Khotbah - Renungan Minggu Passion VII Markus 11:1-11, Tgl. 5 April 2020

Invocatio:

"Ise ngalo-ngalo kam, ia kap ngalo-ngalo Aku; janah ise ngalo-ngalo Aku, ialo-alona kap Ia si nuruh Aku (Matius 10:40)

Ogen: 52:7-12

Khotbah: Markus 11:1-11

TEMA: NGIKUTKEN YESUS/MENGIKUT YESUS

 

Erti Kristen eme pengikut Yesus Kristus. Penggelaren enda labo penggelaren kehamaten tapi penggelaren sinuduhken maka kalak e ntah kelompok e pengikut Yesus Kristus si ihukum mate I Kayu persilang, penggelaren enda turah menaken I Antiokia abad si pemena. Jadi gelar enda labo gagah-gagahen, tapi selket kal nandangi sosok Yesus Kristus. Emaka setiap kalak si menganggap dirina Kristen berarti ia me pengikut Yesus Kristus. Saja si jadi persinget eme enggo me kita ngikutken Yesus Kristus e? Bagi temata minggu enda “NGIKUTKEN YESUS”.

Thema enda tempa enggo biasa sibegi bahken banci saja usur sibelasken: Ngikutken Yesus. Tapi sendah ibas Minggu Pasion si pe VII ken enda, kata enda mulihi mpersingeti kita, payo nge kita gundari posisinta “Ngikutken Yesus”?

Sehubungen ras Perikop khotbah Minggu enda, Markus 11:1-11 ija ituriken mbue kal jelma si ngikutken ntah pe ngarakken Yesus bengket ku bas kota Yerusalem. Tuhu erbage-bage corak jelma, latarbelakang social, pendahin, rsd. Termasuk ije murid-murid Yesus. Luar biasa sikap kalak enda nandangi Yesus. Tapi adi si oge ayat 9-10 teridah maka jelma sinterem enda amin gia ikutkenna Yesus paksa e tapi situhuna lenga bo itandaina Yesus e alu payo. Eme sababna irespon jelma sinterem kehadiren Yesus secara salah. Iakapna Yesus reh jadi raja si membebasken kalak Israel ibas penjajahen Roma. Padahal arah symbol kelede si iersak Yesus, terlebih kelede e pe si lenga pernah I ersak ertina lenga erpengalamen iersak jadi kenderaan, enggo encidahken maka situhuna Yesus labo reh ku kota Yerusalem guna jadi raja ntah pemimpin si menggerakken perang (Kelede eme symbol lemah lembut ras kemeteruken ukur), beda min ndai adi kuda si I ersak Yesus (kuda symbol kuasa). Yesus reh alu kesederhanan, semangat ngelai ras mereken diriNa.  Ia reh ku Yerusalem focus ngelakoken sura-sura BapaNa eme ngenanami kiniseran she mate I kayu persilang guna membebasken manusia ibas kuasa dosa nari. Eme sababna kedungenna kalak si nterem singikutken Yesus janahna surak-surak pehagaken Yesus e, kecewa erkiteken la bagi sura-surana ilakoken Yesus. Ibas Markus 15:13-14 isuratken maka jelma sienterem e ngatakenca “Pakuken Ia ku kayu persilang”. Cakap Indonesiana “salibkanlah Dia”. Aku la kuteh ntah kita pe pernah kecewa man Yesus. Tah kai gia sebabna. Labo dalih, tapi sendah kita ipersingeti maka tanda kita kecewa sabab lenga payo dengan penandaita Yesus Kristus e.  Berarti lit denga siman pesikapen cara ras motivasita ibas ngikutken Yesus Kristus e.

Genduari mari si sungkun banta sekalak-sekalak, posisinta genduari ija, ngikutken Yesus nge ntah ikut-ikuten ngikut Yesus? Kai dage sura-suranta ngikutken Yesus e?

Ngikutken Yesus tuhu senang ras malem ateta adi cara pengidahta kerna kegeluhen enda ibas persfektif Kerajan Sorga, tapi sebalikna adi persfektif doni enda pasti mengecewaken. Bayangken saja, kita isuruh masu-masu kalak siniksa kita (ntah pe simusuhi kita), la banci sisumpahi (Roma 12:14). Adi rejabu sada ngenca ndehara ntah perbulangen, ibas erusaha kita arus mempraktekken sifat adil ras bujur, terteki, rsd. Sienda kerina jadi mberat siakap erkiteken si tatap sekelewetta la ia bage, lit deba mbue ndeharana, bayak ka ia padahal la bagi kita e rajinna berusaha, rsd.

Tapi erkiteken pengidahta kegeluhen enda enggo secara persfektif Kerajan Sorga (secara rohani) la nai jadi beban man banta. Sipenting  ibas berusaha sigegehi ras sipakeken pe hikmat kepentarenta (berarti terus erlajar) ibas makeken peluang ras kemajun teknologi alu tetap kreatif ras inovatif, selebihna Dibata simasu-masu mereken rejeki. La gia mbue ulihna ibas usaha ras pendahinta misalna, tapi sipenting tercukupi keperlunta. Ersada arihta ibas jabu, anak-anak pe sehat ras megi ajar. Sabab salah sada ulihna tutus ngikut Yesus eme pengasuhi Dibata kita ndalani kegeluhenta I doni enda, la saja sehubungen ras keperlun geluhta tapi pe ibas kita jadi pasu-pasu man doni enda bagi si ikataken ibas Invocatio, Matius 10:40. Payo ibas keadan susah, bagi genduari misalna erkiteken virus Corona ntah covid-19 kerina nge kita ngenanami kesusahen, baik kalak sierkiniteken bagepe si lang. Tapi simembedakenca eme ibas situasi si bage kita me siarah lebena: (1) la kita saling menyalahken, la saling menghakimi; (2) tetap tenang ras yakin ibas paksana ipulahi nge bangsanta enda ibas masalah covid-19 entah virus corona enda; (3) tek kita maka ibas situasi siugapa pe Dibata erdahin guna kiniulin man kalak sierkeleng ate man BaNa, contohna enggo reh buena mimbar ingan nehken kata Dibata sabab kebaktin siban irumah-rumah,  reh buena waktunta berintraksi ras keluarga, bagepe enggo ka tambah pemeteh ras kengasupen serayan Tuhan melayani makeken teknologi, rsd; (4) tetap jadi saksi ibas situasi bagenda, labo sebalikna jadi kalak simemprovokasi reh biarna temanta she maka turah pinakitna arah medsos si ilakoken kita; (5) tetap ertoto ras ngataken bujur ibas siugapana pe.

Dage ibas Minggu Passion si pe pituken enda mari sipastiken dirinta maka kita ibas posisi NGIKUTKEN YESUS labo ibas posisi ikut-ikuten ngikut Yesus. Amin.

Artikel lain yang terkait: