Khotbah - Renungan Kebaktian Minggu Tgl. 20 September 2020, 1 Petrus 3:8-17

KHOTBAH MINGGU, 20 SEPTEMBER 2020

Minggu XV Kenca Trinitatis/Minggu Perdamen

 

Invocatio:

Tadingkenlah kejahaten, lakokenlah kai si mehuli, bulatkenlah ukurndu erbahan perdamen 

(Mazmur 34:15)

Ogen: 2 Samuel 13:23-29; Khotbah: 1 Petrus 3:8-17 

Thema: Ngelakoken Perdamen Alu Bulat Ukur

 

Mejuah-juah, shalom, salam sehat ras Dibata tetap simasu-masu kita kerina.

Perpulungen sinikelengi Tuhan, kenca enggo si oge 1 Petrus 3:8-17 maka kerina pedah si isehken Petrus man perpulungen I Asia kitik she pe man banta paksa enda desken resep si erbahanca kita banci nggeluh harmonis, cawir metua ras lit kedamen. Tentuna telu hal enda jadi perayakenta uga maka si e banci terjadi ibas kegeluhenta, sabab adi si e la lit, kerinana si lit ibas kita labo lit ertina, siban contohna: mejile ntah gagah gia nderaha ntah perpulangenta adi labo lit kiniersadan arih uga nge siakap, bagepe bayak gia kita, kadeta pe lit, pangan si ugapa pe banci si pan tapi la cawir metua, bagepe meganjangka ka jabatenta ntah sukses gia kita tapi la lit dame, mbiar katawari pe, uga nge siakap?. Emaka adi jujur kita tentu lebih baik biasa-biasa pe kegeluhenta tapi si telu hal ndai lit ibas kita eme lit keharmonisen, cawir metua ras dame.

Adi bage uga nge carana maka si telu hal ndai jadi ibas geluhta? Tentuna sipala-palai ngikutken pedah Petrus I bas perikop khotbah ndai, eme:

1. Ersada min ukur ras penggejapenndu, sikeleng-kelengen bagi ersenina ras mesayang, meteruk ukur.

2.    Ula balas perbahanen jahat alu jahat, tapi balas alu pasu-pasu, la melasken sijahat ras erbual.

3.    Nggeluh bujur, mehuli ras ngusahaken nggeluh ibas perdamen.

Payo nggeluh ibas dalan Tuhan, eme nggeluh mehuli la bo la lit tantangenna. Kinata ibas kegeluhenta si idah ntah pe mungkin pernah sialami maka erbahan simehuli e mbue kepe tantangenna. Si ban contoh, Tuhanta Yesus ibas kegeluhenna kurang lebih 33 tahun, lit kin perbahanenNa sijahat ntah si la mehuli? Lang, tapi lit ka nge kalak rate segat, she maka lit konspirasi uga menyingkirken Yesus, janah teridah berhasil ntah menang kelompok si segat atena Yesus e, she maka Yesus Mate Isalibken. Amin gia situhuna labo kemenangen kelompok e tapi kemenangen Dibata ibas sura-surana nebusi dosa manusia. Bagepe kegeluhe ajar-ajar Yesus ntah pe si igelari rasul-rasul mbue ndatken kiniseran ibas ia erbahan simehuli eme meritaken dalan keselamaten, she perpatena pe sangat menyedihken. Tapi ngadi kin Yesus ras ajar-ajar erbahan simehuli, lang. Engkai maka lang. Erkiteken; (1) biaren ia man Dibata asangken man manusia; (2) kiniseran erkiteken erbahan simehuli ipahami sebagai tanda kita sekerajangen Dibata (bd. Yohanes 15:18-19); (3) Ujian man banta, adi kita tetap megenggeng ibas pencoban e, bagi nina Jakub sialoken me rudang-rudang kegeluhen (bd. Jakub 1:12).

Sehubungen ras tema Minggu enda NGELAKOKEN PERDAMEN ALU BULAT UKUR enda sendalanen ras invocation Masmur 34:15: “tadingkenlah kejahaten, lakokenlah kai simehuli, bulatkenlah ukurndu erbahan perdamen”. Masmur 34:15 enda isehken pemasmur sehubungen ras ugakin carana kita pemuliaken Tuhan ras ndatken umur sigedang bagepe guna ngenanami keriahen ras kesangapen eme: (1) tadingken sijahat. Kai kin sijahat e tentuna kerina si langena ate Dibata, nipu kalak, la adil, erbahan simesui ate kalak, erbual, melasken kata si jahat, rsd. (2) Lakoken simehuli. Tentuna kerina singena ate Dibata bagi sikeleng-kelengen, si sampat-sampaten, la membalas kejahaten alu kejahaten tapi sebalikna bagi nina Petrus “tapi balaslah alu pasu-pasu”. (3) erbahan perdamen. Kerna perdamen enda she kepe pentingna, emaka nina Petrus ibas ayat 11b ”arus idarami tuhu-tuhu perdamen e alu bulat ukur”. Ertina lit upaya si serius ngusahaken perdamen e. Bagi Dibata ibas Yesus Kristus enggo berinisiatip mperdameken Dibata ras manusia sierdosa arah kematen Yesus Kristus, alu bage mendorong kita pe mengupayaken gelah lit perdamen. Uga carana? Salah sada bagi ilustrasi enda. Mungkin enggo pernah sibegi pe, tapi sehubungen ras tema Minggu enda iulihi kami.

Sekalak guru erbahan soal man muridna. Ibanna garis pertikal si gedangna 10 cm. Emaka isuruhna 5 kalak murid ku lebe uga carana segelah garis vertical sigedangna 10 cm e reh gendekna. Murid sipemena mis urakina 2 cm emaka jadi 8 cm, murid sipeduaken urakina ka 2 cm emaka jadi 6 cm, bagepe murid sipeteluken ras pempatken masing-masing urakina ka ter 2 cm jadi kedungenna tading 2 cm nari, tapi murid si pelimaken lain carana. Gedang garis si 10 cm ndai la urakina, tapi banna ka sada nari garis sigenangna 12 cm. Nina guru e mereken komentar man murid si pelimaken: “kamu memang bijak, memang tidak perlu mengapusnya, tapi cukup membuat garis yang lebih panjang. Maka garis pertama akan menjadi lebih pendek dengan sendirinya.

Kai nge maknana ilustrasi enda? Maknana eme ibas ngusahaken perdamen labo banci alu cara kekerasen, mengintimidasi, mengecilken kalak sideban, rsd. Sebab guna memenangken la perlu mengecilkan ntah menjelekkan yang lain, sebab bila itu yang dilakukan secara tidak langsung berarti secara tidak jujur kita memujikan diri sendiri. Ras adi bage asa digen pe labo terjadi perdamen.

Eme si enggo ilakoken Dibata gelah terjadi perdamaian antara Dibata ras manusia si enggo erdosa bagi si ikataken ibas Filipi 2:6-8 “Aminna gia tetap lit i bas Ia biak Dibata, erkuasa dingen ermulia Ia bali ras Dibata, tapi si enda la ipertahankenNa. Arah ukurna jine itadingkenNa kerina si lit i bas Ia. Jadi seri Ia ras manusia; nggeluh bagi sekalak juak-juak. Janah teridah bagi sekalak jelma. Meteruk ukurNa, janah erkemalangen Ia man Dibata seh matena pe; e me mate i kayu persilang”.

Mari siteladani kai si nilakoken Yesus ibas mengupayaken perdamen e eme nggit ia persilahang bana, nggit ia berkorban ntah alu kata sideban nggit ia talu guna memenangken, gelah terjadi pendamaian. Amin.

Artikel lain yang terkait: