Khotbah - Renungan Kebaktian Minggu Tgl. 24 Mei 2020, Matius 20:29-34

KHOTBAH MINGGU, 24 MEI 2020

Minggu Exaudi: Begiken Min Yahwe

Invocatio:

O TUHAN , dengkehkenlah pemindonku kerna kinibujuren, perdiatekenlah pertotonku mindo penampat! Begikenlah pertotonku, i bas biberku nari si la lit i je penipu (Mazmur 17:1) 

Ogen: Mazmur 27:7-14 (antiphonal);

Khotbah: Matius 20:29-34 (Tunggal) 

Thema: Erlebuh man Tuhan

Tek nge kita maka Tuhan Yesus seri nge nderbih sendah she rasa lalap? Adi tek kita, berarti tek pe kita maka Ia erkuasa nampati kita, erkuasa mereken serpang pulah ibas kerina masalah sinihadapi kita.

Saja ngenca guna ndatken perkuah ateNa e man banta, maka hal penting sipahami eme ban dalanna Dibata nehken keleng ateNa e nta pe penampatNa e. Si inget uga maka mujizat pemena terjadi, eme lau jadi anggur I kota Kana? Erkiteken enggo iban Maria dalanna eme isamping nehken perbeben si mada kerja e man Yesus, ia pe ngajari pelayan-pelayan si lit ije gelah kai pe kari si iusuruh Yesus, gelah I lakoken pelayan e.

Bagem pe ibas perikop khotbah Minggu Exaudi enda, Matius 20:29-34 banci kita tole erlajar kerna si e. Judul si ibahan LAI eme “Ipepalem Yesus dua kalak si pentang”. Kejadin enda ituriken Matius eme paksa Yesus ras ajar-ajarna bagepe enterem jelma singikutken Ia I Jeriko nari. Itepi dalan si ibentasi Yesus lit dua kalak pentang erlebuh gelah Yesus nehken keleng ateNa, tentuna kata “mekuah min ateNdu kami” bermakna pepalemNdu min kami. Tapi maknana lebih asa sekerdar pepalem, keleng ate Yesus menyeluruh nandangi kegeluhen kalak pentang enda. Simenarik kalak pentang enda labo sembarang kalak pentang sabab lit pengangkanna sekali guas kinitekenna nandangi Yesus e, teridah arah kalimat si ibelaskenna waktu erlebuh  “O Tuhan, Anak Daud! Mekuah min ateNdu ngenehen kami”. O Tuhan, Anak Daud” berarti kalak pentang enda memahami ras tek maka Yesus si mentas e eme Mesias si ijanjiken Dibata, sir eh ku doni enda jadi penampat, jadi Juruslamat. Apakah Yesus mis bertindak? Ternyata lang. Kenca dua kali kalak pentang enda erlebuh hal yang sama maka Yesus bertindak. Kai nge ertina? Sipemena, apakah kalak pentang enda sue ras pemahamenna e, maka Yesus tuhu Mesias si reh jadi penampat; sipeduaken, apakah kalak pentang enda focus kerna pemindonna e, adi fokos tentu kai pe halangenna megenggeng ras tetap ipindona. Enda terbukti adi si oge ibas ayat 31 “Itembehi kalak si enterem e ia, tapi reh gangna ia erlebuh …” Kenca si e me erpalasken mekuah ate Yesus bertindah ndadap matana, janah luar biasa duana kalak pentang enda minter erpengidah. Janah kai sinilakoken kalak pentang enda kenca erpengidah? Ngikutken Yesus.

Perpulungen sinikelenge Tuhan Yesus, arah bagin kata Dibata enda lit piga-piga hal si jadi pelajaren ras sikaligus persinget man banta eme:

1.    Dibata ibas Yesus Kristus seri nge nderbih, sendah she rasalalap. Ertina Ia Mesias e, Ia me Juruslamat e guna jadi penampat man manusia.

2.    Gelah banci penampatNa e terjadi ibas kegeluhenta, ban dalanna isampati Dibata kita. Adi kin masalah ekonomi, ban dalanna Dibata mereken rejeki man banta. Adi kin pinakit bagi kalak pentang ibas perikopta ndai, lebuhlah Yesus Tuhanta, megenggeng ras teklah maka mekuah nge atena kita, ibas paksana pasti Ia bertindah nampati pepalem pinakitta. Megenggeng berarti amin gia lit tantangen la erbahanca lanai kita fokus nandangi kai siniarapken kita, salah sada tantangen e eme sipake caranta rukur eme bage sipindu mis ateta sialoken emaka akibatna bisana kurang sabar.

3.    Fokus kerna kai sijadi harapenta ras jelas motivasinta adi harapen e ipasu-pasu Dibata. Adi kalak pentang si enggo banci erpengidah e mis ikutkenna Yesus.

4.    Inget maka I sekelewetta pe mbue denga kalak sipentang secara rohani, bagepe kekurangen-kekurangenna, keterbatasenna, si sakit secara psikis bagepe fisik si kerinana memerluken jamahen keleng ate ras kuasa Yesus. Ibas sienda, ate Tuhan Yesus make kita labo jadi penghalang tapi jadi dalan si erbahansa banci kalak sibage jumpa ras Yesus secara pribadi ras mengalami kesembuhen ras pemulihen. Silang-langna ula erkiteken kita kalak la banci jumpa ras Tuhan Yesus guna ndatken keselamaten e.

Dage mari perpulungen kerinana, imanilah setiap janji Tuhan, ula pediat keragun ras kebimbangen mpengaruhi ukur ras pusuhta, jenari erlebuhlah man Tuhan ras ban dalanna Dibata nehken janjiNa e, kenca si e tetap megenggeng, tek kita mekuah nge ate Dibata ras sampatina nge kita ibas paksana gelah alu bage kita pe banci ka jadi dalan Dibata nampati kalak si deban. Amin.

Artikel lain yang terkait: