PENELAHAN ALKITAB (PA) MAMRE TGL. 31 JANUARI - 6 FEBRUARI 2021

PA MAMRE GBKP TIBAN-BATAM

TANGGAL 31 JANUARI - 6 FEBRUARI 2021

 

OGEN : Mazmur 119:97-104

Tema : CIGA ATEKU KATA LA TUHU

Tujun : Gelah Mamre:

1.       Erkeleng ate nandangi Undang-undang Dibata erbahansa Mamre pintar asangken kalak sideban ibas makeken TI

2.       Nilahken kerina perbahanen si jahat dingen ciga atena kata la tuhu.

 

Penjelasen

Payo maka ibas kerina situasi Dibata tetap erdahin ibas kegeluhenta segelah tetap kita ngasup nerusi kegeluhenta tentuna sentudu ras peratenna, amin gia deba lang. Terkhusus ibas ncidahken kegeluhenta selaku anak-anak Tuhan, selaku mamre teridah arah tutus ersembah man Dibata si erdambah kubas nggeluh erpalasken Undang-undang Tuhan ntah pe kata Dibata si terus-menerus si orati, sibegiken ibas ersembah man Dibata e.

Emaka labo kebetulen adi GBKP ibas tahun 2020 ija sasaren program eme makeken teknologi informasi. Janah TI enda me si enggo mbue sipake ibas nerusi pelayanen gereja mulai akhir bulan Maret 2020 she genduari. Bagem cara Dibata erdahin ibas kegeluhenta secara gereja, tentuna secara pribadi-pribadi pe segejapken ngenda, amin gia banci saja reh urakna pemasuken saja ngenca adi jujur kita luar biasa cara Dibata ngasuhi kita, emaka sipenting jadilah kita Mamre singena Dite Dibata. Ibarat anak ndai, adi anak e ngena ateta, jadi ateta, kuakap la pe pindona si ibutehkenna e enggo leben sisikapken, malah siterbaik siban.

Bagem kesaksin pemasmur ibas bagin kata Dibata sijadi ogen PAnta. Ituriken uga nina Pemasmur ersaksi: “Lanai tanggung keleng ateku man undang-undangNdu, kukusur-kusur i bas ukurku gedang-gedang nu wari” (ayat 97), bagepe “Andiko, entebu kal aturenNdu, tebun asangken tengguli” (ayat 103). Engkai maka bege nina Pemazmur? Sabab kalak situtus megiken kata Dibata jenari ngkusur-kusursa, nginget-ngingetsa maka berdampak ntah pe erbahansa Pemazmur, bagepe kita kerina:

1.  Pentaren asangken imbang-imbang  (lebih bijaksana dari pada musuh-musuhku). Biasana adi pintaren kita asangken “musuh-musuhta” labo digan pe kita kemalun, rugi, ndabuh adi kin ibas politik (banci sibandingken peresidenta Joko Widodo), terlebih pe adi kin makeken TI khususna ermedsos la kita terpancing, la kita ikut-ikuten erbahan komentar si la payo. Kata lebih bijaksana banci pe ikaitken ku bas pemakaian TI e.

2.  Pengertinku ngelebihi pengertin guru singajari aku.  Luar biasa, janah payo bage adi geluhta I control, I bimbing, I arahken kata Dibata e. Sabab bagi nina ibas Kuan-kuanen 1:7 “Guna ndatken pemeteh, si pemenana si la banci la lit i bas kalak e me mehamat dingen erkemalangen man TUHA”.

3.  Belinen  kepentarenku asangken orang-orang tua. Enda pe ngingetken kita maka kalak si enggo metua lenga tentu pintar. Sabab ukuren pintar eme adi ikutkenna kata Dibata e. kalak singikutken kata Dibata e pastilah amin gia nguda denga ia tapi hormat kalak man bana sabab la lit si la mehuli ibas ia, baik pengerana, ibas perbahanen, abas ketutusen ersembah, ibas ncidahken kekelengen ras sidebanna.

4.  Perbahanen jahat isilahken (ayat 101), ciga kal ateku kata la tuhu. Jelas dampak kalak situtus megiken kata Dibata, bagi kesaksin pemasmur ibas ayat 97 ras 103) eme nggeluh si ncidahken perubahanen ku arah si mehuli, nggeluh singena ate Tuhan antara lain pang ras ngasup nilahken sijahat, pang ras ngasup melasken kata situhu, ciga atena kata si la tuhu. Terlebi ibas paksa genduari ija pemaken teknologi tempa enggo mendominasi nggeluh manusia, alu kata sideban baik sekolah, erdahin, beribadah, guro-guro, curhat, bisnis enggo pake teknologi, maka ibas si e perlu kal kata Dibata e mengontrol kita, mengarahken ntah membimbing kita sekaligus mpegegehi kita segelah ngasup kita nggeluh bagi singena ate Dibata, antara lain nilahken sijahat, ras ciga ate kata si la tuhu.

Arah PA enda iarapken segelah kerina Mamre banci pe tutus ersembah man Dibata, ngikuti kegiaten-kegiaten gereja ija Kata Dibata tetap siorati. Janah perlu pe sitekadken  gelah ibas tiap megiken kita Dibata, ntah ise pe nurikenca tutuslah gelah she kit ape bagi penggejapen Pemazmur “Andiko, entebu kal aturenNdu, tebun asangken tengguli” (ayat 103). Amin.

 Pdt. Sabar S. Brahmana, S.Th, MA

Artikel lain yang terkait: