Introitus :
Ibuat TUHAN Dibata sitik abu taneh ijadikenNa jelma; iembuskenNa kesah kegeluhen ku bas igungna, e maka mulai me jelma ndai nggeluh (Kejadin 2:7)
Ogen : Kejadin 1:27-28; Khotbah : 1 Kor 11:3; 1 Tim 3:4
Tema : Ngelum baken Keluarga Si Erkualitas
Jabu entah pe keluarga ibas ilmu sosial eme kap lembaga/kelompok/bagian terkecil ibas masyarakat. Emaka arah jabu-jabu si lit ibas sada negara banci menentuken perkembangen bangsa e ntah pe kehancuren sada bangsa, khususna ibas menentuken moral ras integritas masyarakatna. Adi mehuli keadaan keluarga-keluarga, mahan bana mehuli ka keadaan masyarakat bage pe negara terlebih gereja. Ertina, keluarga/jabu seh kal pentingna nandangi masyarakat ras gereja. Sebab arah keluarga-keluarga si mehuli banci terbentuk generasi-generasi penerus si berkualitas (moral & integritas).
Adi lembaga pemena si ibentuk Dibata man manusia eme keluarga siterbentuk arah sada perjabun/pernikahan. Ras lembaga e ibentuk Dibata ope denga manusia dabuh ibas dosa. Ertina perjabun e mehuli I hadapen Dibata. Maka erjabu ras membangun sada keluarga labo dosa. Bahken perjabun e merupaken persekutuan si istimewa ibas manusia ras Dibata.
Senina ras turang kekelengen ibas Yesus Kristus…
Ibas Kejadian 2: 18, ijelasken bahwa perban Inisiatif Dibata saja maka lit keluaraga ntah pe jabu. Dibata si nepa jabu e, emaka pasti lit tujuan ras sura-sura Dibata si mehuli nandangi tep-tep jabu. Si utama tujuan Dibata eme jabu e banci jadi alat/perpanjangen tan Dibata guna ngenepi Misi Dibata. Dibata meteh maka la mehuli manusia nggeluh sisada-sisada, emaka Dibata mereken penampat/penolong si sepadan man banta.
Ibas perkembangenna keluarga e iertiken ibas Bapa, Nande, Anak, siikataken pe selaku keluarga inti. Ibas erti enda maka kerinana ibas keluarga enda tetap ibas rancangen si mehuli ibas sura-sura Dibata. Ertina adi ikataken perayaken keluarga kubas singena ate Tuhan, maka kerina bagin ibas keluarga enda ncidahken kemulianNa.
Ibas perayaken peningkaten kualitas keluarga icidahken uga maka kerina bagin keluarga e reh teridahna peranna ibas nehken tanggung jawabna. Bapa, nande, anak meteh kai arus ilakokenna selaku tanggung jawab imanna. Ibas sienda me Pekan Keluarga wari pemena enda iingetken kita kerna uga kita ngelumbaken keluarga si erkualitas.
Arah bahan Pekan enda banci siidah uga arusna ngelumbaken keluarga sierkualitas e :
(1) Sigejap maka sinjadiken kita eme Tuhan Dibata (Introitus : Kej. 2:7)Ibas pengertin enda perlu sisadari ise kita sienggo ijadikenNa ibas debu taneh nari jadi nggeluh. Jadi kai siibahan DIbata e arus siergai alu ncidahken keberadanta selaku kalak simeherga. Termasuk ibas sie kerna keluarga eme pemere Dibata. Kualitas keluarga sierkiniteken arusna teridah jadi sira ras terang ibas kegeluhen enda, she maka arah keluarganta terpuji Tuhan Dibata.
(2) Awalna Dibata mereken sada tanggung jawab si mbelin man manusia e (Adam), ngkuasai ras njagaisa (Kej. 2:15) kerina tinepa Dibata. Enda labo pendahin si mudah apaika harus idahiken sekalak saja, perban ngidah kondisi e ikataken Dibata ‘la mehuli’. Ibahan Dibata solusi nepa teman si sepadan ras Adam, sebab labo banci rubia-rubia, perik-perik banci jadi teman si sepadan man Adam. Manusia memerluken teman erbagi kerna beban pikiran, berkomunikasi si seri ras ia terlebih si sentudu ras tempas Dibata (Kej. 1:26) guna banci saling menghargai tinepa Dibata. Jadi mitra kerja Adam si sesuai bagi sura-sura Dibata. Menjadi persekutuan yang Kudus labo persekutuan ras rubia-rubia ntah pe perik-perik, aminna gia ibas jaman genduari enggo mbue jelma e riahen akapna erteman ras rubia-rubia ras perik-perik asangken man jelma sideban, makana enggo mbue genduari tingkah laku jelma e bagi rubia-rubia (licik bagi nipe, meganjang ukur bagi singa, merangap bagi babi, rsd).
Perjabun manusia berbeda ras perjabun hewan/rubia-rubia, anem gia rubia-rubia/hewan e pe itepa Dibata erpasangen jantan ras betina, tapi manusia melebihi ibas akal budi, kesadaren akan diri sendiri, kesadaren ibas mbegiken sora Dibata guna banci membedaken apai si mehuli ras la mehuli. Walaupe perjabun manusia mencakup naluri ras nafsu bagi si lit pe ibas rubia-rubia/hewan, tapi perjabun manusia merupaken sada hal sindauh lebih agung asangken perjabun rubia-rubia/hewan, sebab manusia itepa sue ras tempas Dibata.
Dibata nepa manusia dilaki ras diberu gelah jadi mahkota ciptaan Allah, labo lit perbedaan derajat. Adi lit denga pemahamen bahwa diberu lebih rendah asangken dilaki eme sada kesalahen si mbelin ihadapen Dibata. Adi enggo ikataken jabu ntah pe keluarga e terbentuk atas Inisiatif/keputusen Dibata, emaka ndehara ntah pe perbulangen si enggo ibereken Dibata she kal istimewana. Adi lit si atena ncedai perjabunna, la setia man pasangen si enggo ibereken Dibata man bana, maka ia musuh Dibata (bnd. Matius 19:6). Dibata la ngena nandangi jelma si atena ncedai jabuna si enggo irancang Dibata alu alasen kai pe. Sebab Ia sendiri si enggo netapken ras masu-masu jabu e, emaka ula ise pe si anggap enteng kerna arti perjabun.
(3) Keluarga sierkiniteken arus ngasup ncidahken kiniraturen ibas jabuna. Paulus nekanken man singepkep perpulungen arus lebe ngasup ngepken jabuna alu mehuli (1 Tim 3:4). Ertina kiniulin ras kesetiaan ibas sikitik maka iberekenNa siterbelinen. Jadi ibas kita ngelumbaken keluarga sierkualitas ibas erbage perubahen si mehuli, mulihken arus ibas dasarna nari eme keluarga, sebab eme si jadi pondasi ibas kiniulin kerina. Ibas terbentukna keberadaan keluarga sierkualitas maka mahan bana terbentuk persadaan si terbelinen pe jadi erkualitas.
Pdt. Alexander Simanungkalit
GBKP Rg. Bekasi
0 komentar:
Post a Comment