Monday 7 May 2012

Khotbah Matius 5:13-16, Pekan Keluarga Wari II (Senin, 4 Juni 2012)

Introitus :
“Sibahanlah sada bilik kitik ibabo tarum,jenari sitamaken ije sada ingan medem,sada Meja,sada kursi,ras sada lampu,gelah adi rehkenca ia ndahi kita banci ia tading I je”.
( II Raja-raja 4:10 )
Ogen : II Raja-raja 4:8-13; Khotbah : Matius 5:13-16
Thema :
Jabu kalak Kristen jadi sira ras terang

Kata Perlebe
Jabu kalak Kristen eme sada lembaga si i tepa Dibata, labo bekas pemikiren ras kebeluhen manusia tapi si isikapken ras i tetapken Dibata erpalasken pemere ras perkuah ateNa (Kej.2:18-24 ; Ep.5:31,32). Erpalasken sie anggota keluarga: Bapa, nande, anak ras sitading ibas jabu mesikel kubas suasana nggeluh ibas kiniteken. Tanda-tanda geluh jabu kalak Kristen teridah ibas ; mesikel ngasuhi kiniteken man Dibata arah Yesus Kristus, nandai Yesus Kristus simada geluh jabu ras rusaha nehken singena ateNa, tutus ibas ertoto, erbahan kebaktin keluarga sebagai sada sarana si kreatif guna mbina keluarga Kristen si tutus ras setia, ngergai Pustaka Sibadia sebagai Kata Dibata si meherga man kegeluhen jabu, ngikuti ras muat bagin ibas dahin-dahin gereja, ras mesikel rende muji Dibata ibas kecibal geluhna, siergan dingen sihamaten sada ras sideban, sikelengen erpalasken keleng ate Kristus.

Sura-sura Dibata arah geluh jabu kalak Kristen eme jadi jabu si maba kiniulin man kalak sideban, teridah, tergejab entah pe ernanam desken sira ras terang man doni enda. Jabu kalak Kristen jadi saksi si nggeluh si empermuliaken gelar Dibata i benaken arah perukuren, pengerana ras pebahanen. Tentuna kita pe ertedeh ate nuju suasana jabu sibage rupana, sekaligus jadi sikap ras tanggung jawab geluh jabu kalak Kristen sepanjang Zaman.

Pendalaman Nats
Matius 5 : 13 – 16, eme sada bagin khotbah Yesus idatas uruk si nuriken pengajaren Yesus kerna sira ras terang. Tujun pengajaren Yesus la saja man ajar-ajarNa, tapi man kerina jelma baik secara pribadi, kelompok-perpulungen entah pe gereja, termasuk jabu kalak Kristen. Ibas ay.13, Bagi sira si seh kal perluna guna pangan, bage pe kam nandangi kerina manusia. Sira eme kebutuhan, banci mempengaruhi nanam( rasa ) jadi entabeh, la sebatas kulit luar/ dangkal tapi meresap seh kubas ras jadi pengawet. “….bage pe kam man manusia”ertina: geluh jabu kalak Kristen, kehadiran, perukuren, pengerana,pebahanenna, ibas pendahin, ibas pergaulen, penampilen ras perhatianna njadiken keriahen,kemalemen ate ras rasa nyaman man kalak si deban. Kehadiren kalak Kristen maba berkat/pasu-pasu ras perdamen. Kehadiren nabi Elisa irumah kalak bayak i Sunem maba keriahen siluar biasa,jabuna ndatken tuah sekalak anak dilaki,( Ogen II Raja-raja4:16-17 ). Kekelengen ras penampat kalak Kristen la setengah-setengah/tanggung, tapi utuh seh tuntas-erkedungen. Jabu kalak Kristen mempengaruhi labo ipengaruhi biak daging kula entah pe keriahen ras tuntuten duniawi.(Roma 12:2; I Yoh.2:15-17).

Ay.14-16,” Bagi terang si seh kal perluna ibas gelap, bage pe kam nandangi doni enda”. Terang mengubah suasana sigelap jadi terang,jadi petunjuk nuju ku kegeluhen ras keselamaten secara daging kula ras pertendin. Erkiteken sie, lapatut maka terang e ibuniken entah itutupi, tapi icidahken, itamaken ibas ingan si payo, ibas ingan si meganjang/utama gelah kerina banci iterangina, ngidah ras nggejabken terang e. Kegeluhen jabu kalak Kristen jadi inspirasi kalak sideban entah pe doni enda,nggeluh sebagai anak-anak terang, guna nggeluh ibas kebujuren,kebenaren ras keadilen.( Epesus 5: 8-9 ; Rom.2:19 ;Pilipi2:15;Yoh.8:12 ). Jabu kalak Kristen mengutamaken dingen mengedepanken kiniersadan nggeluh ibas Kristus,meneladani biak Kristus,ibas kiniteruken ukur ras keleng ateNa, jadi biak jabu kalak si tek.( Pilipi2:1-11).

Pointer Aplikasi
  1. Jabu kalak Kristen eme sada lembaga si itepa ras itetapken Dibata,jadi saksi si nggeluh ibas mewujudnyataken sira ras terang man doni enda.
  2. Ngawan perpulungen secara pribadi, bage pe arah jabuna banci jadi saluren berkat/jadi saluren pasu-pasu Dibata man kalak sideban.
  3. Jabu kalak kriten jadi inspirasi man kalak sideban,ibas perukuren, pengerana ras perbahanen, nggeluh ibas kebenaren,kebujuren ras keadilen. Menciptakan,menumbuh kembangken suasana simbaru,si peturah perdamen ras ate malem.
  4. Jadi sira ras terang eme biak nggeluh jabu kalak Kristen,si empengaruhi doni lako nggejabken kehadiren ras keberadanta, mabai kalak sideban lako nandai Yesus Kristus ras nggejapken keleng ate Kristus ibas geluhna ras empermuliaken Dibata ibas perdalanen geluh jabuna.
Majelis Jemaat GBKP Tambun
Pdt. Terima Tarigan
( O81362435124 )


Artikel lain yang terkait:



0 komentar:

Post a Comment