Khotbah - Renungan Kebaktian Minggu tgl. 17 Januari 2021, Nats: Yohanes 1:43-51

KHOTBAH MINGGU TGL. 17 JANUARI 2021

Invocatio:

Kai si enggo ibegindu i bas aku nari i lebe-lebe nterem saksi, endeskenlah man kalak si ertanggung jabab, si ngasup ngajarkenca ka man kalak si deban (2 Timotius 2:2)

O g e n  : Mazmur 139:1-12; Khotbah: Yohanes 1:43-51

Tema: Jesus Anak Dibata, Raja Israel

Renungen…

Perpulungen sinikelengi Tuhan, kata Dibata siman oratenta ibas Minggu II Kenca Epiphanias enda, Yohanes 1:43-51 (ndai enggo iogeken), enda tole ncidahken ise kin Yesus e, ras kai missina reh ku doni enda. Situhuna adi sioge Yohanes 1 enda mulai ayat sipemena, Injil Yohanes enggo terang ras tegas naksiken maka Yesus e eme Dibata si enggo jadi manusia (Bd. Ayat 1 ras 14), janah tujunna pe isingetken eme maba terang man manusia (ayat 4-5) ras kasakai kalak si tek iberekenNa hak jadi anak-anak Dibata (ayat 12), eme kalak si ngaloken pasu-pasu ras lias ate si la erkeri-kerin (ayat 16). Guna missi e Yesus pe milih ajar-ajarna. Janah si menarik eme ajar-ajar si ipilihna e erbage latarbelakang baik pendahin bagepe karatristikna. Lit penjala ikan, lit pemungut cukai, lit ka ibas keluarga terpandang bagi Yohanes anak Zedebius ras sidebanna bagepe kerna sifat lit bagi Tomas adi la idahna la ia tek, Petrus si percikcik she maka ipersokenna Yesus 3 kali, Yudas Iskariot si ndayaken Yesus, bagepe Natanael (Bartolomeus) si bujur, tulus ras terbuka she maka kai si lit ibas ukurna mis belaskenna.

Ibas bagin kata Dibata enda ituriken me uga Yesus milih Filipus ras Natanail jadi ajar-ajarna. Adi Filipus bage jumpa nina Yesus “mari, ikutken aku”, mis ikutkenna Yesus, tek ia maka Yesus si ndilo ia e eme Mesias bagi si isingetken Musa ibas kitab Undang-undang bagepe ibas kitab nabi-nabi. Pengelamen Filipus si luar biasa e mis isaksikenna man Natanael temanna, tapi lain Filipus lain ka Natanael. Natanael la mis tek, bahken ikoreksina pe Filipus temanna e, maka la mungkin si mehuli reh I Nasaret nari. Nasaret eme kota siterkenal paksa e la mehuli, khususna ibas masalah moral.  Emaka manurut Natanael mustahil Mesias asalna Nasaret nari. Penolaken tek man Yesus e la erbahansa Filipus sebagai teman tersinggung, bagepe Filipus la nggit berdebat soal argumentasi Natanael e, tapi sinilakoken Filipus eme ngajak Natanael gelah jumpa ras Yesus: “Marilah sinehen”.

Perpulungen sinikelengi Tuhan, Kenca jumpa ras Yesus, pandangen Natanael pe berubah kerna Yesus e she maka dungna ia pe tek man Yesus, nina Natanael: “Kam kap Anak Dibata! Kam me Raja kalak Israel”. Engkai maka bage? Sabab icidahken Yesus kuasana ibas Ia nandai Natanael secara mbages she ku sifatna pe amin gia lenga pernah jumpa ras Natanael ibas ayat 47b,  nina Yesus “Enda me kalak Israel asli, la lit si palsu I bas ia” (ertina ibas diri Natanael la lit si pekulah-kulah, ia bujur, tulus ras terbuka), bagepe kengasupen Yesus meteh kai si ilakoken Natanel ope reh ndahi Ia. Iteh Yesus maka Natanael menolak kesaksin Filipus kerna Yesus eme Mesias erkiteken asalna I Nazaret nari, bagepe iteh Yesus Natanael I teruh batang ara ope ijumpai ras idilo Filipus.  Perban si e me Natanael takluk, pusuh ras pandangenna nandangi Yesus berubah she maka pengidahna lanai terjebak ku bas hal lahiriah bagi asal Yesus, tapi ku diri Yesus si erkuasa e, emaka nina: “O Guru, Kam kap Anak Dibata! Kam me Raja kalak Israel”. Ertina tuhu Yesus e eme si isingetken Musa ibas kitab Undang-undang ras kitab nabi-nabi alu kata sideban Yesus e me Juruslamat si ipadanken Dibata. Menanggapi pengakun Natanael e, nina Yesus: "Perbahan Kukataken Kuidah kam i teruh batang ara, maka kam tek man bangKu? Pagin idahndu me kejadin-kejadin si belinen asangken si enda." Jenari nina Jesus man kalak e (man ajar-ajar si enggo leben ipilihna), "Idahndu me pagi talang Surga jenari nangkih-nusur malekat-malekat Dibata ndahi Anak Manusia si isuruh Dibata."

Perpulungen sinikelengi Tuhan, arah kata Dibata enda tole mpersingeti sekaligus petetap ukura ibas kita ndalani kegeluhenta selaku ajar-ajar ntah pe kalak si enggo tek man Yesus Kristus selaku Tuhan ras Juru Slamat.

1.     Sue ras tema: YESUS ANAK DIBATA, RAJA ISRAEL ngingetken kita maka payo Yesus Kristus si enggo iperingeti ke tubuhenNa ibas Natal tuhu-tuhu ia me Mesias si ipadanken Dibata lako jadi penampat man manusia. Yesus Anak Dibata, Raja Israel berarti lit ibas ia keleng ate selaku anak Dibata ras sekaligus kuasa selaku Raja. Alu bage dage tek kita maka keleng nge atena kita kerina, kesahna pe enggo iberekenna man banta kai ka hal sideban si jadi keperlunta, terlebih ia pe Raja siertina lit ibas Ia kuasa guna nampati ras mulahi kita ibas kerina masalah siniahadapi kita. Tambah sie bagi isingetken ibas pengogen Mazmur 139:1-12 maka ieteh Dibata nge kita ibas siugapana pe. Nina Pemazmur: kerina si kuban itehndu, ope denga pe aku ngerana enggo leben itehNdu, adi nagkih aku ku langit enggo kam ije, adi medem aku ibas doni kematen, Kam pe ije. Kai ertina enda? Sipemena, lanai perlu kita mbiar ibas ndalani kegeluhenta sebab ibas kerina keadan kegeluhenta lit kap Dibata hadir lako nampati kita; sipeduaken gelah ula nai kita erbahan si la mehuli bagi erbual, koropsi, nokohi, perbahanen-perbahanen si langena ate Dibata amin gia banci saja la lit jelma metehsa tapi Dibata metehsa kap, sabab ibas Dibata la lit si terbuni.

2.   Mari selaku ajar-ajar Tuhan Yesus, si baba kalak gelah jumpa ras tek man Yesus bagi sinilakoken Filipus nandangi Natanael, baik arah lisan bagepe arah kesaksin geluhta si berubah ras erbuah. Amin.

Pdt. Sabar S. Brahmana, S.Th, MA

Artikel lain yang terkait: