Khotbah - Renungan Kebaktian Minggu Tgl. 28 Juni 2020, Kuan-kuan / Amsal 4:1-9

KHOTBAH MINGGU, 28 JUNI 2020

Minggu III Kenca Trinitas/Minggu Pendidikan

 

Invocatio:

Kenca Jesus ngidah jelma si nterem, inangkihNa sada uruk. Kenca Ia kundul reh ajar-ajarNa pulung deherken Ia. Jenari ibenakenNa ngajari ajar-ajarNa e (Matius 5:1-2) 

Ogen: Yakub 3:13-18; Khotbah: Kuan-kuan 4:1-9 

Thema: Kelengilah Kepentaren

 

Mejuah-juah, shalam, salam sehat, Tuhan Yesus tetap simasu-masu kita kerina.

Perpulungen sinikelengi Tuhan, Ibas sada wari sekalak pernanden si enggo mbentar bukna ras patah semangat reh ndahi pendetana mindo penampat segelah adi pendeta e ku kota banci min singgah ernin anakna si enggo 10 tahun ibas penjara. Janah sedekah 10 tahun e enggo usur pernanden e ngkirim sura man anakna, tapi sekali pe lenga pernah ibalas anakna. Emaka ipindona man pendeta gelah ngenehen keadaan anakna e kuga kin kecibalna, janah tole pe gelah pendeta e mereken surat ras fotona.

Emaka ibas kesempaten pendeta enda ku kota dahina me anak e ku bas penjara. Iberekenna surat ras poto nandena si enggo mbue mentar bukna e sekaligus nungkuni engkai maka anak e la sekali pe mbalas surat si ikirimken nandena. Reh nina anak e, payo enda gambar nandeku, mbarenda ope aku bengket ku penjara mbiring denga bukna genduari enggo mbentar, saja ngenja sentabi pendeta tolong ulihkendu gambar ras surat enda sabab kuinget ngenca nandeku e mis gara pernembehku e man bana, tehdu kin maka aku bengket penjara ras rate mesui bagenda erkiteken ia nge. Aku meteh erjudi erkiteken nandeku si tiap wari erjudi ras teman-temanna, bagepe minem minemen keras. Erkiteken si eme aku pe ngikuti kebiasanna e ras kedungenna tangkap polisi ras bengket penjara, genduari enggo 10 tahun, emaka adi nina keleng atena aku, kuakap e labo tuhu. Emaka tolong sehkendu mulihi surat ras gambar nandeku ena. Katakenndu maka nembeh kal ateku ia sabab perbahanenna nge maka aku bagenda.

Perpulungen sinikelengi Tuhan, adi si renungken cerita e, payo kal bagi kai siitekanken Pengerana ibas Kata Dibata si jadi khotbah minggu enda. Ajar ras keteladanen nggeluh kepeken she kal pentingna. Jadi kai pagi ateta anak-anakta e ntah generasi gantiken kita e mbue kepe tergantung man banta orang tua, alu cakap ektrimna kita sinentukenca jadi kai ateta anakta e.

Mari sinen terdauhen Kata Dibata Pengerana 4:1-9 e. Ije lit kata “begikenlah ajar nande bapandu. Megermetlah, gelah bages pengertindu. Sikuajarken man bandu e mehuli kal, emaka inget-ingetlah kerina”. Ijenda proses mereken teladan ntah usihen enggo imulai. Orang tua njadiken dirina jadi contoh man anak-anakna. Orang tua nggeluh benar sue kai siiajarkenna.

Banci jadi ninta, uga orang tua si la meganjang sekolahna, uga nina ngajarken anakna? Perpulungen sinikelengi Tuhan, kerina orang tua arusna ngasup ngajarken anakna. Bagi kesaksin Salomo ibas perikop khotbah enda, tentuna erkiteken orang tua pe ndube enggo ndatken pengajaren ibas orang tuana nari, itambahi pengalamenna nggeluh, emaka arusna kegeluhen generasi ku generasi berikutna reh sikapna, adi kin proses “wewarisen” e erdalin mehuli. Enda teridah reh ngasupna ia nggeluhken geluhna ibas zamanna jadi kalak si la saja ngasup ncukupi keperlunna nggeluh tapi pe jadi kalak si erguna ntah pe jadi pasu-pasu.

Alu bage dage, tugas orang tua la kepe cukup alu ncukupi keperlun nggeluh man anakna bagi mereken man, paken, uang jajan, sekolah si mejile, ras sidebanna. Tapi si la kalah pentingna eme “mewarisken” ajaren nggeluh eme keteladanen nggeluh mehuli, nggeluh bujur, adil, ras sidebanna terlebih nggeluh erkemalangen man Dibata. Bagepe man anak-anak, amin gia orang tuata beda jaman ras kita, ola kita mapas, ola anggap enteng sabab siniajarkenna eme ajaren erpalasken pengalamen nggeluh, terlebih pengalamen nggeluh erkiniteken man Dibata. Langna pe ibas pustaka Si badia, man anak-anak iajarken gelah mehamat man orang Tuah. Salah sada tanda mehamat man orang tua eme megiken ajarna.

Tema Minggu enda “KELENGILAH KEPENTAREN” berarti ngingetken kita uga pentingna kepentaren e nandangi kegeluhenta bagi ikataken ibas ayat 8-9 kepentaren e erbahansa kita “itinggiken ras ipehaga”. Adi bage mari man orang tua sidahiken tugasta eme “mewarisken” ajaren rikut keteladanen si mehuli man sinursurta labo sebalikna bagi cerita I das ndai. Teladan si la payo mabai kegeluhen si la payo ka man anak-anakta janah enggo pasti mesui pagi atena, tapi sebalikna ajar ras teladan si mehuli mabai kesangapen nggeluh man anak-anakta. Amin.

Artikel lain yang terkait: