KHOTBAH
MINGGU, 2 AGUSTUS 2020
Minggu
VIII Kenca Trinitatis/Perawatan Inventaris Gereja
Invocatio:
Dage iterusken kami me pekena tembok e, janah lanai ndekahsa enggo dung setengah asa ganjangna, sabap ergiah-giah ukur bangsa e erdahin (Nehemia 4:6)
Ogen: Yohanes 2:13-17; Khotbah: 2 Kronika 24:1-14
Thema:
Pekena-kena Rumah Pertoton
Ngerana kerna rumah pertoton banci ipahami gedungna bagepe jelmana. Duana pengertin rumah pertoton e arus ipekena-kena ntah irawat. Janah duana sendalanen. Pernah jadi tahun 1996 iban me perjumpan ras piga-piga kalak perbesi I Medan ncakapken rencana merenovasi gedung gereja GBKP Perbesi. Sekalak tokoh si hadir ibas perjumpan e eme mantan Bupati Karo, Tampak Sebayang (alm) nungkuni kami utusen si I Perbesi nari nina “gereja siuga nge nuate ibangun?” Penungkunen enda ngingetken kami paksa e maka membagun gedung gereja penting tapi la kalah pentingna pe membangun ntah pekena-kena anggota perpulungen e sendiri gelah erbuah meramis. Alu bage jadi jelas man banta ibas minggu perawaten inventaris gereja enda kita ijemba segelah mperdiateken ras pekena-kena rumah pertoton e ibas erti dua hal ndai. Adi e silakoken, pustaka sibadia naksiken maka kita ikelengi ras ipasu-pasu Dibata tapi sebaliknya ndauh pasu-pasu e ibas bangsana nari bagi isingetken ibas Hagai 1:1-11
Kata Dibata sijadi khotbah ibas Minggu enda naksiken kerna sie. Uga raja Joas amin gia umur 7 tahun iangkat jadi raja, tapi semangatna pekena rumah pertoton luar biasa. Ikataken ibas ayat 4 “la ndekahsa kenca Joas jadi raja, iputuskenna pekena rumah pertoton”. Simenarik ibas upaya pekena rumah pertoton e eme: si pemena, carana pepulung dana guna pekena rumah pertoton e. Kepeken sura-sura ras semangat ngenca labo ndungi tapi arus kepe alu kreatif uga mengupayaken maka lit dana guna pekena rumah pertoton e. Tantangna keputusen raja e la erdalin bagi arusna erkiteken duit si ipepulung imam ras kalak Lewi alu lawes ku kota-kota Juda la erdalin bagi siniarapken, eme sababna raja nuruh kalak Lewi erbahan cara sideban eme erbahan peti guna ingan pepulung duit jenari itamakenna I bas pintu gerbang rumah pertoton alu pengelayasi erpalasken aturen si itetapken Musa eme tep-tep rakyat Juda ras Jerusalem gelah mereken man Tuhan pajak guna nampati pembangunen rumah pertoton, janah ulihna luar biasa seh maka cukup dana guna pekena rumah pertoton e. Sipeduaken, pembangunen e iendesken raja man si ertanggungjawab pehuli rumah pertoton e. Siertanggungjawab enda me si ndarami tukang si iperluken ras bagi isingektken ibas ayat 13 “kerina sierdahin e tutus, emaka rumah pertoton e nggo ka mulihi bali ibahanna ras tangtangna ndube, bagepe perpaguhna”.
Arah kai sinilakoken raja Joas enda tentuna mereken inspirasi bagepe usihen man banta maka selaku anggota ngawan perpulungen hal penting silakoken eme mperdiateken rumah pertoton e, lit nge siman pekenan, lit nge siman tambahen? Bagepe kulata selaku rumah pertoton lit nge siman pesikapen? Genduari ibas jaman pandemic covid 19 enda ija rumahta enggo jadi gereja guna ersembah tiap Minggu, lit nge man pesikapen gelah reh sikapna mtah reh khususkna kita kebaktin? Tentuna kita sekalak-sekalak simetehsa. Sipenting perlu si inget eme ula kita pilit ntah mbiar-biaren pedarat sen gelah sikap kita ersembah man Dibata. Baik kerna pesikap gedung gereja, kulata selaku rumah pertoton, bagepe sarana si iperluken ibas kita kebaktin irumahta ibas jaman virus corona enda. Adi gedung gereja kin, amin piga-piga bulan enda lanai kita kebaktin ije tapi gedung e arus terus irawat, payo adi iarapken terjeng kolekte ras persepuluhen bagepe persembahen-persembahen sideban sitading bas runggun e tentuna labo bias, emaka erlajar kita nandangi raja Josia ibas hal ngukuri uga jalan keluar guna lit dana e. Tentuna banci mbue cara, saja kai pe cara silakoken hal penting perlu itekanken eme sipemena, pemahamen maka si ipekena kita e eme rumah pertoton, adi rumahta banci sipesikap mejile engkai maka rumah pertoton ntah rumah Dibata lang!. Terlebih labo sada dua anggota jemaatna ibas sada runggun ntah perpulungen, tapi ratusen bahken lit deba ribuan, adi iras-ras ken tentu banci mbue iban ibas pesikap rumah pertoton e. Sipeduaken, ibas ogen Yohanes 2:13-17 isingetken uga kelengna ate Yesus rumah pertoton e, she maka merawa kal Ia ngidah rumah pertoton e isalah gunaken. Adi litlah pemahamenta si payo kerna rumah pertoton bagi si icidahken Yesus ibas pengogenta, tentu keleng atete rumah pertoton e, ras keleng ate e tentuna icidahken arah semangat ras ergiah-giah pesikap rumah pertoton e.
0 komentar:
Post a Comment