Suplemen Bimbingen Pjj tanggal 30 September-05 Oktober 2012, Kejadian 27:5-10

Bahan   :   Kejadin 27:5-10

Thema  :   “Rencana Dibata Pasti Seh Ibabo Kerina Sura-sura Manusia”

Tujun  :  

1. Gelah ngawan perpulungen sedar maka kuasa Dibata la terjului manusia
2. Gelah ngawan perpulungen nggeluh ibas kinibujuren Dibata

Kerina manusia ersura-sura gelah ibas geluhna lit ibas kesenangen, kemalemen ate. Tapi labo kerina manusia banci pentar ibas nehi sura-surana e. Kecenderungen manusia eme alu ngandalken dirina, kalak sideban termasuk kiniliten/pemeteh silit. Ibas erbage upaya siilakoken manusia megati lupa kerna kuasa Dibata si labo terjului.

Selaku manusia si ijadiken Dibata alu kuasaNa, megati ka manusia lupa man simada kuasa e, lupa kerna Dibata simenentuken kerina sinasa lit, jenari jadi me manusia mengandalken diri/pemetehna jine. Kecenderungen perukuren manusia eme alu njadiken dirina erkuasa nandangi kegeluhenna jenari nundalken Dibata.

Kesaksin Alkitab nuduhken maka Dibata kap simada kerina/mada kuasa subuk nandangi manusia bagepe pertibi enda, tapi megati kel lanai kita sabar, mulai ragu atau bahkan lanai tek ibas rancangen Dibata nandangi kegeluhen manusia. Ibas rehna kecibal kegeluhen si la bagi ukur jadi me kebiaren-kebiaren seh maka sidarami gegeh sideban termasuk dibata-dibata sideban. Erbage alasen manusia banci ipeseh guna pembenaren diri termasuk nutupi kerna kelemahenna, tapi iadepen Dibata situhuna lalit siterbuni. Dibata ngidah, meteh kai si arus ilakokenNa guna tersehi tujunNa eme guna kiniulin manusia, sedangken manusia ngelakokensa guna kiniulin manusia e.

Bagem ibas bahan PJJ enda isingetken kita kerna perukuren ras perbahanen manusia si rukur ras erbahan bagi ukurna saja seh maka enggo lupa perukuren/sura-sura Dibata. Pengarapenta arah PJJ enda maka banci sidalanken kegeluhen enda alu mengandalken Dibata ibas erti nehi sura-suraNa jenari mpekitik banta (sura-suranta) seh maka kemulian jadi baginNa, kemalemen ate jadi baginta.

Kejadin 27:5-10

Erlajar kerna bahan enda perlu siertiken konteks menyeluruh ibas bahanta e eme :

1. Situasi keluarga Ishak/Ribka sindalanken kegeluhen jabuna alu pengarapen kerna tuah/anak ibas jabu.
2. Keleng ate Tuhan icidahken alu nehi sura-sura Ishak/Ribka alu mereken tuah ibas jabuna, alu cataten : Tuah e jadi dua bangsa simbelin, tapi jadi permusuhen ibas sidua e, gegehen agina asangken kakana, kakana suruh-suruhen agina (Kejadin 25:23)
3. Kehadiren Esau ras Yakup jadi keriahen man Ishak ras Ribka, tapi keriahen e icidahkenna alu upaya nehi sura-surana ibas perukuren erngena ate nandangi sada anak : Ishak ngenan atena Esau jenari Ribka ngenan atena Yakup.
4. Perdalanen Jabu e jadi perdalanen nehi sura-sura mehuli pengakap manusia seh makana lupa kerna sura-sura Dibata. Ishak erbuni-buni atena nehken pasu-pasu[1] man Esau, sedangken Ribka ibas ibegina e sura-surana eme Yakuplah sin datken pemasu-masun e. Teridah uga perbahanen Ishak ras Ribka ibas atena ndatken sura-surana e enggo ngelupaken Dibata simada kerina termasuk sienggo netapkensa.
5. Ibas Dibata lalit siterbuni, teridah kerina ibassa, lit sura-sura manusia, tapi peraten Dibata nge sijadi. Pengajuk man banta eme gelah tetap erpengendes ras mengandalken Dibata/kuasaNa ibas kegeluhen enda.
6. Erbage perukuren manusia banci akap manusia e mehuli, tapi langa bo tentu mehuli iakap Dibata. Erlajar kerna perukuren Dibata eme ngasup ngaloken kerinana alu dem pengataken  bujur jenari tetap setia sebab tek kita maka rancangen Tuhan tetap mehuli man banta, jadi lit persoalen, reh la bagi ukur justru jadi pelajaren simeherga guna mendewasaken kita.
7. Lalit si pulah ibas penatap Dibata. Perukuren ras sura-sura Ishak ras Ribka akapna mehuli ibahanna seh maka pembenaren diri jadi ibassa, Kejadin-kejadin sila iarapna jadi : Ishak nehken pasu-pasu la man siniarapkenna (esau) tapi dabuhna man Yakup, Ribka simakeken fungsina (selaku nande) guna pembenaren diri, seh sura-surana tapi jadi masalah man bana erkiteken kedungenna Yakup arus kiam ibassa nari.
8. Erbage pengarapen/sura-sura manusia simehuli tentu payo siakap guna idalanken, tapi ibas ndalanken sie kerina arus lalap lit pengertinta kerna payo nge e ibas sura-sura Dibata entah sura-suranta saja. Ertina banci siakap mehuli justru jadi mara man banta. Tentu ibas pengertin enda ngajuk kita ibas nehi sura-suranta lalap siperhadapken ibas rancangen Tuhan.
9. Guna erlajar ngertiken sura-sura Dibata siperdiateken hubungenta ras Ia, ketutusen, kesetiaan, kepatuhen alupengertin enda seh kita kubas tahapen : Kai pe sijadi ibas kegeluhen enda lapernah lepas ibas rancangen Dibata, sipelajari sie kerina ibas kegeluhen enda alu tetap setia, jujur ras erpengendes man baNa.

Pdt.Alexander Simanungkalit,S.Th

---

[1] Ibas tradisi : Pasu-pasu siipeseh eme bentuk berkat si berlaku kidekah ia nggeluh siipeseh sekalak Bapa nandangi anak sintua guna nggantiken/ahli waris keluarga (peran bapa). Secara umum pasu-pasu siipeseh eme simehuli guna kegeluhen pagin.

Artikel lain yang terkait: