Renungan / Khotbah Galatia 5:22-26, Pekan Doa Wari III, 24 September 2013

Introitus :
Tapi keriahen si enggo iberekenNdu bangku, lebihen asang keriahen kalak si melala erta-ertana (Masmur 4:8).

Ogen : Roma 14:17-18; Khotbah : Galatia 5:22-26

Thema :
Kesah Sibadia Maba Keriahen ras Kemalemen Ate

Popi (Pokok Pikiran) : 

1. Gelah ngawan Perpulungen meteh maka ulih Kesah Sibadia eme maba keriahen ras kemalemen ate (Labo keriahen secara doni)
2. Gelah ngawan perpulungen nggeluh erpalasken keriahen si ibabai Kesah Si Badia.

Renungan

Ibas tahun 2011 enggo iban suplemen GBP GBKP 2010-2015 simenekanken segelah program si iban baik tingkat Moderamen, Klasis, Runggun/Bajem mengacu ku PME (Program Monitoring ras Evaluasi) alu bage kai pe si programken segelah terukur. Ertina lit iban indikatorna berhasil ntah lang program e, anem gia indicator siiban e ukurenna mengacu ku kukwantitas denga. Misalna, bagi si iban ibas pengelayasi Pemilihan Pertua-Diaken Periode 2014-2019. Ibas 7.1.3 ije ijelasken ukuren mejingkat eme ngikuti kebaktin minimal 2 kali sebulan bagepe ngikuti PA-PA. Janah man sisangana njabat Pertua-Diaken minimal 2 kali sebulan ngikuti sermon.

Ibas pekan Doa sipeteluken enda, kita ibabai kubas thema “Kesah Sibadia Maba Keriahen ras Kemalemen Ate”. Thema enda situhuna enggo implicit maka indicator litna Kesah Si Badia nandangi kalak si erkiniteken eme keriahen. Amin gia penililaian nandangi keriahen e banci relative. Adi si tole sinehen nas khotbah, Galatia 5:22-26 ije alu terang isingetken indikator ulih Kesah Si Badia labo saja keriahen, tapi lit siwah ulih Kesah Sibadia eme (1) lit kekelengen/kasih, (2) lit keriahen/sukacita, (3) lit kemalemen ate/damai sejahtera, (4) lit kesabaren/kesabaran, (5) idalankenna perbahanen si mehuli/kemurahan, (6) mehuli ia/kebaikan, (7) setia/kesetiaan, (8) Meteruk ukurna/ kelemahlembutan, (9) ngasup engkuasai diri/penguasaan diri. Saja ngenca kai ka indikatorna lit kekelengen e, keriahen, kemalemen ate, kesabaren, kemurahan, kebaikan, kesetiaan, kelemahlembutan ras penguasan diri? Bagi enggo isingetken adi secara kwalitas mesera erbahan penilaian terlebih menilai kalak sideban (relative), beda sitik adi menilai dirinta sekalak-sekalak rikutken Pustaka Sibadia. Misalna indicator kekelengen eme erteman ia ras ise pe, nggit ia nampati la saja kade-kade, bagepe sitandaina saja, musuhna pe isampatina adi perlu man sampaten, rsd. Tole misalna indicator engkuasai diri eme banci siban la pedas merawa adi ibas paksa secara umum arusna enggo merawa, la pedas muat kesimpulan, rsd banci sitambahi. Saja ngenca indicator sibagenda banci denga iperdebatken, beda adi mengacu ku kwantitas misalna indicator kekelengen eme setiap ngapul-ngapuli reh ia. Adi ibas sada tahun lit 5 kali ngapuli runggun reh ia 5 kalina berarti kekelengenna mbelin, rsd. Bagepe ulih Kesah Sibadia sideban banci siban indikatorna.

Ulih Kesah Sibadia si isingetken Paulus ibas nasta situhuna guna mereken perbandingen ras ulih diluar Kesah Sibadia eme Perbahanen-perbahanen si erpalasken sura-sura ukur manusia ntah bahasa Indonesiana “Perbuatan daging”. Alu perbandingen enda jelas maksud Paulus segelah ngawan perpulungen paksa e banci mengevaluasi dirina sekalak-sekalak, payo nge lit ibas ia Kesah Sibadia ntah Kesah sibagi ia. Bagepe, payo nge ia Kristen ntah purak-purak Kristen. Kristen ertina pengikut Kristus.

Eme sababna ibas ayat 24-26, tole itegasken Paulus tanda sekalak e enggo sekerajangen Kristus arusna perukurenna secara manusia enggo ibunuhna i kayu persilang rikut ras kerincuhen dagingna bage pe sura-surana (Bd.Galatia 2:20 “Lanai aku si nggeluh, tapi Kristus kap si nggeluh i bas aku. Kegeluhenku si genduari i bas doni enda kugeluhken erkiteken kiniteken man Anak Dibata, si ngkelengi aku dingen ngendesken diriNa man gunangku.”). Adi enda indicatorna, uga nge kita, payo nge perukurenta secara doni enggo ibunuh I kayu persilang? Tentu kita ngenca metehsa sekalak-sekalak, sipasti rikut ayat 25-26 kalak sibage arusna lagu langkahna rikutken peraten Kesah e, ibas paktekna antara lain lanai banci meganjang ukurta, lanai sitokoh-stokohen ntah pe sician-cianen.

Mulihken kita ku bas themata, “Kesah Sibadia Maba Keriahen ras Kemalemen Ate”. Thema enda banci ipahami pe kubas 2 hal. Sipemena itengah-tengah kegeluhenta jaman genduari ija reh warina labo reh urakna persoalen nggeluh sierbahansa lanai siakap meriah ras ermalemate ndalani kegeluhen enda she maka reh warina reh urakna semangat bage pe kejingkatenta erdahin, terlebih ngikuti kegiaten-kegiaten gereja, emaka arah Pekan Doa enda, khususna wari sipeteluken enda ngingetken kita maka Kesah Sibadia ngasup Keriahen ras Kemalemen ate. Ertina, Adi Kesah Sibadia e siban ia erdahin ibas pusuhta, engkuasai geluhta la banci lang amin gia labo urak persoalen siman hadapen tapi rehtambah-tambahna keriahen ras kemalemen ateta. Labo saja secara doni, sebab keriahen ras kemalemen ate secara doni sifatna la ndekah. Misalna, mbue pe ertanta kentisik nge ngenca meriah siakap sabab erta e labo banci sibaba mate, bagepe erta e labo ngasup erbahanca kita enggeluh rasa lalap ntah terkelin sebalikna meriah siakap erkiteken silakoken kai singena ate Dibata sue ras pemabai Kesah Sibadia (bd. Roma 14:17-18) sabab sue ras janji Dibata I doni enda pe kita ipasu-pasu Dibata (bd. Ayat 18 pengogenta ras Matius 6:33), terlebih kenca kegeluhen enda sialoken me kegeluhen sirasa-lalap. Kuakap enda me si ipahami Pemasmur ibas introitusta, Masmur 4:8 “Tapi keriahen si enggo iberekenNdu bangku, lebihen asang keriahen kalak si melala erta-ertana”. Sipeduaken, jadi evaluasi man banta, apakah meriah ras malem ateta erdandanken kita kalak Kristen? Adi lang e salah sada tandana kita lenga nggeluh ibas Kesah Sibadia. Sabab bagi isingetken ibas nasta ndai maka salah sada ulih Kesah Sibadia eme lit keriahen. Adi bage arah Pekan Doa berngi sipeteluken enda mari alu meteruk ukur sisehken totonta, subuka pusuhta jenari sibiasaken tiap wari sioge Pustaka Sibadia segelah Kesah Sibadia ringan ije, jenari sibere dirinta ipimpin Kesah Sibadia e. Adi bage tek kita meriah dingen malemme ateta. Amin.

Pdt.S.Brahmana

Artikel lain yang terkait: