Perpulungen Jabu-jabu (Pjj) tgl. 7-13 Februari 2021; Mazmur 8:4-9 "Dibata mereken kemulian ras kehamaten man manusia"

PJJ TANGGAL 7-13 FEBRUARI 2021

 

DIBATA MEREKEN KEMULIAN

RAS KEHAMATEN MAN MANUSIA

MASMUR 8:4-9

(Konfesi GBKP: Manusia)

 

Ibas Pjj minggu silepas enggo sicakapken kerna Tempas Dibata ibas diriNdu erpalasken Kejadian 1:26-27, janah ibas paksa e pe enggo ilayasi erpalasken konfesi GBKP Bab IV eme kerna Manusia. Ibas Minggu enda tole ka si cakapken kerna Dibata mereken kemulian ras kehamaten erpalasken kata Dibata Mazmur 8:4-9, janah tetap kita ilayasi erpalasken konfesi GBKP Bab IV kerna Manusia.

Ngerana kerna manusia berarti ngerana kerna dirinta selaku tinepa Dibata. Erpalasken mazmur 8:4-9 tole isaksiken pemasmur arah puji-pujinna ise kin manusia e.

Payo adi si nin kerina tinepa Dibata si lit ibas doni enda, apai ka bagi nina pemasmur adi tare kulangit tempa kita la ergegeh, tempa manusia kitik, tapi si luar biasa eme manusie e iinget Dibata, ipkena-kena Dibata, iposisiken Dibata ibas posisi si teruhen asangken Dibata ngenca, janah man manusia ibereken kemulian ras kehamaten, tambah si e ibahan Dibata pe manusia jadi mitraNa, wakil Dibata I doni guna merentah kerina tinepa Dibata sideban.

Arah kai siisaksiken Pemazmur enda jelas maka man manusia si itepa menem seri ras Dibata e (segambar dengan Allah), tuhu-tuhu iposisiken Dibata meganjang kal. Arusna si e sisyukuri sekaligus erpala-pala nehi kai peran si ibereken Dibata man banta manusia ibas kehadirenna I tengah-tengah doni enda alu mehuli.

Dibata enggo mereken kemulian ras kehamaten berarti kita kalak meherga, emaka ula cibalken ntah perlakuken dirinta la meherga, alu:

• La kita nembah tinepa sideban seyakaten Dibata si enggo nepa kerina sinasa lit.
• Sicidahken maka kita terdepan mpermuliaken Dibata baik arah puji-pujinta bagepe arah kerina pengkebetta.
• La cengeng/lebay ntah mis laboh adi lit kenca percoban sebab bagi si isingetken Pemasmur maka iinget Dibata nge kita, ipekena-kena Dibata nge kita. Ula sipekitik man banta. Inget maka man banta enggo ibereken kemulian ras kehamaten. Biasana kalak si bage adi bas kerja adat ingan kundulta pe enggo beda asa sienterem, rikut pangan ras sikap kalak man bana.
• Memahami kata raja, kata merentah kerina tinepa sideban (ayat 7) labo berarti kita banci rate-ate. Lang. Sebab ibas Kejadin 2:15 isingetken maka manusia e tugasna eme ngusahai ras njagai kerina tinepa Dibata e, berarti selaku raja manusia ertanggungjawab ibas ngaturken kerinana e gelah tetap lit ibas kiniraturen, harmonisasi ras bermanfaat guna kiniulin nggeluh ras-ras situjuanna eme gelah ermulia Dibata. Emaka alu bage isamping kebutuhen manusia tercukupi, doni enda pe lit ibas kecibalna si mehuli si enggo dube itepa Dibata alu predikat mehuli.

Dage bagenda me kata enda isehken, segelah arah Pjj berngi enda pe banci mulihi kita menyadari ise kin kita selaku manusia I lebe-lebe Dibata ras I tengah-tengah tinepa sideban. Kepeken kita tinepa si meherga sabab man banta manusia ibereken Dibata kemulian ras kehamaten. Mari sikataken bujur man Dibata arah kerina pengkebetta si ncidahken kita erkemalangen man Dibata.

 

Diskusi

1. Turiken erti teruhen asangken Dibata dingen jadi raja nandangi tinepa sideban. Ertina manusia iposisiken lebih mulia, lebih erkuasa asangken tinepa sideban, tapi selaku raja labo banci rate-ate tapi tugasna eme bagi siisingetken ibas Kejadin 1:28 ras Kejadin 2:15 eme naluken, nguasai ras njagai kerina gelah tetap lit ibas kiniulin guna kemulian Dibata.
2. Daftarken perbahanen si perlu silakoken jadi tanda kita njaga kemulian ras kehamaten si enggo ibereken Dibata man banta manusia. (Ngergai tinepa sideban alu la rate-ate, ngusahai ras njagaisa gelah doni enda mehuli, perbahanenta sesuai ras kehamaten ras kemulian si ibereken Dibata e alu la nembah tinepa Dibata seyakatan Dibata si enggi njadiken kerina si nasa lit e. Ngelakoken kebenaren ras keadilen, ngelakoken pelestarian, ras sidebanna).

Pdt. Sabar S. Brahmana

Artikel lain yang terkait: