Khotbah - Renungan Pekan Penatalayanan Wari I, Minggu 17 Januari 2021; Nats: Yohanes 15:13-17

PEKAN PENATALAYANEN WARI I

Minggu, 17 Januari 2021

 

Invocatio:

Alu bage tuhu me si tersurat i bas Pustaka Si Badia, "Abraham tek man Dibata, janah erkiteken kinitekenna ialoken Dibata ia rembak ras diriNa." Erkiteken si e maka igelari ia teman Dibata (Jaobus 2:23).

O g e n : 1 Samuel 20:11-27; Khotbah : Yohanes 15:13-17

Tema:  KAM TEMAN-TEMANKU

Nai nari she genduari manusia eme mahluk social ertina sada mahluk si bersosialisasi sada ras sidebanna. Eme sababna setiap jelma labo mungkin la membuthken kalak sideban. Emaka ise pe kita pasti memerluken kalak sideban jadi teman ntah sahabat. Saja ngenja guna ndatken teman ntah sahabat si mehuli, kai ka teman ntah sahabat si tuhu-tuhu mengerti kita labo nukah. Biasana teman ibas senang mbue, tapi teman ibas susah lang. Emaka lit lagu nina: ada uang abang sayang, tidak ada uang abang melayang. Bagem kinata doni enda. Bahken lit ka teman maba cilaka man banta, misalna teman si ngajuk kita erbahan si la mehuli.

Ibas pekan penatalayanen wari sipemena enda, bagin kata Dibata si jadi khotbah eme Yohanes 15:13-17, janah temata: KAM TEMAN-TEMANKU. Tema enda eme kai si ibelasken Yesus ibas ayat 14. Ibas ayat 16 I kataken maka Ia nge similih kita jadi temanNa. Berarti aku ras kam kerina kita la erdobahen si enggo tek man Yesus Kristus ras si ndalanken kai si ipedahkenNa man banta berarti kita sah teman ntah sahabat Yesus. Kai kin si ipedahken Yesus e? Ayat 17 ikataken “dage pedahku man bandu: sikeleng-kelengenlah kam”. Berarti indicator payo kita teman Yesus eme adi kita sikeleng-kelengen sada ras sidebanna, baik anak jabunta, tetanggata, teman gerejanta ras kerina kalak si ijumpai kita. Kekelengen e erbahansa la nai lit belat-belat ntah baleng-baleng sada ras sidebanna gia banci saja beda agama, suku, buaten lit ras sidebanna. Selaku teman Yesus Kristus kita pe arusna ncibalken dirita jadi teman ka man kalak sideban, termasuk man anak-anakta. Enda penting sabab megati orang tua la ngasup jadi teman nandangi anak-anakna seh maka anak-anak e ndarami teman diluar orang tuana si banci saja la jelas kiniulinna nandangi anakta e, piah dungna anakta e salah jalan. Terlebih ibas jaman genduari ija penggunan teknoligi luarbiasa masifna she maka amin gia la ndarat rumah banci mbue teman-teman anakta e. Genduari mbue group pertemanen, baik arah facebook, whatsapp, tuwiter, instagram, ras sidebanna. Arah si e saja lenga tentu kerina mehuli, kai ka si terang-terangen la kin mehuli bagi komunitas ntah pertemanen judi online, game online khusus dewasa, ras sidebanna. Kerna sienda kerina kita arus metenget, khususna menyikapi pertemanen ija jaman genduari enggo buen ilakoken secara dunia maya. Khususna man banta orang tua, siupayakenlah gelah banci kita jadi teman man anak-anakta pe. 

Perpulungen sinikelengi Tuhan, jadi teman Dibata tentu bangga kal kita. Sabab Ia me taman situhu-tuhu man banta.

1)  Selaku teman, Tuhan Yesus rela ngasamken kesahNa. “Labo lit keleng ate si belinen asangken keleng ate kalak si nggit ngasamken kesahna guna teman-temanna” (ayat 13). Enda me si enggo ilakoken Tuhan Yesus I kayu persilang lako nebusi dosa manusia ntah pe lako jadi kahulta.  Alu bage, ngerana kerna pertemanen situhu-tuhu harusna itandai alu kerelan berkorban: korban waktu guna nemani, korban tenaga guna nampati, korban erta lako berbagi, bahken korban perasan adi ibas sada paksa kita ikhianati temanta e.

2)    Selaku sahabat ntah teman, Tuhan Yesus ngajak kita ngikuti teladanNa (banci ioge ibas ayat 12). Kai teladanNa e? Ibas ngelakoken pelayanen, Yesus la pernah pilih kasih. Kerina iajari ras ielaiNa tanpa ngenen status, pendahin bagepe pe kinibayaken. Ise pe si reh ku Ia ialokenNa. Ise pe sierlebuh man baNa ialoi ras isampatiNa. Bagem kepe arusna selaku teman situhu-tuhu: Ia pandang bulu, la membeda-bedaken, la diskriminatif. Saja ngenja kinatana mbue jelma reh ndahi Tuhan bagepe ndeheri temanna alu motif si rendah eme guna ndatken pasu-pasu, kesembuhen ras kesuksesen dirina saja. Eme sababna mbue jelma gagal jadi teman alu tulus. Emaka arah kata Dibata enda mpersingeti kita kerina selaku teman Yesus kristus gelah ngikuti perintah ras teladanNa. Perintah e eme gelah sikeleng-kelengen alu la membeda-bedaken.

3)   Selaku teman ntah sahabat, Tuhan Yesus enggo peseh  kerina si enggo ibegiNa ibas Bapana nari (ayat 15). Alu kata sideban Tuhan Yesus enggo mbukaken rahasia-rahasia si mbelin man manusia eme ise kin Dibata e, rencaNa bage pe tujunNa nandangi manusia, kecuali wari kiamat ntah wari pendungi, Bapa ngenca metehsa. Alu bage dage Ibas jadi teman si tuhu-tuhu arusna lit keterbukan sada ras sidebanna, tetap sikeleng-kelengen ibas siugapana pe, la lit dusta, la lit si itutup-tutupi. La lit udang di balik batu, ras sidebanna.

Perpulungen sinikelengi Tuhan, malem ateta erkiteken kita ijadiken Dibata temanNa. Labo teman biasa tapi teman situhu-tuhu ikelengina alu ngasamken nta pe ngorbanken kesahna gunata. Adi mereken kesahna pe Ia nggit, tentu sampatina nge kita ibas ndalani kegeluhen enda, labo pediatNa kita bene ibas perbeben si nihadapi kita. Payo teman sinikelengi kita ibas doni enda banci saja nadingken kita, tapi temanta ntah sahabatta si tuhu-tuhu eme Tuhan Yesus e pasti la pernah nadingken kita. Heber 13:5b “Asa ndigan pe la kam Kutadingken, asa ndigan pe la kam Kupulahi”. Hal si seri isingetken Dibata pe man Josua: O, Josua, ise pe la ngasup naluken kam kidekah kam nggeluh. Aku ras kam bagi Aku enggo ras Musa. Aku tetap ras kam, la ndigan pe kam Kutadingkenlang (Josua 1:5). Alu bage tentu reh tetapna ukurta ibas ndalani kegeluhenta ku wari-wari sireh enda amin gia keadan tempa reh suahna, sabab maslah vandemi covid 19 lenga siteh digan erkedungen. Bahken info siisehken pemerintah ibas bulan Desember silepas ras januari 2021 enda luar biasa peningkaten kalak siterpapar virus enda. Emaka sipenting man banta, silakoken pedah Tuhan Yesus e ibas geluhta lako erbuah meramis ibas sikeleng-kelengen. Erbuah meramis itengah-tengah jabunta, itengah-tengah gereja, bagepe itengah-tengah masyarakat. Si jadiken pe dirinta jadi teman man kerina jelma, bagi Yesus enggo jadiken kita temanNa alu engkelengi kita bahken mereken kesahna pe man gunanta. Jadi teman simehuli berarti pe bagi pertemanen Daud ras Jonathan ibas pengogenta. Jonathan milih ngkapiti ntah memihak Daud asangken bapana raja Saul sebab iteh Jonathan maka Daud pihak sibenar. Ikataken pe Jonathan ngkelengi Daud bagi dirina jina.  

Mari si dalani kegeluhenta ibas tahun 2021 enda alu menatalayanken dirinta jadi teman man kalak sideban bagi Kristus enggo jadiken kita temanna. Amin.

Pdt. sabar S. Brahmana

Artikel lain yang terkait: