Khotbah - Renungan Pekan Penatalayanan Wari 7, Sabtu, 23 Januari 2021; Nats: Yeremia 29:11-14

KHOTBAH PEKAN PENATALAYANEN WARI 7

Sabtu, 23 Januari 2021

 

Invocatio:

Manusia ersura-sura, tapi Dibata kap si erbahan keputusenna (Kuan-kuanen 16:1).

O g e n  : Roma 8:29-30; Khotbah: Yeremia 29:11-14

Thema  : Rencana Dibata Mehuli

 

Mejuah-juah man banta kerina, shalom, salam sehat, Tuhan yesus simasu-masu kita kerina.

Kata Dibata ibas kebaktin pecan penatalayanen wari si pepituken enda, Yeremia 29:11-14 eme sada bagin kata Dibata si usur ikutip ras I khotbahken, sabab bagin enda tole mpersingeti kita kerna rencana Dibata simehuli nandangi bangsaNa, nandangi kita kerina. Kai kin rencanana ntah sura-surana Dibata e? Ibas ayat 11 jelas ikataken  … “e me gelah kam senang  labo  gelah  cilaka. RencanangKu  e  me  mereken  wari  si  pepagi  bagi  si iarapkenndu”.   Tuhu   luar   biasa   rencana   Dibata   e, sierbahansa turah keriahen dingen semangat pe, saja masalahna eme apakah kita tek ras menyakini rencana Dibata e ibas kegeluhenta? Terlebih konteks Yeremia 29 enda eme bangsa Israel sangana I bas pembuangen ntah alu kata sideban eme ibas kesusahen. Janah ibas ayat 10 ikataken Dibata arah nabi Yeremia maka kenca 70 tahun nge bangsa Israel banci mulihi ku Yerusalem, labo 2 tahun bagi si ikataken nabi Hanania ibas Yeremia 28:3. Sementara secara umum jelma ngarapken adi banci meter bene kesusahen e, tentuna kalak Israel si lit ibas pembuangen e pe bage, ngarapken uga maka meter banci mulih ku kutana ntah negarana selaku bangsa si merdeka. Tempa la nyambung ras kai si isingetken ibas ayat 11. Engkai maka rencana simehuli e la meter ilakoken, engkai maka harus nimai 70 tahun? Sementara bangsa Israel lit ibas kesusahen selaku bangsa si itaban? Banci saja lit perukuren bage, erbahansa meraguken kai si ikataken Dibata arah Yeremeia enda. Payo kin la nyambung? Tentu lang adi sieteh latar belakangna engkai maka bangsa Israel tertaban ku Babilon. Sababna eme erkiteken rawa Dibata nandangi bangsana si la nai setia, la nai patuh man baNa. Pembuangen ku Babilon desken ukumen bapa nandangi anakna gelah sedar ibas kelepakenna jenari robah. Jadi peristiwa pembuangen e pe situhuna sendalanen ras rencana Dibata simehuli nandangi bangsaNa. 70 tahun iarapken jadi kesempaten man bangsa Israel lako introspeksi diri jenari adi kin e sekolah banci naik kelas she maka terjadi pembaharuan pusuh bagi si isingetken ibas ayat 12-13 teridah alu bulat ukur idaramina Tuhan. Enda me siniarapken Dibata arah pengukumen e. Janah janji Dibata tentu ya dan amin, pasti nge isehiNa.

Perpulungen sinikelengi Tuhan, kai nge relevansina kata Dibata enda nandangi kegeluhenta paksa enda? Sipasti kita labo kalak sisangana ibas pembuangen, amin gia secara umum kita lit ibas situsi susah erkiteken pandemic codid 19 si lenga siteh ndigan erkedungen, ija dampakna luar biasa la saja terjeng masalah ekonomi tapi pe ku bas masalah psikis, mbiar, aru ate, erguapa ndia, piah turah pe pinakit. Payo kesusahen terjadi labo kerina erkiteken la patuh man Dibata ntah kurang erkiniteken bage pe erkiteken malas, emaka ula ka kita saling menghakimi. Sabab lit nge siidah tutus nge atena ersembah man Dibata, rajin ka nge ia erdahin, tambah si e pengidah ta pe ia kalak bujur nge tapi kegeluhenna lit ibas kesusahen, ibas si e kata Dibata enda mpersingeti kita gelah tetap erpengendes man Tuhan, yakinilah maka rencana Tuhan e mehuli nge nandangi kita, perlu ije lit kesaberen ras tetap ersada ukur ibas jabu adi kin enggo erjabu, buktiken kata Dibata e ya dan amin. Teklah labo  ipediat  Dibata  kita  bene,  bagi   si isaksiken Paulus ibas Roma 8:28 “Sieteh maka i bas kai pe Dibata erdahin guna kiniulin man kalak si erkeleng ate man baNa, e me kalak si enggo ipilih Dibata arah sura-suraNa”. Jenari kata Dibata enda pe mpersingeti kita gelah tetap lit ibas koridorta selaku anak-anak Dibata. Ula ka kita stress adi la jadi bagi sura-suranta, sabab domainta eme  terjeng ngerencanaken kegeluhen ras pendahinta ngenca jenari dahiken alu tutus, selebihna terserah Tuhan ntah pe keputusenna lit ibas tan Tuhan. Bagi si isingetken ibas invocation kuan-kuan 16:1 “Manusia ersura-sura, tapi Dibata kap si erbahan keputusenna”.

Alu bage dage banci sisimpulken eme: 

1. Sura-sura Tuhan nandangi kita kerina eme gelah kita senang labo cilaka, bagepe guna mereken wari sipepagi bagi siniarapken kita. Saja ngenca arus sipahami maka janji Tuhan enda labo berarti meniadaken masalah, sipasti kai pe masalah si lit labo pernah ngasup ngolangi rencana Tuhan si mehuli e man banta.
2. Rencana Dibata simehuli nandangi kita e arus ka kepe isikapi alu sabar/megenggeng, jenari alu bulat ukur ndarami Tuhan ertina tutus ersembah man Tuhan ras ngelakoken singena atena.
3. Tetaplah tek nandangi janji Tuhan e. Enda penting sabab godan sipaling mberat eme kinata kegeluhenta si tep-tep wari si lenga denga bagi si irencanaken Tuhan e, she maka banci kita terpedaya janji-jani kosong ibas doni enda nari. Emaka tetaplah tek nandangi janji Dibata e ntah kai gia situasi sisangana terjadi ibas kita. Teklah bagi si ikataken Dibata ibas Yeremia 29:10 ....kuperdiateken me kam dingen janjingKu pe kusehken. Janah ibas 2 Petrus 3:9 ikataken “Tuhan tidak lalai menepati janji-Nya, sekalipun ada orang yang menganggapnya sebagai kelalaian …

Perpulungen sinikelengi Tuhan, ibas wari pepagi, ibas kebaktin Minggu silakoken me Lakon Persadan Sibadia, mari dage siikuti sakramen enda alu dem ketutusen ras pengataken bujur erkiteken Yesus Kristus enggo mereken diriNa gelah kita terkelin. Alu bage dage arah sakramen enda pe jaminen man banta maka kai si ipadanken Dibata ntah siirencanaken Dibata man bata jadi me bage. Amin.

 Pdt. Sabar S. Brahmana, S.Th, MA

Artikel lain yang terkait: