Khotbah - Renungan Kebaktian Minggu Tgl. 12 Juli 2020, Yesaya 30:23-24

KHOTBAH MINGGU, 12 JULI 2020

Minggu V Kenca Trinitatis/Minggu Merdang

 

Invocatio:

O juma-juma, ola mbiar, tapi ersurak janah meriahlah erkiteken kerina si ibahan TUHAN man bandu (Joel 2:21)

Ogen: Heber 6:7-8; Khotbah: Yesaya 30:23-24 

Thema: Tuhan Mpeturah si Erdangkenndu

 

Mejuah-juah man banta kerina, khususna man bandu perpulungen GBKP Batam Centre si lit I rumah ngelakoken kabaktin enda secara online, shalom, salam sehat, Dibata tetap simasu-masu kita kerina.

Bagin kata Dibata siman oratenta Minggu enda eme nubuaten nabi Yesaya nandangi Yehuda ras Yerusalem. Isi nubuatanna e eme pemulihan bangsa Israel kenca enggo ngenanami kiniseran erkiteken pembuangen ku Babil, bangsa e mulihi ipasu-pasu Tuhan. Ayat 23 ibas bahasa Indonesia ikataken “Lalu TUHAN akan memberi hujan bagi benih yang baru kamu taburkan di ladangmu, dan dari hasil tanah itu kamu akan makan roti yang lezat dan berlimpah-limpah. Pada waktu itu ternakmu akan makan rumput di padang rumput yang luas”. Janah ibas ayat 24 “sapi-sapi dan keledai-keledai yang mengerjakan tanah akan memakan makanan campuran yang sedap, yang sudah ditampi dan diayak”.

Sieteh maka bangsa Israel ibuang ku babilonia eme erkiteken la patuh man Tuhan. Janah tuhu Dibata konsisten ibas kai siikatakenna eme adi bangsa Israel pautuh i pasu-pasu janah adi sebalikma la patuh man Dibata pasti iukum (Banci si oge Yesaya 30:1-14). Tentuna man banta pe selaku bangsa pilihen, berlaku ka nge si enda.  Saja ngenca Dibata perkeleng kap. Desken orang tua nandangi anak-anakna, adi bangsa Israel si la patuh e nggit jera, mulihi ikelengi Dibata bangsa enda, mulihi isehkenNa perkuah ateNa. Adi sioge Yesaya 30:18  kepeken Dibata tertima-tima segelah bangsa  Israel si la patuh e mulihi patuh ras ernalem man baNa.

Alu bage nubuaten e igenapi arah respons bangsa Israel si nggit mulihken ernalem man Dibata. Tanda jera sipaling penting eme lanai lit gana-gana kai pe si isembah bangsa enda. Alu kata sideban lanai mengandalken kuasa kai pe seyakatan kuasa Dibata. Adi bage pemulihen pasti terjadi. Saja siperlu tole itekanken eme pasu-pasu Dibata arah usaha ras pendahin sinilakoken kita tentu lit prosesna. Labo jadi-jadi bage saja. Katakenlah erjuma tentuna maka banci menghasilken arus lebe ipesikap lahan perjuman e she enggo sikap guna isuani, kenca si e me isuan ntah ierdangi, jenari ipekena-kena kai siisuan e she rani adi kin page, jong ntah sinuan sideban. Si la kalah pentingna tentuna ibas nuan pe isesuaiken musim lit udan.

Perpulungen sinikelengi Tuhan, bagem kata enda she pe man banta. Tentuna beda keadan bangsa Israel paksa e ras keadanta genduari. Amin gia bage, esensina lit nge perserina eme paksa enda kita lit ibas kiniseran erkiteken pandemic covid 19. Lit deba arus ngadi erdahin, usaha pe la nai bagi sigelgel, rsd. Keadaan enda tentuna labo ialami kalak Kristen saja tetapi bahken masyarakat dunia. Ibas situasita si bagenda kata Dibata Minggu enda ngapuli kita, maka ipulihkenNa nge kita. Sipenting genduari eme tetap ernalem man baNa. Ula erkiteken situasi sulit urak semangatta ngikuti kegiaten-kegiaten gereja, ntah pe erdauhna kita ras Dibata. Payo secara umum kita lanai ngerdang benih, terlebih kita si I Batam enda ntah I kota-kota mbelin lanai erjuma. Tapi esensina seri ka nge eme kai pe usaha sinilakoken, apakah e bisnis online, apakah e erbinaga, pegawai negeri ntah swasta ras sidebanna adi la kin ipasu-pasu Tuhan labo mabai kesejahteran ras kemalemen ate man banta ras man jabunta. Adi si perdiateken secara manjar-anjar bagin kata Dibata Yesaya 30:23-24 ndai lit ije penekanen: sipemena, maka Dibata kap erbahansa rulih ntah berhasil usaha sinilakoken kita e. Adi erjuma kin, kenca sierdangken benih e tapi adi labo lit udan labo banci turah mehuli. Kuakap kalak Tigabinanga sikitarna si erjuma nuan jong, tehna kal masalah sienda, uga pentingna udan gelah turah jong si enggo ierdangken e. Enda ngatakenca segelah kita tergantung man Dibata ras ngataken bujur man baNa. Sipeduaken, tanda pasu-pasu Dibata e eme labo saja berhasil ibas usaha, adi nuan jong kin mejile perturahna, kenca rani kena ka ergana. Tentuna la saja terjeng si e, tapi ulih e maba kesejahteran ras kemalemen ate man banta bagepe man kalak sideban termasuk rubia-rubia pe gejapken dampak pasu-pasu si maler man banta e.

Dage bagem Kata Dibata Minggu enda rikutken Tema TUHAN PETURAH SI ERDANGKENNDU, ngingetken kita: (1) Ibas situasi siugapa pe keleng ate Dibata tetap kap man banta, ipasu-pasuna nge kita arah usaha ras pendahin sinilakoken kita. Kata “Tuhan Peturah si Erdangkenndu” ibas konteksta si la perjuma berarti “Tuhan si masu-masu usaha ras pendahin sinilakokenndu kita”. (2) Mbue ntah sitek gia ulih usaha e, nikmatilah. Ula kearun ate taren ngukuri ndigan virus korona enda erkedungen piah lanai siakap ntabeh man ras tunduh pe. Anak-anak Tuhan tentuna la bage, ngasup ia tetap berpikir positif, produktif ras kreatif. Sabab tek ia ibas kai pe Dibata erdahin guna kiniulin man kalak sierkeleng ate man baNa (Roma 8:28). (3) Adi sigejapken Dibata nge si masu-masu arah pendahin ras usahanta e, tentuna kita pe jadi pasu-pasu man sekelewetta. Tentuna lit nge perpulungenta ibas jaman virus corona enda ije ka luar biasa pepasu-masun Tuhan e man bana, man bandu perpulungen si bage jadi pasu-pasulah kam ibas perhatin ras kinimelumbarenNdu. Inget lit nge rencana Tuhan e arah kam.

Dibata simasu-masu kita kerina segelah tetap setia ernalem man baNa. Amin

Mari ras ka kita ertoto. Bujur Tuhan, enggo ibegeken ras aloken kami kataNdu. KesahNdu Si Badialah pengasupken kami segelah tataNdu e la saja begiken ras aloken kami, tapi banci ipakeken kami ibas kegeluh kami. Ibas gelar Tuhan Yesus reh kami ertoto. Amin.

Artikel lain yang terkait: