Khotbah - Renungan Kebaktian Minggu Tgl. 31 Januari 2021; Nats: Lukas 4:31-37

KHOTBAH MINGGU 31 JANUARI 2021

MINGGU SEPTUGESIMA

Invocatio:

“Kata e enggo jadi manusia, janah Ia ringan i tengah-tengahta. Enggo idah kami kemulianNa si mbelin, e me kemulian si ibereken Dibata man baNa erkiteken Ia Anak Dibata si Tonggal. Anak e encidahken lias ate ras kai si benar kerna Bapa e” (Yohanes 1:14)

Ogen: Mazmur 111:1-10; Khotbah: Lukas 4:31-37

Tema: Yesus erdolat dingen erkuasa

 

Mejuah-juah man banta kerina, shalom, salam sehat, Tuhan Yesus tetap simasu-masu kita kerina.

Perpulungen sinikelengi Tuhan, Minggu enda kita enggo mengketi Minggu Sebtuagesima (Minggu pepitupuluhken) eme Minggu simabai kita guna nginget masa-masa ija Tuhan Yesus ngalaken percuban rikut ras erbage-bage kiniseran tupung Ia ngelai I doni enda. Adi sioge Lukas 4 enda mulai ayat sipemena she ayat 30, ija ituriken lit 2 momentum siterjadi nandangi Yesus kenca iperidiken I lau Jordan. Sipemena Yesus icubai Iblis 40 wari I gurun pasir, ije ituriken maka Yesus menang ngalaken percuban e. Sipeduaken la saja Yesus itolak I Nazaret, kuta ingan Ia ipebelin  tapi lit upaya munuhsa (ayat 29) sabab la teraloken kalak e kai sinikataken Yesus maka bagin kata Dibata ibas Yesaya si niogekenNa enggo igenapi ibas diriNa. Tapi ibas si e kerina la erbahansa sitik pe surut  semangat Yesus  ngelai sue ras missiNa reh ku doni enda. Eme si icidahken arah bagin kata Dibata si jadi khotbah ibas Minggu enda.

Ituriken kenca Yesus itolak I Nazaret lawesa me ia ku Kaparnaum eme sada kuta I Galilea. Kuta e kitik tapi meriah erkiteken aktifitas perniagan. Kai sinilakoken Yesus I kuta enda? Ibas ayat 31 ikataken Ibas wari-wari Sabat (berarti la sekali saja, tapi berulang) ngajar Ia man kalak si nterem. Enda ngatakenca teraloken anak kuta Kaparnaum e pengajaren Yesus. Adi siperdiateken seterusna bagin nats khotbah enda lit dua hal simenarik ije ituriken. Sipemena, kesan anak kuta maka Yesus ngajar dem alu kuasa. Ertina lit wibawa ras kuasa arah kata si ibelasken Yesus bengket kubas pusuh simegikenca. Alu kata sideban lit aura si luar biasa ibas Yesus nari. Sipeduaken, ibas rumah persembahen e lit kalak si setanen. Aneh memang, banci ka kepe kalak si reh ersembah ku rumah pertoton e setanen, alu kata sideban la kepe mehangke setan e reh ku rumah persembahen. Enda pe jadi pelajaren man banta maka ula siakap I gereja la pang setan reh, bahken banci jadi enggo ia erbahan ibas rumah pertoton e. Tanda-tandana tentu banci teridah arah mbue hal. La pe ikataken kuakap siteh nge kerina, sipasti ija hadir setan, ija lit kuasa roh jahat ije lanai lit dame, lanai lit keriahen. Tapi puji Tuhan kehadiren Yesus erbahansa setan e mbiar, nggirgir dingen lawes ibas kalak sisetanen e. Sabab bagi si isingetken ibas ayat 34 tandai setan e kal ise Yesus. Janah Yesus la nggit kompromi ras setan ntah roh jahat e amin gia tempa ipujiken roh jahat Ia alu ngataken “Kam me si Badia si reh ibas Dibata nari”, sabab iteh Tuhan Yesus kai tujun setan e, eme meneken manusia. Eme sababna mis nina Yesus “Sinik! Ndaratlah ibas ia nari! Emaka idampes-dampesken setan e kula kalak si setanen e janahna ndarat”.

Tentuna ngidah si e la saja kalak si enterem kemamangen, tapi pe takjub, sabab Yesus e Erdolat ras Erkuasa.

Perpulungen sinikelengi Tuhan, arah kata Dibata enda lit piga-piga hal si banci jadi pelajaren sekaligus mpegegehi kita kerina:

1.   Meriah ukurta sabab enggo banci kita tek man Yesus  Kristus eme Kata / irman si enggo jadi manusia janah ringan itengah-tengahta (Invocatio Yohanes 1:14), janah arah kesaksin pustaka sibadia enggo icidahkenna kemulianNa, kuasaNa guna nampati manusia. Labo saja mpelawes setan tapi pe man kalak si erkemalangen man baNa iberekenna rejeki (Pengogen Mazmur 111:4-5).

2.   Tetaplah kita metenget sabab setan ntah roh jahat e labo saja lit ibas ingan-ingan si la payo tapi pe banci ia hadir I gereja janah kehadirenna tentu labo maba si mehuli. Sebalikna erbahansa lanai lit keriahen ras kemalemen ate. Ibas si e metengetlah kita kerina, sabab banci saja la sisedari roh jahat e kepe si enggo mengendaliken kita, teridah arah pengeranata, sikapta ntah perbahanenta ras sidebanna.

3.   Temata “Yesus erdolat dingen erkuasa”. Arah kata Dibata ibas Minggu enda ncidahken si e, ija Yesus erkuasa pelawes setan ntah pe roh jahat. Berarti kuasana melebihi kuasa roh jahat e. Arah si e pe ngatakensa man banta sendah maka kuasa Yesus Kristus ngasup mulahi kita ibas sifat-sifat si langena ate Dibata bagi anceng, cian cekurak, ngasup mulahi kita ibas gaya hidup konsumeris bagepe hedonis,  mulahi kita ibas iketen dendam, emosi si la terkendali, bagepe kuasaNa ngasup mulahi kita ibas cengkramen dosa si maba kita ku bas kematen si rasa-lalap. Emaka ula ragu nandangi kuasa Yesus. Teklah man bana, jenari tutuslah reh ku perpulungen, tutuslah megiken kataNa. Jenari man banta kerina singgejap lit denga kuasa roh jahat si ngerimrim kita arah sifat-sifatta, gaya hidupta, kebiasanta si la payo si la ngena ate Tuhan katakenlah ibas gelar Yesus keluarlah dari diriku/ndaratlah ibas aku nari. Teklah maka jadi me roh jahat e nadingken kita. Janah ulihna malem ateta, meriah pe siakap katawari paksa pe. Amin.

Pdt. Sabar S. Brahmana

Artikel lain yang terkait: