Khotbah - Renungan Kebaktian Minggu tgl. 17 Mei 2020, 1 Kronika / Tawarikh 17:16-27

Invocatio:

Tapi adi ertoto atendu, bengketlah ku bas kamarndu, eruk pintun jenari ertotolah man Dibata si la iidah e. Dibata si ngidah perbahanenndu e mereken upah man bandu (Matius 6:6)

Ogen: Lukas 18:1-8; Khotbah: 1 Kronika (Tawarikh) 17:16-27

Thema:

ERTOTO NGATAKEN BUJUR MAN DIBATA

Mejuah-juah, shalom, salam sehat, Tuhan Yesus tetap simasu-masu kita kerina.

Perpulungen sinikelengi Tuhan, engkai maka lit istilah tidak tahu diri, bagepe kacang lupa akan kulitnya. Istilah enda ngataken maka kalak e la isedarina ise ia, la ingetna ija nari ras uga ia ndube. Bagepe lupa ia ntah pura-pura lupa ise si berjasa, ise saja si enggo berperan nampati ia maka she banci “jore”.  Kalak si bage biasana jelma si la menyenangken, kalak si labo beluh ngataken bujur, bahken kalak si mesera meteruk ukur. Banci saja menyengken, banci saja beluh ngataken bujur ntah meteruk ukur tapi adi lit ukurna (kalau ada maunya), janah biasana e ilakokenna man kalak siakapna mengentungken man bana, emaka labo ateta ikataken kalak si la tahu diri, ntah kalak si bagi “kacang lupa akan kulitnya”.

Bagem situasita genduari secara umum susah, amin gia bagi isingetken kami ibas khotbah minggu silepas maka ibas paksa jaman virus corona enda lit nge si meningkat pemasukenna, tapi secara umum labo, bahken ersusahna ibanding ope jaman virus enda. Ibas situasi bage ngasup nge kita bagi themata Minggu enda “ERTOTO NGATAKEN BUJUR MAN DIBATA”.

Adi Daud ibas bagin Kata Dibata si jadi perikop khotah 1 Tawarik/kronika 17:16-27 tuhu-tuhu alu pusuh simbages ertoto ia ngataken bujur man Dibata ntah pe alu kata sideban ngataken bujur ia arah pertotonna man Dibata. Adi secermati isi pertotonna e maka situhuna “enggo lebihsa” pe akap Daud pemere ntah pasu-pasu Dibata e ntah alu kata sideban luar biasa akap Daud pemerere ras perbahanen Dibata man bana lebih asa si ngasup ia ngukurisa, sabab Dibata pe enggo erpadan maka sinursurna jadi Raja I tengah-tengah bangsa Israel. Kerna si enda banci ninta, uelah Daud ngasup ertoto ngataken bujur erkiteken ipasu-pasu Dibata, kami genduari la bage, keadan kami reh susahna ibas jeman virus corona enda, uga ningen ertoto ngataken bujur.  Ntah labo bage lit ibas ukurta, saja enda isingetken sehubungen ras relevansi tema minggu enda ras keadaanta genduari.

Perpulungen sinikelengi Tuhan, secara logika kalak ngataken bujur eme (1) adi rulih ia ntah sinialolkenna sesuatu hal yang menyenangken ntah bagi ukurna; (2) la pe rulih, la pe bagi ukur terjadi tapi itehna si e mbaba kiniulin man bana.

Adi arah logika enda ngasup nge kita ertoto ngataken bujur man Dibata ibas keadanta si sangana susah bagenda?

Menarik kuakap kebiasanta secara umum kalak Indonesia enda, eme soal kata “UNTUNG”. Enggo pe ndabuh ras penggel nahe e nina UNTUNG tidak mati. Enggo pe mate erkiteken tabraken nina UNTUNG mayatnya masih dapat ntah manyatnya masih utuh ras sidenanna. Arah kebiasan enda akap kami, terlebih kita si enggo tek man Dibata arusna ngasup kita ngataken bujur ibas sikugapana pe bagi nina Paulus ibas 1 Tesalonika 5:18. Emaka thema ibas kebaktin Minggu enda tetap relevan, bahken tema enda menguji kita, payo nge kita orang yang tahu diri, payo nge kita orang yang tidak seperti kacang lupa akan kulitnya nandangi Dibata?

Mari ibas kesempaten enda si inget-inget ise ndube kita secara social, secara ekonomi, secara kerohanian. Secara umum kalak biasa-biasa ras kuta-kuta nari. Kadeta kin lit? Banci sebagin kalak, kalak lit memang erkiteken orang tuana. Adi jujur kita ras secara Njayo (mandiri) maka situhuna kalak biasa-biasa nge kita. Puji Tuhan genduari kita lit ibas keadanta sekalak-sekalak, sipasti lit nge peningkaten secara umum. Terlebih secara rohani, kita enda kalak perdosa kap ras kedungenna la banci lang ngaloken kematen si rasa-lalap erkiteken upah dosa eme MAUT, tapi puji Tuhan, entah uga gia carana kita banci jadi kalak singaloken perkuah ate Dibata la nai berakhir ku bas kematen sirasa lalap tapi man banta enggo isikapken kegeluhen si rasalalap erdandanken enggo tek kita man Tuhan Yesus Kristus. Adi siingetlah kerna si enda kerina, bagi Daud nginget uga bangsa Israel I pulahi Dibata ibas perbudaken Mesir nari, bagepe uga Dibata enggo ngangkat Ia jadi raja bahken erpadan erbahan sinursurna jadi raja ka, enggo pasti kita la jadi kelompok kalak YANG TIDAK TAHU DIRI ntah kalak si bagi KACANG LUPA AKAN KULITNYA nandangi Dibata si enggo mereken kita kegeluhen, mereken kerina si lit ibas kita paksa genduari enda, terlebih si enggo mereken keselamaten ibas kita tek man Yesus Kristus.

Alu bage mari bagi themna ibas Minggu enda, tetap kita ertoto ngata ngataken bujur man Dibata. Janah tek kita keleng nge ate Dibata man banta kerina, isampatina nge kita tetap ibas keadan si ugapa pe. Amin.

Artikel lain yang terkait: