah ras ijaga perajurit ka.

Ibas perikop khotbah si enggo ndai iogeken, mulihi ituriken man banta maka ija ibas wari minggu erpagi-pagi si lampas e, waktu maria Magdalena ras Maria sideban reh ku kuburen Yesus, rempet terjadi linuren si mehantu kal. Sekalak malekat Tuhan nusur i surga nari i gulingkenna batu si nutupi pintu kuburen e, jenari kundul ia i babo batu e. Ngidah ras mengalami kejadian si bage erbahansa perajurit-perajurit si erjaga e seh kal biarna, girgir ia seh ampar bagi kalak mate. Tentu diberu-diberu e pe seh kal mbiar ngidah kejadin e. Tapi malekat e mereken pengapul gelah “ula mbiar”, sebab Yesus si ipakuken e enggo ipekeke Dibata ibas si mate nari bagi enggo pernah ikataken Yesus ope ia i salibken, isuruh malekat e gelah diberu-diberu e ngenehen bekas ingan Yesus  icibalken ibas kuburen e, jenari gelah meritaken kejadin e man ajar-ajar maka Yesus si enggo mate isalibken e enggo keke ibas si mate nari. Janah i Galilea idah ajar-ajar e me Ia.

Banci sibayangken uga keadaan diberu-diberu e, mbiar tapi pe meriah ukur sabab berita e luar biasa. Janah itengah dalin Yesus si enggo keke e pe jumpai diberu-diberu e, tole mereken kata pergegeh “ula mbiar” maba berita si luar biasa e.

Temata ibas mperingati Paskah enda eme “Ola Mbiar”.  Ola mbiar ibas kai nari? Tentuna ibas kerina hal sipeturah kebiaren, saja ijenda ituriken kami 2 hal saja eme (1) ula mbiar naksiken Yesus si enggo isalibken e maka Ia tuhu-tuhu enggo keke ibas si mate nari. Enda penting sabab lit itulis ibas Puastaka Sibadia Roma 10:9 ngatakenca bagenda: Adi ngaku kam alu babahndu, Yesus Tuhan kap, janah tek kam ibas pusuhndu maka Yesus enggo ipekeke Dibata ibas simate nari, maka terkelin me kam”. Jadi arah ayat enda ngingetken kita maka berita paskah e arusna la sekedar sipahami jadi ajaren ntah pe dogma tapi arus kepe tek ibas pusuhta, alu bage terkelin me kita. Enda me berita siluar biasa, enda me berita paskah emaka ibas kerina situasi “ula mbiar” ibas meritakenca ntah menyaksikenca. Engkai maka man diberu-diberu e perlebe isehken berita paskah e? Engkai maka diberu-diberu e ibereken kepercayan meritaken paskah e, bahken meritakenca man ajar-ajar? Banci mbua jababna, tapi sipasti adi diberu sekali ia enggo tek, apakah e teraloken secara logika ntah lang, tetap icikepna kai si enggo itekina e terlebih enggo ka langsung idahna. (2) Arah peringeten paskah enda pe kita iapuli ibas perasan mbiar si kadang berlebihen ibas paksa genduari. Sabab perasan mbiar e pe enggo pinakit, janah adi e berkepanjangen banci pereh pinakit sideban. Emaka temata “Ola Mbiar”, mpegegehi kita, ngapuli kita maka Yesus Kristus enggo naluken kuasa kematen, arah keke ntah nggeluh mulihken ibas si mate nari ngataken man doni enda maka kuasa kematen si jadi kebiaren nomor sada, enggo italuken Yesus. Eme sababna Paulus nulisken ibas 1 Korinti 15:55 “Hai maut dimanakah kemenanganmu, Hai mau dimanakah  sengatmu? (Bd. Hosea 13:14).

Emaka mari sitetapken ukurta ndalani kegeluhenta ibas situasi genduari. Siikuti anjuren pemerintah bagepe gerejata. Sijadiken momentum situsinta genduari semakin menyakini uga terbatasna gegeh manusia, emaka ibas keterbatasen gegeh e ula ka kita saling menyalahken ntah saling mencibir tapi sebalikna sisampat-saampaten,  saling mengingatken ras mereken pengapul ntah kata pergegeh, sikataken ula mbiar sabab lit penampat situhu-tuhu eme Yesus Kristus si enggo keke ibas simate nari, si enggo naluken kematen. Mari sidalani kegeluhenta enda alu pergegeh kata si isehken Yesus man diberu-diberu e, bagepe si seh man banta genduari ibas kita mperingeti Paskah enda eme “Ula Mbiar”. Sipenting ada hati kita bagi Yesus, ada ketulusan mengasihi dan percaya kepada Yesus bagi diberu-diberi si reh ku kuburen Yesus e, maka Yesus Kristus arah Kesah Sibadia reh mpegegehi ras nampati kita. Teklah maka adi kuasa kematen pe enggo italukenNa tentu ia ngasup mulahi bangsanta, mulahi kita ibas erbage perbeben terlebih pe ibas kebiaren akibat virus corona nari rikut dampak akibat wabah enda kubas masalah ekonomi ras sidebanna. Amin

Artikel lain yang terkait: