Invocatio:
Kata Kristus si dem alu kinibayaken nggeluh min i bas pusuh
peratenndu. Siajar-ajarenlah kam alu kepentaren. Endekenlah masmur, ende-enden
pujin ras ende-enden pertendin. Rendelah muji Dibata dingen ngataken bujur i
bas ukurndu (Kolose 3:16)
Ogen: Ulangen 31:14-22; Khotbah: Ketangkasen (Wahyu) 12:10-17
Thema:
DITATA ENGKELENGI BANGSANA
Mejuah-juah man banta kerina, shalom, salam sehat, Tuhan Yesus tetap
simasu-masu kita.
Perpulungen sinikelengi Tuhan, ibas sada minggu enda mbue denga sidat
berita kerna covid 19, I Medan misalna lit piga-piga kekelengenta enggo
nadingken kita erkiteken virus corona enda. Sedak siakap megisa, janah tambah
ka aru ateta. Uga nge kecibal kami ateta, she maka deba pangkas pe enggo mbiar
emaka ula ateta mamang adi rempet enggo jumbon buk e, deba cukur sendiri, adi
enggo cukur sendiri sementara labo lit keahlin cukur buk me enggo me siteh uga
ulihna, deba si erbinaga kenca alokenna sen sinukur mis cucina sen e, deba
setrikana, ras sidebanna. Digan ngenda erkedungen verus enda, lenga sieteh,
saja adi kerina kita tutus ertoto jenari erdisplin, ngikuti ajuren pemerintah
ras gerejanta, tek kita lampas nge virus enda erkedungen. Bagem kondisinta
genduari.
Kata Dibata Minggu enda, Ketangkasen 12:10-17 eme nuriken uga Dibata
ngkelini bangsaNa, ngkelini doni enda rah kerehen Messias eme Yesus Kristus.
Upaya pengkeleni enda tuhu sangat dramatis. Ibenaken arah sekalak singuda-nguda
si sokeliamen si tergelar Maria, mehuli kulana janah ipetubuhna me sada anak
dilaki si iban gelarna Yesus. Ia Mesia siipadanken Dibata ngkelini bangsaNa.
Saja Juruslamat e tempa la lit ergana, tubuh I kandang asuh-asuhen, mengongsi
ku Mesir, tading ras ipebelin-belin I Nazaret itengah keluarga tukang kayu,
kenca umur 33 tahun itangkap ras ipakuken ku kayu persilang mate selaku
penjahat kelas kakap ras icap manusia si ikutuk Dibata. Tapi ibas wari si
peteluken Ia ikuburken, anak manusia sitergelar Yesus e encidahken kuasana alu
keke ibas simate nari, italukenna kuasa kematen. Endame kemenangen si luar
biasa. Janah kerina kalak sitek man Yesus Kristus enggo ibereken kemenangen
ibas kuasa kematen, janah amin gia “naga e” (iblis e) I doni enda merangi kalak
sitek alu erbage-bage cara baik halus bagepe keras eme alu bencana, pinakit,
kesialen, ras sidebanna tapi kerina kalak si setia ngikutken Yesus e ibere
kuasa jadi pemenang, labo kuasa la nai lit pinakit, labo kuasa la nai lit si la
bagi ukur, lang, tapi sekali nari ibere kuasa jadi pemenang ertina tetap
nggeluh ibas keselamaten e.
Emaka temata Minggu enda, DIBATA ENGKELINI BANGSANA eme sada persinget
ras sekaligus pengapul man banta. Persinget sabab kita pe selaku bangsaNa
erkiteken tek man Yesus Kristus enggo ngaloken pengkelini Dibata ibas kuasa
kematen nari. Janah jadi pengapul sabab tek kita pencuban sinialami kita
genduari enda eme arah litna virus corona ntah hal sibeban gia, labo lebih asa
gegeh si lit ibas kita, ibereken Dibata nge serpang pulah man kalak si tutus
ras setia ngikutken Tuhan Yesus ntah alu kata sideban iklkini Dibata nge kita.
Bahken secara ekonomi, lit nge erkiteken virus corona enda tambah pemasukenna,
anem gia secara umum lang bahken sangat berdampak nandangi kalak si erdahin
ibas sector parawisata, kulinir, pabrik ras sidebanna, sabab bagi pabrik
misalna lit arus ngelakoken pengurangen tenaga kerja, she deba arus tutup
pabrik e pe. Ibas keadan susah bagenda, tentuna kita arus tetap semangat sabab
tek kita iklini Dibata nge kita arah mereken serpang pulah. Payo labo kal
ngasup kita mprediksi keadanta ku wari-wari si reh enda, saja erpalasken
kiniteken ras pengarapenta man Dibata tek kita bagi judul lagu enda: INDAH
RENCANAMU TUHAN. Mari sibegiken kentisik lagu enda.
Bagem arah lagu enda pe reh tetapna ukurta ndalani kegeluhenta ibas
situasi jaman virus corona enda, la saja tetap ukurta tapi teridah pe kita
ngasup denga rende muji Dibata ras ngataken bujur ibas sikugapana pe sebab eme
tandana maka tuhu “Kata Kristus e nggeluh ibas pusuh peratenta” bagi si isingetken
ibas kolose 3:16, invocatiota. Amin.
0 komentar:
Post a Comment