Suplemen Bimbingen Pjj Tgl. 22-28 Maret 2015, Ogen Epesus 2:1-10

Ogen   : Epesus 2:1-10

Thema : Keselamaten si tuhu-tuhu

Tujun :

• Gelah ngawan perpulungen ngangkai erti keselamaten si tuhu-tuhu
• Gelah ngawan ni perpulungen ncidahken tanda-tanda kegeluhen kalak si enggo iselamatken.

Bagi enggo ituriken ibas Pjj Minggu silepas maka surat Epesus enda itulis Paulus sanga ia ibas penjara Roma sekitar tahun 62 Masehi. Tujun surat Epesus enda tersirat ibas Epesus 1:15-17. Isehkenna ija maka erkiteken ibegina uga perpulungen Epesus erkiniteken man Tuhan Yesus, janah kinitekenna e teridah arah kekelengen nandangi anak-anak Dibata, iban Paulus me suratna enda. Toleh isehekenna pe maka la erngadi-ngadi ia ertoto gelah ibereken Dibata kesah kepentaren dingen ipetangkasNa diriNa gelah itandai perpulungen enda Yesus kristus alu payo (bd. Epesus 4:13). Tentuna arah suratna enda pe mbue isehkenna persinget, pergegeh segelah ngawan perpulungen Epesus tetap mpertahanken sienggo mehuli e.

Ibas bagin ogenta, Epesus 2:1-10, Paulus nehken hal si she kal pentingna man ngawan perpulungen Epesus ras man banta pe genduari eme sehubungen ras keselamaten si tuhu-tuhu. Ngerana kerna keselamaten situhu-tuhu si jadi themata pe ibas PJJ enda arus ijelasken maka lit kange keselamaten si la tuhu-tuhu. Adi keselamaten e siakap erkiteken usahanta, gegehta maka keselamaten e labo keselamaten situhu-tuhu. Sabab labo lit kalak banci terkelin/selamat erkiteken usahana, bahken usahana ndalanken undang-undang (Bd. Galatia 2:21, Roma 7:18-25). Eme si isehken Paulus ibas ayat 8-9. Keselamaten situhu-tuhu eme keselamaten erdandanken lias ate Dibata ras tek man Kristus Yesus. Erkiteken si e labanci kita mujiken bana ntah pe peganjangken bana. Adi bage la kin nari perlu erbahan si mehuli? Tentuna ngelakoken perbahanen simehuli eme gaya hidup kalak si enggo tek, saja ngenja pemahamenna la nai erbahan mehuli maka selamat (pahala), tapi tandana kita enggo ngaloken perkuah ate Dibata (keselamaten) nggeluh kita alu ndahiken dahin-dahin simehuli (ayat 10).

Gelah perpulungen Epesus tetap megegeh ndahiken dahin simehuli selaku anak-anak Dibata, ibas ayat 1-3 ibenaken Paulus alu ngenen ku pudi kerna kegeluhen tanpa Kristus eme:

1. Mate secara rohani (ayat 1)

2. Iteruh kuasa si iblis (Ayat 2)

3. Iperbudak dosa (3a)

4. Iteruh pernembeh Dibata (3b)

Keadan enda kesimpulenna enggo pasti bagi isingetken ibas ayat 3 bagin akhir, eme iteruh pernembeh ate Dibata ertina endatken hukumen Dibata ntah pe kamaten sirasa-lalap. Solusina eme ngaloken perkuah ate Dibata arah tek man Yesus Kristus si enggo keke ibas simate nari (ayat 5, 6). Dua kali isingetken kerna Kekeken Yesus ibas simate nari eme kata “ipegeluhNa kita mulihi radu ras Kristus”, “ipekeke Dibata kita ras Kristus”. Enda nuduhken maka kuasa dosa e she kal mbelinna damapakna eme kematen si rasa lalap. Tapi kematen e enggo iambil alih Yesus Krisstus arah kematenNa I kayu persilang janah la ngadi ibas kematen tapi ibas wari si peteluken keke ka Ia ibas simate nari. Bagem man kerina si tek man Yesus Kristus, ibas sakramen periden si nilakoken gereja ipahami kita enggo ipersada ibas kematen ras kekekenNa eme sababna maka nina paulus “ibas persadanta ras Kristus Yesus, ipekeke Dibata kita ras Kristus”.

Solusi enda enggo ialoken perpulungen Epesus bage pe kita kerina si ngaku pengikut Kristus (Kristen), adi bage arusna gaya hidupta ncidahken kalak “situhu-tuhu” enggo ngaloken keselamaten, eme:

(1) Meriah ukur katawari pe sabab kai si mesikel manusia ndatkenca enggo lit ibas kita eme “keselamaten” (kegeluhen si rasa lalap). Enda me sababna engkai Paulus amin gia ia ngenanami kiniseran erdandanken ipenjaraken tetap ngajuk ngawan perpulungen I Filipi segelah ermeriah ukur katawari pe erdandanken persadan ras Tuhan (Filipi 4:4).

(2) Meteruk ukur man isepe labo sebalikna sabab bagi enggo isingetken pe arah ogen Pjj silepas eme ntah kai gia potensita ras fungsinta ibas gereja la banci kita erpengakap maka kita sihebatna, simakana, rsd. Sabab erbuena pemere sinialoken reh buane kita ituntut, jadi labo soal mbue ntah sitik potensita tapi soal kesetian ndalinkenca. Terlebih arus si inget maka kita iselamatken labo bekas perbahanenta ntah pe ulih pendahinta tapi erkiteken lias ate Dibata erdandanken tek kita man Yesus Kristus.

(3) Ndahiken dahin-dahin si mehuli si enggo leben irencanaken Dibata man banta selaku tinepa si mbaru ibas persadan ras Krisstus. Kai kin dahin simehuli si enggo leben isikapken Dibata? Sada hal si la banci la ilakoken eme naksiken keleng ate Dibata ibas Yesus Kristus man kerina jelma, janari kita pe jadi model uga kin kegeluhen anak-anak Dibata itengah-tengah doni bagi si isuratken Paulus ibas Galatia 5:22-24.

(4) Payo, nggeluh ncidahken keselamaten itengah-tengah kegeluhen genduari labo nukah. Katakenlah nggeluh badia, bujur, la erbual, ertanggungjawab, rsd. Saja ngenca amin gia la nukah labo erbahansa kita menyerah jenari terkontaminasi gaya hidup kalak si la mbiar man Dibata. Sabab man banta enggo jelas erpalasken Mazmur 90:10 maka nggeluh bas doni enda labo ndekah, ikataken umur manusia 70 tahun adi megegeh 80 tahun… berarti lit limitna, emaka pemasmur mindo gelah Dibata tetap ngajari ia ngertiken kinata gendekna umur e alu bage pintar mensikapi kegeluhen e alu payo.

Pdt. S. Brahmana

Artikel lain yang terkait: