Khotbah - Renungan Kebaktian Minggu tgl. 24 Januari 2021; Nats: Yunus 3:1-10

KHOTBAH MINGGU 24 JANUARI 2021

 

Invocatio:

Engkelengi Dibata ertina patuh man perentah-perentahNa. Perentah-perentahna e labo mberat” (1 Yohanes 5:3).

O g e n  : Markus 1:14-20; Khotbah: Juna 3:1-10

Thema: Perkuah ate Dibata mereken kegeluhen

 

Renungen ….

Perpulungen sinikelengi Tuhan, ibas Minggu Epiphanias si pe 4 ken enda, arah bagin kata Dibata Yuna 3:1-10 tole naksiken ise kin Dibata e ras secara khusus pe ncidahken biak Dibata si dem perkuah ate.

Ibas pasal 1 Ituriken maka isuruh Dibata Juna lawes ku Niniwe lako nehken momo maka kota e enggo ersalah, kejahatenna enggo tangkas man Dibata (Juna 1:2), berarti adi pengadilen ndai kin maka hakim enggo ndatken bukti kejahaten maka kalak Niniwe ersalah ras patut ihukum. Tapi simenarik eme tangtangna Juna la nggit ndahiken tugas enda eme sebabna maka lompat ia ku Tarsis. Engkai maka bage? Sabab menurut pengakap Juna kalak Niniwe enggo patut ikernepken janah lanai perlu ikataken nari, tambah si e erkiteken ieteh Juna pe salah sada biak Dibata eme dem perkuah ate, adi kalak Niniwe jera pasti la sahun iukum Dibata (Juna 4:2). Tapi upaya Juna menghindar gagal sabab ibas perdalinen terjadi bencana gelumbang si mbelin si erbahansa kapal si inangkihina e menam bene. Kapal e selamat kenca Juna ibenterken ku lawit jenari itelen nurung ras kenca telu wari telu berngi ia I beltek nurung, iutahken nurung me ia kudaraten ras selamat. Kenca mengalami sienda kerina me maka waktu reh kata Tuhan si peduaken gelah ia lawes ermomo kerna kejahaten Niniwe, lanai ia pang nogan, amin gia momo si isehkenna e bahasana desken hakim mereken vonis hukumen mate nandangi terdakwa si terbukti ersalah. Nina “Empat puluh wari nari ikernepken me kota Niniwe”. Kota Niniwe e tuhu mbelin, ibas ayat 3 ikataken telu wari erdalin nahe maka terbentasina kota e.

Kai respons raja ras anak kuta Niniwe e? Enda si menarik. Ternyata anak kuta e labo ngelakoken perlawanen nandangi Juna, kalak enda la tersinggung. Ibas ayat 5-6 ikataken tek anak kuta bagepe raja nandangi kata Dibata si isehken Juna e. Bahken ikataken  “Kenca ibegi raja Niniwe kerna si e, nusur ia i bas kursi kinirajanna nari, itangtangina jubahna, jenari ipakena uis guni, e maka kundul ia i bas abu”,  jenari raja pe erbahan momo gelah kerina rakyatna erbahan puasa alu la man ras minem bagepe asuh-asuhen kerina. Kerina jelma arus make paken guni bage pe asuh-asuhen. Sekalak-sekalak arus tutus ertoto man Dibata, janah itadingkenna lagu langkahna si melket dingen ipengadina perbahanen-perbahanen si jahat. Endame sada demontrasi pertobaten si luar biasa icidahken kalak Niniwe. She maka ibas ayat 10 ikataken “Iidah Dibata kai si ilakoken kalak ndai; iidahNa pe maka lanai ia ngelakoken perbahanen si jahat. E maka salih ukur Dibata, janah la surung iukumNa kalak e aminna pe enggo ikatakenNa iukumNa ateNa”.

Perpulungen sinikelengi Tuhan, arah kata Dibata enda ndai tentuna enggo mereke pengertin man banta kerna ise kin Dibata e sekaligus mpersingeti ras mpegegehi kita pe. Lit piga-piga hal penting jadi penekanen man banta:

1.       Erlajar kita arah sikap kalak Niniwe, eme: (1) Tek ia man kata Dibata si isehken nabi Juna; (2) Kata Dibata e la terjeng begikenna, tapi berdampak peturah kesadaren uga jahatna ia sedekah enda, uga ganasna ia nandangi bangsa sideban, jenari icidahkenna tanda kinijeranna,  (3) Lit pengharapenna “Mbera-mbera salih ukur Dibata; mbera-mbera olanai ateNa nembeh, maka ola kita mate! (ayat 9).  Enda jadi renungen sekaligus evaluasi pe man banta kerna kegeluhenta selaku bangsa Tuhan, kai nge enggo si cidahken tanda kita tek nandangi kata Dibata? Enggo me teridah tanda-tanda pertobaten? Litna pengarapen erbahansa kita erpala-pala nggeluh sentudu ras peraten Tuhan.

2.      Payo tempa ibas perikop enda teridah Dibata la konsisten nandangi kai si iputuskenna, eme la sahun ngukum kalak Niniwe.  Kerna sienda perlu si eteh engkai maka Dibata bage. Pertama, rencana pengukumen nandangi kalak Niniwe labo pelampiasen dendam ntah memuasken nafsu rawa Dibata, tapi pelin-pelin guna menegakken kebenaren ras keadilen. Sipeduaken, Dibata si dem keadilen ras kebenaren e pe Dibata dem perkuah ate. Tangtangna nari sura-sura Dibata eme ncidahken keleng ateNa, labo ngelakoken hukumen si enggo irencanakenNa. Enda icidahkenna arah nuruh Juna ermomo, lang me banci langsung ikernepken. Tapi la bage ilakoken Dibata, arah momo si isehken Juna Dibata ncidahken kebenaren ras keadilenNa maka rencana penghukumen e tuhu-tuhu enggo patut ilakoken. Waktu 40 wari si ibelasken Juna banci pe ipahami maka lit denga kesempaten robah. Janah respons pertobaten anak kuta Niniwe erbahansa Dibata la sahun ngukum ntah pe engkernepken kuta Niniwe. Enda sendalanen bagi si isingetken ibas 2 Petrus 3:9b “Tapi saber Ia nandangi kam, sabab la ateNa sekalak pe ikernepken, tapi gelah kerina jera ibas dosa-dosana nari”. Tambah si e adi kalak Niniwe enggo bertobat, jenari mindo kal ia perkuah ate Dibata, tapi Dibata tetap ngukumsa berarti banci ikataken Dibata berlaku sewenang-wenang labo Dibata si adil ras Dibata si dem perkuah ate. Emaka Dibata labo la konsisten tapi sebalikna ia konsisten sebab tangtangna nari situhuna sura-sura Dibata mereken kegeluhen erkiteken perkuah ateNa.

3.    Temata eme PERKUAH ATE DIBATA MEREKEN KEGELUHEN. Tema enda jadi kesimpulen uga Dibata erkiteken perkuah atena ngidah kalak Niniwe si jera la sahun ikernepken tapi banci tetap nggeluh. Janah puncakna perkuah ate Dibata e eme ibas kematen Yesus Kristus I kayu persilang. Ija arah kematenNa e kita ngaloken kegeluhen si rasa lalap ibas tek man Yesus Kristus. Tentu tandana kita tek labo sekedar eragama Kristen, ntah erburaken salib, bagepe tutus ersembah, lang, tapi bagi nina ibas invocation eme ibas kegeluhenta teridah kita engkelengi Dibata arah patuh man perintah perintahNa ras si la kalah pentingna eme jadi ajar-ajarna naksiken perkuah ate Dibata ibas Yesus Kristus e (Pengogen, Markus 1:14-20).

Dage mari kita kerina ngataken bujur, sabab perkuah ateNa si mereken kegeluhen, labo saja man kalak Niniwe tapi pe man banta kerina si enggo tek man Yesus Kristus, jenari mari ka si saksiken perkuah ate Dibata e arah kerina dampar geluhta.

Perpulungen sinikelengi Tuhan, ibas kebaktinta enda pe silakoken me Lakon Persadan Sibadia, kenca kita sada pecan enggo ngelakoken Kebaktin Pekan Penatalayanen. Arah lakon enda tole ngingetken kita perkuah ate Dibata si mbelin e, sabab Lakon Persadan Sibadia enda ngingetken kita uga Tuhan Yesus enggo mereken dirina man banta gelah kita banci terkelin. Emaka mari siikuti kari Lakon Persadan Sibadia alu dem pengataken bujur janah ertekat guna menatalayanken gegeluhenta, jabuta, terkhusus anakta selaku generasi muda gelah jadi pasu-pasu. Amin.

Pdt. Sabar S. Brahmana, S.Th, MA

Artikel lain yang terkait: