Khotbah - Renungan Jumat Agung/Jumat si Mbelin Matius 27:45-56, tgl. 10 April 2020

Invocatio:

Seh kal kejamna perbahanen man bana, tapi igengkenna, janah sinik saja ia. Bali ras anak biri-biri si nandangi igeleh, bali ras biri-biri si nandangi iguntingi mbuluna, la sitik pe ia sumekah (Jesaya 53:7).

Ogen: Heber 10:19-29

Khotbah: Matius 27:45-56

THEMA: ELI, ELI LAMA SABAKHTANI

Perpulungen sinikelengi Tuhan, menurut tafsiren paksa Yesus melasken ELI, ELI LAMA SABAKHTANI eme paksa puncakna kiniseran Yesus selaku manusia 100 persen. Engkai? Adi I taman Eden paksa ia sisada ertoto gelah cawan kiniseran ipedauh ibas Ia nari, panasna naktaken ku taneh bagi taktak dareh nggambarken uga belinna perbebenNa, tapi si e lenga terjadi emaka nina Yesus  “tapi labo peratenKu, tapi peratenNdulah jadi” (Lukas 22:42-43), tapi paksa I das kayu persilang e tutu-tuhu Yesus nggejapken kiniseran si seh kal beratna la saja secara phisik tapi pe secara phikis, ija tuhu-tuhu ia merasa sisada (sendirian) itadingken ajar-ajar ras bagepe Dibata, alu kata sideban “terkatung-katung antara bumi dan sorga”, emaka  salah sada 7 perkatan I das kayu salib silit ibas Injil eme “Eli, Eli lama sabakhtani” (O Dibatangku, o Dibatangku engkai maka itadingkenNdu Aku”.

Kai si catat ibas Injil Matius enda ngingetken kita kerina manusia, khususna kita si enggo tek man Yesus Kristus maka keselamatenta e tukurna kepeken she kal ergana. Meherga sabab labo tukur murah, tapi tukur si ngasamken pengorbanen anak manusia arah proses ngenanami penyiksan si mesangat she rujung kematen I das kayu persilang, la ka sekedar mate saja tapi kematen si icap jelma sinterem paksa e eme kematen si ikutuk Dibata, sabab kalak si ihukum isalibken ibas paksa e ipahami eme orang yang di kutuk.

Ukumen enda me arusna idabuhken man manusia, eme ukumen kematen si rasalalap, emaka bujur ninta man Dibata si enggo memprakarsai pengambilen alih ukumen si arusna idabuhken man banta. Alu kata sideban Yesus Kristus enggo jadi “Kahulta” gencihken kita ndatken hukumen mate.

Ibas kiniteken si dekah kalak Karo lit acara siigelari mulahi/mereken “kahul”. Acara enda ilakoken adi lit sekalak anak kuta erbahan salah ntah si la mehuli ibas ingan keramat, entah ingan pajuh-pajuhen. Kalak si erbahan salah e la banci lang itulahi ntah pe I hukum nini si erkuasa ije, ukumen e banci sakit  ntah pe she ku kematen. Emaka gelah ula terjadi e, isuruh me “guru” erbahan upacara “ngelepasken kahul”. Kai “kahulna” tergantung kai nina guru e si ngasup erkomunikasi ras nini keramat ntah nini si ipajuh e, saja biasana manuk sabugan ntah kambing. Ibas acara e ilepasken guru e me manuk sabugan ntah kambing e ku tengah kerangen sebage kahul ntah gancih  kalak si erbahan salah e ndatken hukumen, kenca acara si e pulah me anak kuta si erbahan salah e ibas ukumen nari.

Dage adi bage kal enggo perbahanen Dibata man banta, kai dage tekadta ku wari-wari sireh enda? Tentuna ngataken bujur man Dibata arah cara ncidahken geluhta selaku kalak si enggo ndatken perkuah ate Dibata, alu bage: (1) teridah tuhu-tuhu jera robah kita adi sidekah enda la denga sigejapken kal pengorbanen Yesus Kristus e man banta. Tek kami adi segejapken kal tentu lain sikapta ras caranya ndalani kegeluhenta si la ndekah ibas doni enda. Ibas pengalamen kami ndahi kalak sakit baik irumah ntah I rumah sakit, lit perbedan sikap kalak si sakit e waktu nuriken kerna keadanna, semakin mekelek sakitna apai ka secara logika medis mesera malemna, biasana ibas nuri-nuri e tangis ia, sehkenna tekadna adi ibere Dibata denga ia malem ibas pinakit nari berarti  nggeluh denga, tutus atena pagi melayani, tutus atena ngikutken Yesus alu makeken kerina silit ibas ia guna kemulian Tuhan, rsd. Engkai maka bage? Sabab ibas paksa e itehna uga ergana kegeluhen siibereken Dibata e, janah sidekah enda kurang denga akapna makeken geluhna sentudu ras peraten Dibata. Dage bagem pe sigejapkenlah maka pinakitta erkiteken dosa tuhu mekelek mberat, la nai lit tambarna, nimai kematen nari ngenca, eme mate ras mate ka. Tapi Dibata ibas Yesus Kristus mereken tambar arah pengorbanenNa mate I Kayu Persilang. KematenNa gantiken kita mate, kematenna erbahansa kita pulah ibas pinakit dosa simaba kematen sirasalalap e. (2) teridah kita selaku kalak si seri pengidahta kerina jelma sabab kerina nge kita mantan kalak perdosa ras enggo ndatken perkuah ateNa, ibas kematen Yesus Kristus I kayu persilang; (2) teridah Ibas kerina keadaan tetap kita erpengendes man Dibata, siteladani Tuhanta Yesus si tetap setia ndalanken sura-sura BapaNa she mata ikayu persilang; (3) teridah maka kita kalak si nggit si sampat-sampaten gelah tetap kita ngasup ndalanken si mehuli (Heber 10:24); (4) teridah tutus ateta reh ku perpulungen, la saja tutus tapi pe ngiah-ngiahi temanta gelah reh ku perpulungen (Heber 10:25); (5) Teridah maka kita engkelengi Dibata labo sebalikna ngelawan Dibata arah la ngergai Yesus Kristus si enggo jadi kahulta e arah caranta nggeluh si la nggit ngalemi salah kalak, nina ibas ogenta Heber 10:27 kalak si bage ikernepken me. 

Bagem kata enda isehken man banta kerina, Dibata simasu-masu kataNa gelah ngasup kita ngelakokenca ras makekenca ibas geluhta. Amin.

Artikel lain yang terkait: