Suplemen Bimbingen Pjj tanggal 15-21 Julii 2012, Mazmur 139:13-16

Bahan : Mazmur 139:13-16

Thema : “KITA TINEPANA SIMEHERGA”

Tujun :

• Gelah ngawan perpulungen sedar maka kita (manusia) tinepa Dibata simeherga
• Gelah ngawan perpulungen nggejapken Dibata erdahin ibas geluhna

Catatan

1. Ibas Kejadin 1:26-27 ituriken maka manusia eme tinipe Dibata si muliana, simehergana, labo saja erkiteken tinepa Dibata si pepudina tapi erkiteken manusia siitepa Dibata e “sentudu ras tempas Dibata”, bahken si “menam seri ras Dibata”. Menam seri berarti labo seri. Amin gia labo seri ras Dibata tapi arah istilah e nuduhken maka manusia si ijadiken Dibata e la seri ras rubia-rubia si enggo leben I jadiken erkiteken ibas manusia lit akal, kehendak (bebas) ras kekuasan. Endame sinimaksud “menam seri e” emaka man manusia iendesken tugas mewakili Dibata “gelah ikuasaina kerina nurung, perik-perik, bage pe kerina asuh-asuhen ras rubia-rubia si meliar, subuk si galang ras si kitik." Bandingken pe Kejadin 2:15 “Kenca bage, itamaken TUHAN Dibata manusia ndai i Peken Eden, guna ngusahai ras njagaisa”.
2. Kata Dibata siman oratenta senda eme Mazmur 139:13-16. Bagin enda pe ngerana maka Dibata nge si njadiken manusia labo erkiteken proses evolusi bagi nina Darwin. Saja ngenca lit dua hal sijadi perenungen ntah pe penekanen Pemasmur ijenda. Sipemena eme maka Dibata nge sinjadiken dirina secara ajaib, ras sipeduaken: Dibata meteh kap secara rinci kerina proses penciptaen manusia e. Alu pemahamen sibage ntah pe alu kesadaren sibage ija Dibata eme “Maha Tahu, Maha Hadir, ras Maha Kuasa” arusna erbahansa kita (1) reh tenangna ibas menghadapi masalah; (2) La kita pang erbahan si la mehuli erkiteken itandai ras idah Dibata kap kita. Sabab kerina dampar kegeluhenta baik siteridah ntah pe si la teridah la kap lit siterligen ibas Dibata. Emaka labo lit ise pe ngasup cebuni ibas adap-adepen Dibata nari (ayat 7-10). Iperdiateken Dibata kap setiap pribadi menaken ibas bertin, anak-anak she dewasa. Emaka iarapken Dibata kal kita segelah jujur ras terbuka ilebe-lebena.
3. Thema “Kita TinepaNa Simeherga”. Biasana kai pe adi tuhu-tuhu si gejapken e meherga labo kita pang erbahansa “sembarangen”. Sirawat, sijaga ras siperdiateken kal gelah ula ceda, ula tangko kalak, rsd. Emaka adi tuhu-tuhu sisadari maka kita tenepa Dibata maka la banci lang:
   
   1. ngataken bujur man Dibata si enggo nepa kita.
   2. Ngergai diri sendiri. Dibata njadiken kita alu keunikan masing-masing, fungsi masing-masing ras kelebihen dingen kekurangen, emaka kila la banci mengeluh ntah pe jungut-jingut nandangi keadan ras kekurangenta. Kita arus njaga dirinta alu mehuli, erkiteken kita eme rumah pertoton ras Dibata kap empuna ( 1 Kor 3:16-17 dan 1 Kor 6:19-20).
   3. Ngergai kalak sideban pe. Erkiteken kita kerina eme tinepa Dibata ras meherga man Dibata, emaka kita pe arus ngergai kalak sideban.

Pdt.S.Brahmana

Artikel lain yang terkait: