Suplemen Bimbingen Pjj tanggal 20-26 Mei 2012, Ibrani 12:1-11

Ogen : Heber 12 : 1 - 11

Tema : “Jesus Kristus Eme Sumbul Kinitekenta”

Tujun :
a) Gelah ngawan ni perpulungen erlajar ibas kinitekenna man Yesus.
b) Gelah ngawan ni perpulungen encidahken “buah” kinitekenna.

Cataten

(1) Ibas Ibrani 11:1 enggo irumusken penulis Heber kerna definisi “kiniteken” eme “Erkiniteken ertina tek nandangi kai si iarapken kita, tek kerna si la idah”. Kai kin siniarapken kita? Tentuna mbue siniarapken kita, tapi sinomor sadana eme “keselamatenta” (nggeluh sirasa lalap ras Bapa I Surga sidem kesenangen e). Kerna sienda lenga siidah, tapi erkiteken penandaita Dibata ibas Yesus Kristus, dingen tek man bana maka tek kita kai sinikataken Pustaka Sibadia kerna ulih kiniteken e. Alu bage kuakap banci kita ngangkai themata “Yesus Kristus eme sumbul kiniteken”. Kerina siniarapken kita sue ras janji Tuhan arah Pustaka Sibadia, khususna keterkelinenta sumbulna eme Yesus Kristus. Tanpa Yesus Kristus si enggo keke ibas simate nari sia-sia me pengharapenta kerna keterkelinen (1 Korintus 15:14, 17).

(2) Kiniteken e desken perlomban. Alu kata sideban kiniteken e terus iuji. Emaka segelah menang ibas perlomban e:

• arus siikuti alu tutus, dem kesabaren ras kinigenggengen (bd. Ibr 10:36; Fili 3:12-14). Uga carana maka banci menang? Carana seri ras cara ibas Ibrani 11:1-40, bagepe maju terus seh kukedungenna (bd. Ibr 6:11-12; 12:1-4; Luk 21:19; 1Kor 9:24-25; Fili 3:11-14; Wahy 3:21).
• Siikuti alu ngagui kerina singambati ibas perdalinen e eme dosa sincerawisi kita (ayat 1,4).
• Memfokusken geluh ras pusuhta nandangi Yesus bage pe keteladanen patuh ras kinigenggengen Yesus sangana Ia ngenanami kiniseran I doni enda (ayat 2, 3).
  

(3) Ayat 5-11 mpersingeti kita, sipemena: kalak situtus, sipatuh, bage pe bujur (nggeluh erpalasken kebenaren Dibata), labo berarti lanai lit simedanggelna, ntah pe alu kata sideban lanai ngenanami kiniseran. Bagi anding-andingen kerna batang kayu, reh ganjangna ia reh buena angin sinderpasa. Ibas sienda, adi erkiteken kita nggeluh erpalasken kebenaren Dibata maka turah kiniseran ibas geluhta ula aru ateta, ula kitik ukurta, bagi sinisingetken ibas Yohanes 15:18-20 eme tandana kita enggo sekerajangen Dibata labo sekerajangen doni enda. Bagepe tetaplah siinget maka kinitekenta epe kepeken terus iuji, tetap paguh ntah lang, setia seh kedungenna ntah lang. Sipeduaken, erkitken kelapatuhenta erbahansa kita ngenanami kiniseran. Bagi kegeluhen kalak Israel, erkiteken kurang patuh 40 tahun I padang gurun, erkiteken la patuh ibuang ku Babel, rsd. Kerna sienda labo la keleng ate Dibata (bd.ayat 6), tapi iukumNa bangsana segelah jera ntah pe robah. Alu kata sideban arah ukumen e gelah bangsaNa mulihken nggeluh bagi singena ate Dibata. Memang desken anak, megati kita la senang iajarken orang tua, terlebih irawai ntah pe disiplin si isehkenna. Tapi kenca kita enggo dewasa, terlebih kenca kita enggo erjabu ras njayo ijeme maka sigejapken nasehat, mungkin rawa orang tua, disiplin si iterapkenna ndube tuhu-tuhu erkiteken keleng atena guna kiniulinta. Lit kesaksin sekalak permata, waktu e sekolah ia I Yogyakarta. Perban ia kalak Perbesi, isungkun kalak ia tandaina kang sekalak pandeta sipernah melayani I Perbesi. Reh nina, kutandai bahken pendeta e ndube seh kal ateku segatna erkiteken ibas latihen VG, Koor bagepe ngawan seh kal disiplinna. Tapi gundari sebalikna aku bersyukur erkiteken didiken disiplin si isehken pendeta e maka banci aku bagenda ras sekolah seh Jogja enda, nina.

(4) Mungkin paksa enda sanga kita ngenanami kiniseran ntah perbeben. Mari sievaluasi erkiteken kai. (1) Adi erkiteken kepatuhenta nggeluh erpalasken kata Dibata, ula kita erugapa ndia. Tetaplah kita setia seh kedungenna. Inget maka kinitekenta desken perlumban, iuji kepe terus menerus. Amin gia bage labo ipediat Dibata kita erdalin sisada, temanina nge kita (Matius 28:20), ipegegehina nge kita sebab labo ipediatna kalak bujur italuken (Mazmur 55:23). Inget pe kata Dibata enda, 1 Petrus 5:10 “Tapi kenca kam ngenanami kiniseran kentisik, serta me kam iban Dibata, sidem lias ate, Si ndilo kam gelah ngenanami kemulianNa si rasa lalap erkiteken persadanndu ras Kristus; ipetetapNa dingen ipegegehiNa kam janah iberekenNa man bandu palas si nteguh. (2) Adi erkiteken la patuh man Dibata ntah pe erkiteken kejahatenta maka kita paksa enda ngenanami kiniseran ntah perbeben, jeralah. Sabab keleng kap ate Dibata kita. Banci jadi arah kiniseran e ate Dibata segelah kita mulihken nginget Ia ras ernalem man baNa, bagi kalak Israel tupung ibuang ku Babel. Saja ngenca bagi isingetken ibas Heber 3:15 "Adi ibegindu sora Dibata sendah, ola pemersik ukurndu bagi nini-ninindu nai asum ia berontak ngelawan Dibata."

Pdt.S.Brahmana

Artikel lain yang terkait: