Khotbah - Renungan Kebaktian Minggu Tgl. 26 Juli 2020, 2 Tesalonika 3:6-15

KHOTBAH MINGGU, 26 JULI 2020

Minggu VII Kenca Trinitatis/Minggu Peningkatan Ekonomi Jemaat

 

Invocatio:

Kalak si nangko gelgel nari, olanai ia nangko. Erdahinlah ia alu mehuli guna ncariken keperlunna, janah gelah lit i bas ia guna nampati kalak si i bas kepiceten (Epesus 4:28)

Ogen: Ulangen 8:11-20; Khotbah: 2 Tesalonika 3:6-15 

Thema: Nggit Erdahin Alu Latih

 

Mejuah-juah man banta kerina, shalom, salam sehat ras Tuhan Yesus tetap simasu-masu kita kerina.

Perpulungen sinikelengi Tuhan, kai si ikataken Paulus ibas Invocatio, Epesus 4:28 jelas, eme kalak si enggo tek man Kristus, kalak si enggo jera lanai ndalanken kegeluhenna bagi sinai ope lenga itandaina Kristus. Secara sederhana ban Paulus contohna eme kalak sinangko gelgel nari, ola nai ia nagko. Tapi bukti jera la kepe she terjeng ngadi nagko tapi ngganti profesi dahin simehuli, si la ngerugiken kalak sideban. Terdauhen adi si gar-gari engkai maka jelma nangko?  Banci mbue sebabna, tapi secara mendasar tentuna erkiteken la atena latih-latih erdahin tapi terpenuhi kebutuhenna salah sada cara eme nangko. Eme sababna terdauhen I tekanken Paulus kenca lanai nangko, erdahinlah alu mehuli guna ncariken keperlun nggeluh. Erdahin mehuli berarti dahin e la dahin si nembeh ate Tuhan bagi nangko (termasuk koropsi, nipu-nipu, la bujur, rsd), jenari erdahin mehuli berarti pe la malas-malas, tapi rajin, tutus, ulet, pekerja keras, rsd.

Kerna uga kin arusna biak anak-anak Tuhan menyikapi keperlun nggeluhna, ibas 2 Tesalonika 3:6-15 tole ilayasi Paulus, bahken cendrung keras sabab idah Paulus la berbanding lurus PENGARUH agama e ras kinata nggeluh khususna sehubungen ras ngelitken keperlun nggeluh. Terlebih bagi ikataken ibas ayat 11 maka lit piga-piga perpulungen perkisat, la kaipe ibahanna guna ncariken keperlun geluhna seyakatan ncampuri sekerajangen kalak.

Arah kai si isehken Paulus ibas bagin khotbahta Minggu enda situhuna mpersingeti kita mulihi maka: sipemena, selaku kita kalak Kristen “erdahin” ningen e kepeken tanggung jawab si melekat ibas manusia. Adi e tanggungjawab berarti lit reward ras punishment ije (lit penghargan ras ukumen). Adi sidalanken tanggungjawab e alu mehuli tentuna ngena ate atasen simereken tanggungjawab e man banta tapi adi sebalikna tentu irawaina bahken ihukum alu mbue cara, misalna adi kin kariawan banci ipengadi ndahiken tanggung jawab e. Sipeduaken, pemimpin kepeken arus ncidahken teladan ibas ndahiken tanggungjawab e. Enda me si isaksiken Paulus arah geluhna, tutus ia erdahin, kerja keras ia ncukupi keperlunna tapi la e ka erbahansa abat ia ibas erberita simeriah. Sipeteluken, kata “Kalak si la nggit erdahin ula bere man” bagepe “ula perkuanken gelah mela iakapna” lit kepe tanggungjawabta ngajarken kalak sibage. Ibas keadaan tertentu perlu ka pengajaren sikeras gelah kalak si bage banci robah. Misalna nandangi kalak si bermental peminta-minta padahal kecibalna memungkinken ia erdahin ncukupi keperlunna nggeluh, perlu iajarken ras iarahken. Epe sada tanggungjawab ka nge man banta si enggo jera.

Temata “nggit erdahin alu latih” eme sada reseb uga mengentasken kemiskinen. Sabab tema enda selket kal ku masalah mental. Sabab kata latih e mbue jelma adi banci ula min latih. Eme sababna mbue denga kemusilen itengah-tengah masyarakatta. Musil labo erkiteken sumber alam, tapi mental. Mental la nggit latih. Janah merubah mental e la nukah, lit ije perjuangen, lit ije perlu keteladanen, bagepe system simendukung perubahen mental e itengah-tengah masyarakat. Salah sada guna merubah mental e bagi si isingetken Paulus ibas ayat 10 (kalak si la nggit erdahin ula bere man) bagepe ayat 14 (ula perkuanken gelah mela akapna), jenah tentuna e ilakoken alu keleng ate ntah gelah ia robah labo sebalikna erkiteken  segat ate. Emaka ibas ayat 15 isingetken Paulus gelah kalak sibage ula ka siakap ia imbang. 

Perpulungen sinikelengi Tuhan, mari ibas Minggu peningkaten ekonomi jemaat enda sievaluasi dirinta selaku kalak si enggo erkiniteken man Kristus Yesus. Mental siuga nge si lit ibas kita, mental pekerja keras ras nggit latih erdahin ntah sebalikna mental pemalas. Kitalah sekalak-sekalak ibas pusuhta njababsa. Si pasti kalak Kristen si enggo bertobat berarti memahami erdahin alu latih eme desken tanggungjawab si arus sicidahken ibas kegeluhenta. Jenari ibas erdahin alu latih e banci saja berhasil, kurang berhasil ras banci ka gagal. Ibas si e adi enggo lit ibas kita mental pekerja keras ras mggit latih erdahin erkiteken bage kin biakna kalak Kristen tentuna adi berhasil la ia ngelupaken Tuhan ntah meganjang rukurna bagi isingetken ibas ogenta Ulangen 8:11-20, adi kurang berhasil ntah gagal la ka e erbahansa ia putus asa tapi sebalikna secara kreatif ras inovatif terus igegehina erdahin alu latih.

Dage mari siban tekadta ibas Minggu peningkaten ekonomi jemaat enda. Enggit kita kerina erdahin alu latih sabab eme pendilo selaku kalak si enggo tek man Kristus. Janah tek kita kalak si ngelakoken tanggungjawabna alu mehuli eme nggit erdahin alu latih, ipasu-pasu Tuhan. Amin.

Mari ka ras kita ertoto. Bujur Tuhan, kataNdu enggo ibegiken kami. KesahNdu Si Badialah si pengasup kami la sekedar megiken ras ngaloken kataNdu e tapi ngasup kami makekenca ibas geluh kami, teridah jendanari ku wari-wari si reh enda nggit kami erdahin alu latih. Ibas gelar Tuhan Yesus reh kami ertoto. Amin.

Artikel lain yang terkait: